Romanos 8

1Ha yu'un te mach'atic ayic ta stojol te Cristo Jesús, ma ba quechelix ta stojel te smulique, ha te mach'atic ma ba ya'telinejic spasel te bin ya sc'an te sbaq'uetalic, ha ya'telinejic spasel te bin ya sc'an te Espíritu, 2como te ley yu'un te Espíritu te ya yac' cuxlejal ta scuenta Cristo Jesús la yac'onix ta libre yu'un te ley yu'un te mulil soc te lajele. 3Como te bin ma ba hu' yu'un te Ley ta scaj te mayuc yip te ch'ich'-baq'uet, Dios la spas te bin ut'il la sticon tal te Snich'an te hich nix sbaq'uetal te bin ut'il te jmulawil baq'uet, soc ta scaj mulil, hich la yac' ta tojel te mulil ta baq'uet, 4scuenta yu'un ts'acal ya xc'oht cu'untic te bin stojil ya yal te Ley, ho'otic te ma ha'uc ya ca'telintic spasel te bin ya sc'an te jbaq'uetaltic, ha ya ca'telintic spasel te bin ya sc'an te Espíritu. 5Te mach'atic ayic ta scuenta te ch'ich'-baq'uet ha nax ay ta yo'tanic te bin scuenta ch'ich'-baq'uet; yan te mach'atic ayic ta scuenta Espíritu, ha ay ta yo'tanic te bin ya sc'an te Espíritu. 6Te sna'ulanel te bintic scuenta ch'ich'-baq'uet, ha ya x'ac'otic ta lajel yu'un, yan te sna'ulanel bintic scuenta Espíritu, ha me cuxlejalil soc lamal q'uinal. 7Como te mach'a ya ya'telin sna'ulanel te bintic scuenta ch'ich'-baq'uet, scontrahinej Dios abi, yu'un ma ba ya yac' sba ta cuentahinel yu'un te Ley yu'un Dios, soc ma ba ya xhu' yu'un; 8soc te mach'atic ayic ta scuenta ch'ich'-baq'uet ma ba ya xhu' yu'unic te lec yo'tan Dios yu'unic. 9Pero te ha'exe ma ba ayex ta scuenta ch'ich'-baq'uet, ayex ta scuenta Espíritu, teme melel ayinem ta awo'tanic te Espíritu yu'un Dios. Te mach'a ma ba yich'oj te Espíritu yu'un Cristo, ma yu'unuc Cristo stuquel. 10Yan teme ha ay ta awo'tanic te Cristo, chamenix abaq'uetalic ta scaj mulil, pero cuxul te espíritu awu'unic ta scaj te bintic toj ta pasele. 11Teme ha ayinem ta awo'tanic te Espíritu yu'un te Mach'a la scha'cuxajtes tal ta lajel te Cristo Jesús ta yohlil mach'atic chamenic, ha nix hich ya me scha'cuxajtesbeyex abaq'uetalic ta scuenta te Espíritu yu'un te ayinem ta awo'tanique. 12Ha yu'un, quermanotac, ay bin ya sc'an pasel cu'untic, pero ma ha'uc spasel te bin ya smulan te jbaq'uetaltique, 13como teme ha yac awa'telinic spasel te bin ya smulan stuquel, ya me xlajex yu'un; yan teme ta scuenta te Espíritu yac awac' ta lajel te ya'tel te jmulawil baq'uet, ya me xcuxajex yu'un. 14Ha me al-nich'aniletic yu'un Dios spisil mach'atic ayic ta tojobtesel yu'un te Espíritu yu'un Dios, 15yu'un ma ba awich'ojic te espíritu yu'un mosohinel scuenta yu'un ya xiwex yan buelta, ha awich'ojic te espíritu yu'un al-nich'antayel, te ha ta scuenta ya caltic: ¡Abba, Jtat! xchihotic. 16Ha nix te Espíritu te ya yal testigo-c'op ta stojol te espíritu cu'untic te ha yal-snich'anotiquix te Diose. 17Teme al-nich'anilotic, ya x'ac'ot quich'tic te bin ay yu'un Dios soc pajal ya quich'tic soc Cristo, teme pajal ya xc'ax jwocoltic soc, scuenta yu'un pajal ya quich' cutsilaltic soc. 18Sch'uhunej co'tan te jwocoltic ta ora ini ma pajaluc soc te utsilal te talel yac te ya xchicnaj ta jtojoltic, 19como spisil te bintic pasticlambil c'ax lec yo'tan yac smahliybel ya xchicnajtesot te al-nich'aniletic yu'un Dios. 20Te bintic pasticlambil ac'ot ta cuentahinel yu'un te bin tojol nax, ma ha'uc nix hich la sc'an, pero ha ta scaj te Mach'a la yac' ta cuentahinel yu'un te bin yac smahliybel. 