Romanos 16

1Ya ca'beyex ta acuentahic te quermanatic Febe, te ha diaconisa yu'un te iglesia ta Cencrea. 2Ic'bonic me ta scuenta te Cajwaltic, hich te bin ut'il ay ta pasel yu'un te mach'atic ch'uhltesbilic, soc coltayahic ta bin ya xtuhun yu'un, como bayel mach'atic scoltaylanej, soc ha nix hich la scoltayon. 3Halbon xcoltanuc te Priscila soc te Aquila, te jmohlol ta a'tel ta scuenta Cristo Jesús. 4C'an yac' scuxlejalic ta jcuenta. Ma jtuqueluc ya calbe wocol, ha nix hich ya yalbeyic wocol spisil te iglesia yu'un te jyanlumetique. 5Soc halbon xcoltanuc te iglesia te ya stsob sba ta sna. Halbon xcoltanuc te Epeneto, te c'ux ta co'tan, te ha nahil la sch'uhun Cristo ta Acaya. 6Halbon xcoltanuc te María, te bayel a'tejem ta awohlilique. 7Halbon xcoltanuc te Andrónico soc te Junias, te jmohlol-ts'ahquil soc te pajal la jquich' chuquel soc. Ha ich'bilic ta cuenta ta yohlil te jpuc-c'opetic, soc ha nahil cu'un la sch'uhunic Cristo. 8Halbon xcoltanuc te Amplias, te c'ux ta co'tan ta scuenta Cajwaltic. 9Halbon xcoltanuc te Urbano, te jmohlolcotic ta a'tel ta scuenta Cristo Jesús, soc te Estaquis, te c'ux ta co'tane. 10Halbon xcoltanuc te Apeles, te chican te jun yo'tan ta stojol Cristo. Halbon xcoltanuc ta sjunal sna te Aristóbulo. 11Halbon xcoltanuc te Herodión, te jmohlol-ts'ahquil. Halbon xcoltanuc ta sjunal sna te Narciso, te ayic ta stojol te Cajwaltique. 12Halbon xcoltanuc te Trifena soc te Trifosa, te yacalic ta a'tel ta stojol te Cajwaltique. Halbon xcoltanuc te Pérsida te c'ux ta co'tan, te bayel a'tejem ta stojol te Cajwaltique. 13Halbon xcoltanuc te Rufo, te tsahbil yu'un te Cajwaltic, soc te snan, te ha jnan c'ohem. 14Halbon xcoltanuc te Asíncrito, Flegonte, Hermas, Patrobas, Hermes soc te quermanotactic sjoquinejique. 15Halbon xcoltanuc te Filólogo, Julia, Nereo soc te yantsilel, te Olimpas soc spisil te mach'atic ch'uhltesbilic te sjoquinejique. 16Talel c'axel xapatbe aba awo'tanic ta scuenta ch'ul uhts'uyel. Xcoltanuquex laj yu'un spisil te iglesiahetic yu'un Cristo. 17Quermanotac, ya calbeyex wocol, te yacuc atsahtay abahic ta stojol te mach'atic ya ya'beyex ajat abahic soc te ya yaq'uic c'ohchinojibaletic te ya scontrahinic te nohptesel awich'ojique. Parte me xawac' abahic soc, 18como te mach'atic hich ya spasic, ma ha'uc yac'oj sbahic ta a'batinel yu'un te Cajwaltic Jesucristo, ha nax ya spasic te bin ya sc'an yo'tanic stuquel. Ta scuenta t'ujbil c'opetic soc te bintic lec ta a'iyel ya slo'loybe yo'tanic te mach'atic ma sna'ic stsahtayel. 19Puhquem ac'oblalic ta bayuc te yac ach'uhunic mandar, ha yu'un tse'el co'tan awu'unic. Pero ya jc'an te ay sp'ijil awo'tanic ta spasel te bin lec, te ma xana'ic spasel te bin ma lecuque. 20Te Dios yu'un lamal q'uinal nopolix ya ya'beyex ats'o'ic ta teq'uel te Satanás. Ac'a sjoquinex te yutsil yo'tan te Cajwaltic Jesucristo. 21Xcoltanuquex laj yu'un te Timoteo, te jmohlol ta a'tel, soc te Lucio, Jasón, Sosípater, te jmohlol-ts'ahquil. 22Ho'on te Tercio, te la jts'ihbay ha'i hun ini, ya jpatbeyex awo'tanic ta stojol te Cajwaltique. 23Xcoltanuquex laj yu'un te Gayo te yotsesejon ta sna soc spisil te iglesia. Xcoltanuquex laj yu'un te Erasto, te tesorero yu'un te pueblo, soc nix te quermanotic Cuarto. 24Ac'a sjoquinex te yutsil yo'tan te Cajwaltic Jesucristo. Hichuc. 25Te mach'a ya xhu' ya ya'beyex yip awo'tanic ta scuenta te lec yach'il c'op cu'un soc ta scuenta halbeyel sc'oblal te Jesucristo, ta scuenta te ac'bil ta na'el te bin muquen ay c'alal ta sbahtel q'uinal, 26pero ta ora ini chicanix ta scuenta te bin ts'ihbabil hilel yu'un te jalwanejetic ta scuenta smandar Dios te sbahtel q'uinal ay, te a'bot sna'ic spisil nacionetic scuenta yu'un ya sch'uhunic; 27te Dios te stuquel ay soc te ay sp'ijil yo'tan, ayuc me yutsilal sbahtel q'uinal ta scuenta te Jesucristo. Hichuc.


Copyright
Learn More

will be added

X\