Romanos 9

1Melel te bin ya cal ta scuenta Cristo, ma jlotuc, soc hich ya yalbon te co'tan ta scuenta te Ch'ul Espíritu, 2te bayel ya jmel co'tan soc spisil ora ay bin c'ux ya ca'iy ta co'tan, 3yu'un co'tanuc te ya xbohlob jc'oblal soc te pihtesbilon yu'un Cristo ta scaj te c'ux ta co'tan te quermanotac, ha te jmohlol-ts'ahquil ta scuenta ch'ich'-baq'uet; 4te ha israeletic te ha yu'unic te iq'uel ta al-nich'anil, ha yu'unic te utsilal, te chapbil-c'op, yich'el te Ley, yich'el ta muc' te Dios soc te bintic halbil hilel ta jamal. 5Ha yu'unic te namey tatiletic, soc ta scuenta ch'ich'-baq'uet tey talem a te Cristo, te ha Dios yu'un spisil bintic ay, te stalel ay ta ich'el ta muc'. Hichuc. 6Ma yu'unuc te ma ba c'oht ta pasel te bin la yal te Diose, como ma spisiluc israeletic te mach'a sts'umbal Israel; 7soc ma spisiluc yal-snich'nab Abraham aunque ha sts'umbalic, yu'un ya yal: Ha nax ta scuenta Isaac te halbil te ha ats'umbal, xchi. 8Ha yu'un, ma ha'uc yal-snich'nab Dios te mach'atic al-nich'aniletic ta scuenta ch'ich'-baq'uet, ha sts'umbal Abraham c'ohemic te mach'atic al-nich'aniletic ta scuenta te bin yaloj ta jamal te Diose, 9como hich ay te bin yaloj ta jamal te Diose: Ta hichilan ora ya xtalon soc ya x'ayin jtuhl squerem-al te Sara, te xchihe. 10Ma ha'uc nax ini, ha nix hich jtuhl nax te stat yalatac te Rebeca, ha te antiguo jtatic Isaac. 11C'alal ma to ba ayinemic a, ma to spasojic a te bin lec o te bin ma lecuc, (scuenta yu'un ya xc'oht ta pasel te bin schapoj Dios te ha tsahbil ya xc'oht yu'un, ma ha'uc ta scuenta ya'telic, ha ta scuenta te iq'uel yu'une), 12hich halbot te Rebeca: Te banquilal ya me yac' sba ta a'batinel yu'un te ihts'inal, xchi. 13Como hich ts'ihbabil: C'ux la jca'iy ta co'tan te Jacob, pero p'ajbil cu'un te Esaú, xchi. 14¿Bin ya caltiquix yu'un a hiche? ¿Yu'un bal ma stojiluc te bin ya spas te Diose? ¡Ban c'an hichuc! 15Hich la yalbe te Moisés: Ya jc'uxultay te mach'a ya jc'an ya jc'uxultay, soc ya jna'be yo'bolil sba te mach'a ya jc'an ya jna'be yo'bolil sba, xchi. 16Ha yu'un ma ha'uc chican te mach'a ya sc'an o te ya yo'tantay, ha chican te sc'uxul yo'tan te Diose, 17como te Shun Dios hich ya yalbe te faraón: La jtoybat ac'oblal scuenta yu'un ya cac' ta ilel cu'el ta acuenta, soc scuenta yu'un ya xhalot ta swohlol bahlumilal te jbihile, xchi. 18Ha yu'un chican yo'tan te Dios te mach'a ya sc'an ya sc'uxultay soc te mach'a ya sc'an ya yac' tonobuc yo'tan. 19Pero yac awalbon: ¿Bin yu'un ya ya'be smulin? como ¿mach'a ya xhu' ya scontrahimbe te bin ya sc'an yo'tan te Diose? xchihat. 20Pero, ¿mach'ayat a te yac asut ta c'op te Diose? Te vaso pasbil ta ahch'al ¿ya bal yalbe te jpaswanej yu'un: ¿Bin yu'un te hich la apason? xchi bal? 21¿Yu'un bal ma xhu' yu'un te jpac'ojom ya spas ta jc'ohl nax ahch'al jun vaso te ich'bil ta muc' soc yan vaso te ma ba ich'bil ta muc'? 22¿Ha xan teme Dios, te bin ut'il la sc'an ya yac' ta ilel te yilimba soc te ya yac' ta na'el te yu'el, te cuhch yu'un te bayel la smahliy te vasohetic te ihlaybil yu'un, te chapal ya yich' jinele? 23¿Ha xan teme hich la spas scuenta yu'un ya yac' ta na'el te sc'uhlejal te yutsilal ta stojol te vasohetic c'uxultaybilic yu'un, te schapojix te ya yich'ic yutsilalic, 24ha te ho'otic te ic'bilotic yu'un, ma ha'uc nax judíohetic, ha nix hich te jyanlumetique? 25Como hich nix ya yal ta Oseas: Ya me calbe te ha pueblo cu'un te mach'atic ma pueblohuc cu'un a; soc ya calbe te ha c'uxultaybilix te mach'atic ma ba c'uxultaybilic cu'une. 26Soc ta banti hich halbotic: Ha'ex ma pueblohuquex cu'un, te xchihe, tey ya xc'oht sbihilinic, yal-snich'anic te cuxul Dios, xchi. 27Ha nix hich te Isaías la yawtaybe sc'oblal te Israel: Te hichuc yipal sts'umbal Israel te bin ut'il shi'al mar, stsahbenal xanix te ya xcolic, 28como te Cajwaltic ta stojil soc ta ora nax ya me yac' te castigo yu'un ta bahlumilal, xchi. 29Soc hich te bin ut'il yaloj ta nahil to te Isaías: Te manchuc la yihquitaybotic hilel jts'umbaltic te Cajwaltic te spisil ya xhu' yu'une, hich c'ohotic te bin ut'il Sodoma, soc pajal c'ohotic soc Gomorra te hichuque, te xchihe. 30¿Bin ya caltiquix yu'un a hiche? Te jyanlumetic te ma ba la st'unic bin ut'il toj ya xc'ohtic ta stojol Dios, la stahic, ha te toj ya xc'ohtic ta stojol Dios ta scuenta sch'uhunel-o'tanil; 31yan te Israel, te la st'unic bin ut'il toj ya xc'ohtic ta stojol Dios, ma ba la stahic stuquelic. 32¿Bin yu'un? Como ma ba la st'unic ta scuenta sch'uhunel-o'tanil, la st'unic ta scuenta spasel te bin ya yal te Ley; ha scuentahil te la sc'ohchinic te ton scuenta c'ohchinojibal, 33hich te bin ut'il ts'ihbabil: Ilawil, ta Sión ya cac' jun ton scuenta c'ohchinojibal, soc muc'ul ton te ya xyahlteswan; te mach'a ha ya sch'uhun, ma ba ya sta q'uexlal yu'un, xchi.


Copyright
Learn More

will be added

X\