Romanos 5

1Ha yu'un te bin ut'il halbotic te toj ayotic ta scuenta sch'uhunel-o'tanil, hich lamal q'uinal ya ca'iytic ta stojol Dios ta scuenta te Cajwaltic Jesucristo, 2te ha ta scuenta sch'uhunel co'tantic ta stojol te ya xhu' ya x'ochotic ta stojol te yutsil yo'tan Dios, te banti ayotic ta ora ini, soc tse'el co'tantic ta smahliyel te yutsilal te Diose. 3Soc ma ha'uc nax ini, ha nix hich tse'el co'tantic yu'un te jwocoltic, yu'un jna'ojtic te wocole ha ya yac' te spisil bin ya xcuhch cu'untic; 4te bin ut'il spisil ya xcuhch cu'untic, ha ya yac' te ya xlecub jtaleltic; te bin ut'il ya xlecub te jtaleltic, ha ya yac' smuc'ul co'tantic; 5soc te smuc'ul co'tanic ma xyac'otic ta q'uexlal, como malbilix ta co'tantic te sc'uxul yo'tan Dios ta scuenta te Ch'ul Espíritu te a'bilotiquixe. 6Te c'alal mayuc quiptic a la sta yorahil te cham Cristo yu'un te jmulawiletique. 7Wocol te ayuc mach'a ya yac' sba ta lajel yu'un te mach'a toj ta winiquil; ay wan mach'a ya yac' sba ta lajel yu'un te mach'a lec ta winiquile. 8Pero te Dios la yac' ta ilel te sc'uxul yo'tan ta jtojoltic te bin ut'il cham Cristo cu'untic te c'alal ayotic to ta mulil a. 9Te bin ut'il halbilix te toj ayotic ta scuenta sch'ich'el, c'ax to xan hich ya xcolotic ta stojol te yilimba Dios ta scuenta Cristo, 10como te c'alal jcontrahinej jbahtic soc a te Diose, la yac' te cha'lecub xan yo'tan ta jtojoltic ta scuenta te laj te Snich'ane, c'ax to xan hich ya xcolotic ta scuenta te scuxlejal, te bin ut'il junix co'tan jbahtic soque. 11Soc ma ha'uc nax ini, ha tse'elix co'tantic ta stojol Dios ta scuenta te Cajwaltic Jesucristo, te ha ta scuenta te junix co'tan jbahtic soque. 12Ha yu'un hich te bin ut'il och mulil ta bahlumilal ta scuenta jtuhl winic soc te och lajel ta scuenta mulil, hich c'oht lajel ta stojol spisil ants-winiquetic ta scaj te spisilic stahoj smulic. 13Ayix mulil ta bahlumilal a te c'alal ma to ayuc a te Ley; pero te banti mayuc Ley ma ba ya x'ich'ot ta cuenta te mulile. 14Pero cuentahinotic yu'un lajel c'alal Adán ha to c'alal Moisés, aunque ma hichuc la sc'axuntayic mandar te bin ut'il Adán, te ha seña c'ohem yu'un te mach'a patil ya xtale. 15Pero te mahtanil ma pajaluc soc te sc'axuntayel mandaril, como teme tsobol lajic ta scuenta te jtuhl te la sc'axuntay mandaril, c'ax to xan hich la yich'ic te mahtanil soc te yutsil yo'tan Dios ta scuenta yutsil yo'tan te jtuhle, ha te Jesucristo. 16Soc te mahtanil yu'un Dios ma pajaluc soc te bin c'oht ta loq'uel yu'un te smul te jtuhle; como melel tal castigo ta scaj junax mulil te ac'awan ta lajel, yan te mahtanil tal ta scaj bayel c'axun-mandariletic, scuenta yu'un ya xhalbot te toj ay. 17Teme ta scaj te la sc'axuntay mandar te jtuhl winic te hich och te cuentahinel yu'un te lajele, c'ax to xan hich ya xcuentahinotic yu'un a te cuxlejal ta scuenta jtuhl winic, Jesucristo, te mach'atic ya yich'ic te yutsil-o'tanil te c'ax bayel soc te mahtanil yu'un halel te toj aye. 18Ha yu'un hich te bin ut'il ta scaj te la sc'axuntay mandaril jtuhl winic te tal lajel ta stojol spisil ants-winiquetic, ha nix hich ta scuenta stojil ya'tel jtuhl winic te tal ta stojol spisil ants-winiquetic te ya xhalbot te toj ayic te ha ya yac' cuxlejalil. 19Hich te bin ut'il ta scuenta te la sc'axuntay mandar te jtuhl winic te hich jmulawiletic c'oht spisilic, ha nix hich ta scuenta sch'uhunel mandar te jtuhl winic te tsobolic ya x'ilotic te toj ayique. 20Och te Ley scuenta yu'un ya xp'ohl te mulile; pero te c'alal bayel p'ohlix a te mulil, c'ax to xan hich p'ohl a te yutsil yo'tan Dios, 21scuenta yu'un hich te bin ut'il cuentahinwan te mulil te hich la yac' lajel, ha nix hich te yutsil yo'tan Dios ya xcuentahinwan ta scuenta yaq'uel ta toj, te hich ya yac' cuxlejal scuenta sbahtel q'uinal ta scuenta te Cajwaltic Jesucristo.


Copyright
Learn More

will be added

X\