Romanos 7

1¿Ma bal ana'ojic, quermanotac, (ha ya xc'opojon soc te mach'atic ya sna'ic te leyetic), te ley ya scuentahin te winic te jayeb c'ahc'al cuxule? 2Hich c'ohem te bin ut'il ants te nuhpunem te cuentahimbil yu'un smamalal te jayeb c'ahc'al cuxule, pero teme ya xcham te smamalale, libre ya xc'oht yu'un te cuentahinel yu'une. 3Ha yu'un teme cuxul to te smamalal ya x'ic'ot yu'un yan winic, j'antsinel, xchi sc'oblal; yan teme cham te smamalale, hilemix ta libre yu'un te ley abi, teme ya x'ic'ot yu'un yan winic ma j'antsineluquix abi. 4Ha nix hichex, quermanotac, chamenex ta stojol te Ley ta scuenta te sbaq'uetal te Cristo, scuenta yu'un yan mach'a yu'un ya xc'ohex, ha te Mach'a cha'cuxaj tal ta yohlil mach'atic chamenic, scuenta yu'un ya sitinotic ta stojol Dios. 5Como te c'alal ayotic ta scuenta ch'ich'-baq'uet a, te bin chopol la smulan te jbaq'uetaltic te hachbot yu'un te Ley, ha la spas ya'telic ta jbaq'uetaltic te la yac' sitinuc te lajele. 6Pero yo'tic libre ayotiquix yu'un te Ley, te bin ut'il chamenotiquix ta stojol te bin la smosohinotic, scuenta yu'un ya cac' jbahtic ta a'batinel yu'un te bin yach'il yu'un te Espíritu, ma ha'uc yu'un te bin namey ts'ihbabil hilele. 7¿Bin ya caltiquix yu'un a hiche? ¿Mulil bal te Ley? ¡Ban c'an hichuc! Te manchuc ay te Ley, ma ba la jna' bin a te mulil te hichuque. Ma ba la jna' bin a te bic'tal-o'tanil te manchuc hich ya yal ta Ley: Ma me xbic'taj awo'tanic, te xchihe. 8Pero te mulil la stuhun te mandaril, hich la shachbon ta co'tan spisil ta chahp bic'tal-o'tanil, como teme mayuc Ley, chamen te mulile. 9Ta nahilal mayuc Ley a te cuxulone; pero te c'alal tal te mandaril, cuxaj te mulil, ho'on chamon. 10La jquil te ha nix te mandaril te sc'oblal ya yac' cuxlejal, la yac'on ta lajel, 11como te mulil, te bin ut'il la stuhun te mandaril, la slo'loyon soc la yac'on ta lajel ta scuenta. 12Ha yu'un ch'ultesbil stuquel te Ley, soc te mandaril ha ch'ultesbil, toj soc lec. 13¿Yu'un bal ha la yac'on ta lajel te bin leque? ¡Ban c'an hichuc! Pero scuenta yu'un ya xchicnaj te ha mulil, la yac'on ta lajel ta scuenta te bin lec, scuenta yu'un ta scuenta te mandaril c'ax chopol c'oht te mulile. 14Jna'ojtic te Ley ha scuenta espíritu; yan te ho'one ch'ich'-baq'ueton, chombilon ta a'batinel yu'un te mulile. 15Te bin ya jpas, ma jna'be scuentahil, como ma ha'uc ya jpas te bin ya jc'an, ha ya jpas te bin ya quihlay. 16Teme ha ya jpas te bin ma jc'an, yu'unix jna'oj a te lec te Ley. 17Ha yu'un ma ho'uconix te hich ya jpas, ha te mulil te ay ta co'tan te ya ya'bon jpase. 18Ya jna' te mayuc bin lec ta jtojol, ha ta jbaq'uetal, como co'tanuc ya jpas te bin lec, pero ma xhu' cu'un spasel. 19Como ma ha'uc ya jpas te bin lec ya jc'an, ha ya jpas te bin ma lecuc te ma jc'ane. 20Teme ha ya jpas te bin ma jc'an, ma ho'ucon ya jpas, ha ya spas te mulil ay ta co'tan. 21Ha yu'un, aunque co'tanuc ya jpas te bin lec, ya jta te ley ini: ay ta jtojol te bin chopole. 22Ta co'tan ya jmulan te ley yu'un Dios; 23pero ya quil te ay yan ley ta jbaq'uetal te ya scontrahin te ley ay ta co'tan, soc ya yac' te chuculon yu'un te ley yu'un mulil ay ta jbaq'uetale. 24¡C'ux obol jba! ¿Mach'a ya sloq'ueson ta libre yu'un te baq'uet scuenta lajel? 25¡Wocol yal Dios, ta scuenta te Cajwaltic Jesucristo! Ha yu'un te ho'one, ta co'tan ya cac' jba ta a'batinel yu'un te ley yu'un Dios, pero ta jbaq'uetal ya cac' jba ta a'batinel yu'un te ley yu'un te mulile.


Copyright
Learn More

will be added

X\