21Como ha nix hich te bin pasbile ya x'ac'ot ta libre yu'un te mosohil yu'un te ya xc'a', yu'un pajal ya yich' yutsilal soc te al-nich'anetic yu'un Dios. 22Jna'ojtic te yac ta ahcan spisil te bintic pasticlambil, soc c'alal ora yac ta c'axel bayel swocol hich te bin ut'il ants te ya yayintes alal. 23Ma stuqueluc nax, ha nix hichotic te quich'ojtic te sba sit yu'un te Espíritu, ha nix hich yacotic ta ahcan ta co'tantic te c'alal yacotic ta smahliyel te iq'uel ta al-nich'an yu'un Dios, ha te colel yu'un te jbaq'uetaltic, 24como ha colemotic yu'un te smuc'ul-o'tanil ini; pero te smuc'ul-o'tanil te chican ta ilel, ma ha'uc mero smuc'ul-o'tanil; como te mach'a ay bin yilojix, ¿bin a te ya smahliy? 25Pero teme ya jmahliytic te bin ma ba quilojtic, jun co'tantic ya jmahliytic. 26Ha nix hich ya scoltayotic te Espíritu te bin ut'il mayuc bin ya xhu' cu'untic, como ma jna'tic bin ya jc'ambetic te Diose, pero ha nix ya xc'opoj cu'untic te Espíritu soc ahcan te ma xweht bin ut'il ya yich' halele. 27Te mach'a ya sna'botic co'tantic ya sna' te bin ay ta yo'tan te Espíritu, como hich ya xc'opoj yu'un te mach'atic ch'uhltesbilic te bin ut'il ya sc'an yo'tan te Diose. 28Soc jna'ojtic te lec ya xc'oht ta loq'uel spisil bintic ya xc'oht ta stojol te mach'atic c'ux ta yo'tan Dios, ha te mach'atic ic'bilic yu'un Dios hich te bin ut'il chapal yu'une. 29Como te mach'atic nahil la sna'be sba, ha nix la schahpan te pajal yilel ya xc'ohtic soc te Snich'ane, scuenta yu'un muc'ul banquilal ya xc'oht yu'un tsobol ihts'inaletic. 30Te mach'atic hich chapal yu'un Dios, ha nix la yic'ticlan; te mach'atic la yic'ticlan, ha nix la yal te toj ay; te mach'atic la yal te toj ay, ha nix la yac'ticlambe yutsilalic. 31¿Bin ya caltiquix yu'un a ini? Teme lec yo'tan Dios ta jtojoltic, ¿mach'a ya xhu' ya scontrahinotic? 32Te mach'a la sloq'ues ta yo'tan te mero Snich'an, te la yac' ta c'abal ta jcuentatic jpisiltic, ¿bin ut'il ma ba pajal ya ya'botic spisil soc a? 33¿Mach'a c'an slehbe smul te mach'atic tsahbilic yu'un Dios? ha nix te Dios te ya yal te toj ay. 34¿Mach'a c'an ya'be stoj smul? ha nix te Cristo te laj, soc xan ha cha'cuxaj, soc ayix ta swa'el-c'ab te Dios, te ha nix ya xc'opoj cu'untic. 35¿Mach'a c'an spitotic loq'uel ta stojol te sc'uxul yo'tan Cristo? ¿Ha bal te contrahinel o wocoletic, uts'inel, wi'nal, teme mayuc c'u'ul-pac'al, te bin chuhcul ya xc'oht ta pasel, o espada? 36Hich te bin ut'il ts'ihbabil: Ha'at ta acuenta te chapal jc'oblalcotic ta milel spisil ora; hichotcotic te bin ut'il tuminchijetic te ochel yac yich'belic milel, te xchihe. 37Ta spisil ini, ho'otic jc'axel ya ca'iytic tsalaw ta scuenta te Mach'a c'ux la ya'iyotic ta yo'tane 38Ha yu'un ni ha'uc te lajel, te cuxlejal, ch'ul a'batetic, principaletic, te bin ay ta ora ini, te bin ya xc'oht ta pasel ta patil, 39te bin toyol ay, te bin c'ubul ay, o biluc a te pasbile, jna'oj te ma xhu' ya spitotic loq'uel ta stojol te sc'uxul yo'tan Dios te ay ta scuenta te Cajwaltic Cristo Jesús.


Copyright
Learn More

will be added

X\