Romanos 3

1¿Bin ya xloc' a teme ha judío? ¿O bin ya xtuhun a teme yich'oj circuncisión? 2Bayel bin ya xloc' a. Primero, ha a'botic ta scuentahic te sc'op Diose. 3¿Ha xan teme ay mach'atic ma ba sch'uhunejic? Te bin ut'il mayuc sch'uhunel yo'tanic ¿ya bal slajimbe sc'oblal te jun yo'tan ay te Diose? 4¡Ban c'an hichuc! Dios spisil ora ya spas te bin smelelil, ha jlotetic spisil ants-winiquetic; como hich ts'ihbabil: Scuenta yu'un ya xchicnaj te toj ayat ta scuenta bintic yac awal, soc te yac awa'iy tsalaw c'alal ya x'ich'otat ta c'op, te xchihe. 5Teme ta scuenta te bin ma tojuc ya jpastic hich ya yac' chicnajuc te stojil bin ya spas te Diose, ¿bin xchihotic yu'un? ¿Yu'un bal ma stojiluc bin ya spas Dios te ya ya'botic castigo? (Hich yacon ta c'op te bin ut'il winic.) 6¡Ban c'an hichuc! Teme hich ay, ¿bin ut'il c'an ich'otuc ta c'op yu'un Dios te bahlumilale? 7Pero teme ta scuenta jlot ya yac' chicnajuc te smelelil c'op yu'un Dios te hich c'axem xan yutsilal a, ¿bin yu'un ich'bilon ta c'op hich te bin ut'il jmulawil? 8¿Bin yu'un ma hichuc ya yich' halel (hich te bin ut'il ya slehonic ta c'op soc ya yalic te hich calojcotic): Ac'a jpastic te bin chopol scuenta yu'un ya xtal te bin lec, te xchihe? Te mach'atic hich ya yalic, stojil me ya yich'ic castigo. 9¿Bin ut'il ay a hiche? ¿Ho'otic bal lecotic xan a te bin ut'il te yantique? ¡Ban c'an hichuc! Calojtiquix te spisilic ayic ta scuenta mulil, judíohetic soc jyanlumetic. 10Hich te bin ut'il ts'ihbabil: Mayuc mach'a toj, ni jtuhluc; 11mayuc mach'a ya xc'oht ta yo'tan, mayuc mach'a ya sle te Diose. 12Spisilic howiyemic, pajal ma xtuhunic; mayuc mach'a ya spas te bin lec, ni jtuhluc. 13Ha jamal muquenal te yoq'uib; ya xlo'loywanic te yaq'uic. Ay svenenohil ti'awal chan ta sti'il yehic; 14nojel ta ye te bohlc'op soc te bin ch'a. 15Te yoquic ya suj sba ta smalel ch'ich'; 16jinel soc wocol ay ta behetic yu'unic; 17ma ba ya sna'beyic sba te sbehlal lamal q'uinal. 18Ma ba ya xi'ic te Diose, te xchihe. 19Jna'ojtic te spisil bintic ya yal te Ley, ha ya yalbe te mach'atic ayic ta scuenta te Ley, scuenta yu'un spisilic ya xmahc yehic soc spisil bahlumilal ya xhil ta scuenta ich'el ta c'op yu'un Dios, 20como mayuc jtuhluc ya xhalbot te toj ta stojol Dios ta scuenta spasel te bin ya yal te Ley, como ta scuenta te Ley ya yac' ta na'el te ay mulil. 21Pero ta ora ini chicanix bin ut'il toj ya x'ilotic yu'un Dios, ma ha'uc ta scuenta te Ley, ha halbot sc'oblal yu'un te Ley soc yu'un te jalwanejetique: 22ha te toj ya x'ilotic yu'un Dios ta scuenta sch'uhunel yo'tantic ta stojol Jesucristo, spisil mach'atic ya sch'uhunic, yu'un mayuc mach'a yan yilel, 23spisilic ay smulic, ma ba yich'beyejic yutsilal te Diose, 24pero ta scuenta yutsil yo'tan Dios ta mahtanil halbotic te toj ayic, ta scuenta stojel mulil ta scuenta Cristo Jesús. 25Dios la yac' te ha la stojbotic jmultic te Jesús teme jch'uhunejtic te la smal sch'ich'el cu'untic. Tey la yac' ta ilel a te stojil bin ya spas, como cuhch yu'un te ma ba la yich' ta cuenta te muliletic ta namey, 26yu'un ya yac' ta ilel ta ora ini te stojil bin ya spas, scuenta yu'un ya xchicnaj te ha toj stuquel soc te ya yal te ha toj te mach'a ya sch'uhun te Jesús. 27Ha yu'un ¿banti ay te toybahil? Mayuc. ¿Banti yich'oj yip, ha bal ta banti sch'uhunel spasel te Ley? Ma'uc, ha yich'oj yip ta banti sch'uhunel-o'tanil. 28Como ya caltic te ha halbil te toj te ants-winic ta scuenta sch'uhunel yo'tan, ma ha'uc ta scuenta spasel bin ya yal te Ley. 29Te Dios, ¿ha nax bal Dios yu'un te judíohetique? ¿Ma bal ha'uc nix Dios yu'un te jyanlumetique? Ha nix Dios yu'un te jyanlumetic, 30como jtuhl nax Dios ay, soc ha me ya yal te toj ay ta scuenta sch'uhunel yo'tanic te mach'atic yich'ojic circuncisión soc ha nix hich ta scuenta sch'uhunel yo'tanic te mach'atic ma ba yich'ojic circuncisión. 31¿Yu'un bal ya jlajimbetic sc'oblal te Ley ta scuenta te sch'uhunel-o'tanil? ¡Ban c'an hichuc! Ha ya caltic te ay sc'oblal te Ley.


Copyright
Learn More

will be added

X\