Romanos 15

1Ho'otic te ay yip co'tantic ya sc'an te ya xcuhch cu'untic te mach'atic mayuc yip yo'tanic, ma me ha'uc ya jlehtic te bin lec co'tantic yu'un ta jtuqueltic. 2Jujutuhlotic ac'a jlehbetic te bin lec yo'tan yu'un te jpat-xuhctic, ha te bin lec ya xtuhun yu'une, yu'un hich ya yich' yipic a, 3como ha nix hich te Cristo ma ha'uc la sle te bin lec yo'tan yu'un stuquel, hich te bin ut'il ts'ihbabil: Ha c'oht ta jtojol te ixta'c'optayel yu'un te mach'atic ya yixta'c'optayat, xchi. 4Como spisil te bintic ts'ihbabil ta nahil, scuenta jp'ijubteseltic te la yich' ts'ihbayel, scuenta yu'un ay smuc'ul co'tantic ta scuenta te bin ya xcuhch cu'untic soc ta scuenta te yip co'tantic ya jtahtic yu'un te bin ts'ihbabile. 5Te Dios te ya yac' te ya xcuhch cu'untic soc te ya ya'botic smuc'ul co'tantic, ac'a yac' te jun awo'tan abahic ta scuenta Cristo Jesús, 6scuenta yu'un junax awo'tanic soc ac'opic yac awalbeyic yutsil sc'oblal te Dios, te Stat te Cajwaltic Jesucristo. 7Ha yu'un talel c'axel xawic' abahic, hich te bin ut'il la yic'otic te Cristo, scuenta yu'un ya xhalbot yutsil sc'oblal te Diose. 8Ya calbeyex, te Cristo Jesús tal yac' sba ta a'batinel ta stojol mach'atic yich'ojic circuncisión yu'un ya yac' ta ilel te bin smelelil yu'un Dios, scuenta yu'un ya yac' c'ohtuc ta pasel te bin yaloj ta jamal ta stojol te me'iltatiletic, 9soc scuenta yu'un te jyanlumetic ya yalbeyic yutsil sc'oblal Dios yu'un te sc'uxul yo'tan, hich te bin ut'il ts'ihbabil: Ha yu'un ya calbat yutsil ac'oblal ta yohlil te jyanlumetic soc ya jc'ayojtaybat abihil, xchi. 10Soc hich ya yal: Jyanlumex, tse'eluc me awo'tanic soc te pueblo yu'une, xchi. 11Soc ya yal xan: Halbeyahic wocol te Cajwaltic, spisil jyanlumetic, c'ayojtaybeyahic yutsilal, spisil nacionetic, xchi. 12Soc hich ya yal te Isaías: Ya me xcha'col te slohp' Isaí, ha te mach'a ya xhahch scuentahin te jyanlumetic; ha me ya smuc'ulin yo'tanic te nacionetique, xchi. 13Te Dios yu'un smuc'ul-o'tanil ac'a snojesbeyex awo'tanic ta tse'el-o'tanil soc lamal-o'tanil ta scuenta te bin ach'uhunejic, scuenta yu'un ay bayel smuc'ul awo'tanic ta scuenta yu'el te Ch'ul Espíritu. 14Quermanotac, sch'uhunej co'tan te ay bayel yutsil awo'tanic soc te ay bayel bin ana'ojic, hich talel c'axel ya xhu' yac anohptes abahic. 15Ay nix banti tulan la jts'ihbayex yu'un ya ca'beyex ana'ic xan a, ta scuenta te bin a'bilon yu'un Dios 16scuenta yu'un ay ca'tel yu'un Jesucristo ta stojol te jyanlumetic, ha te ya ca'telin yalel te lec yach'il c'op yu'un Dios, scuenta yu'un ha mahtanil ya xc'ohtic te jyanlumetic te lec yo'tan Dios yu'un, te ha ch'uhltesbilic yu'un te Ch'ul Espíritu. 17Ha yu'un ay bin ya jtoy jba yu'un ta scuenta Cristo Jesús yu'un te ca'tel ta stojol Dios, 18como mayuc yan bin ya cal, ha nax ya cal te bin la spas Cristo ta jcuenta, yu'un ya sch'uhunic mandar te jyanlumetique. Hich la jpas ta scuenta te jc'op soc te ca'tel, 19ta scuenta yip te señahiletic soc jchahp a'teliletic pasbil ta scuenta yu'el te Espíritu yu'un Dios. Hich c'alal Jerusalén soc ta sjoyobal ha to ta sq'uinal Ilírico, spisil la jnojes ta lec yach'il c'op yu'un Cristo. 20Hich la jco'tantay spuquel te lec yach'il c'op, ma teyuc a ta banti halbilix sc'oblal te Cristo, scuenta yu'un ma ba ya x'a'tejon ta banti hahchemix ya'tel yan, 21pero hich te bin ut'il ts'ihbabil: Te mach'atic mayuc bin ora halbotic sc'oblal, ya me yilic; te mach'atic mayuc xya'iybeyic sc'oblal, ya me xc'oht ta yo'tanic, xchi. 22Ha scuentahil te bayel buelta ay bin la smacon te hich ma ba tal quilex. 23Pero yo'tic mayuquix lec banti ya xhu' ya x'a'tejon xan li'i, soc te bin ut'il ayix bayel ha'bil te co'tanuc ya xtal quilex, 24ya me xtalon ta banti ayex te c'alal ya xbohon ta España. Co'tanuc ya xc'ax quilex, yu'un ya jmulan te ya joquinex cheb oxeb c'ahc'al, patil yacuc acoltayonic xan bahel ta España. 25Pero yo'tic ya xbohon ta Jerusalén yu'un ya xbaht ca'be scoltayel te mach'atic ch'ultesbilique. 26Como ta Macedonia soc ta Acaya soc yutsil yo'tanic la stsobic mahtanil yu'un scoltayel te pobrehetic te ayic ta yohlil te mach'atic ch'uhltesbilic ta Jerusalén. 27Lec la ya'iyic te hich ya spasic, soc ay sbetic yu'unic, como teme pajal yich'ojic te jyanlumetic te bintic ay yu'un te judíohetic te bintic scuenta sch'uhlelic, ya sc'an te ya scoltayic a te bintic scuenta sbaq'uetalic. 28Ha yu'un te c'alal ya xlaj co'tan ta spasel ini, teme la jca'be ta sc'abic te mahtanile, ya xc'ax quilex te c'alal ya xbohon ta España. 29Ya jna' te c'alal ya xbohon te banti ayex, ya xc'ohon soc bayel bendición yu'un te lec yach'il c'op yu'un Cristo. 30Quermanotac, ya calbeyex wocol ta scuenta te Cajwaltic Jesucristo soc ta scuenta sc'uxul yo'tan te Espíritu, te yacuc acoltayonic ta sc'oponel Dios 31te ha'uc libre ya xc'ohon ta sc'ab te mach'atic mayuc sch'uhunel yo'tanic te ayic ta Judea, soc te lecuc yo'tanic yu'un te scoltayel te ya ca'be te mach'atic ch'uhltesbilic ta Jerusalén, 32scuenta yu'un tse'el co'tan ya xc'ohon ta banti ayex, teme hich ya sc'an Dios, soc te hich pajal lec q'uinal ya ca'iytic a. 33Ac'a sjoquinex apisilic te Dios yu'un lamal q'uinal. Hichuc.


Copyright
Learn More

will be added

X\