Romanos 14

1Ic'ahic me te mach'atic mayuc yip sch'uhunel yo'tanic, pero ma yu'unuc te yac atijic ta c'op yu'un te bintic ay ta nopel ta o'tanil. 2Yu'un ay mach'a sch'uhunej te lec ta we'el spisil we'elil; yan te mach'a mayuc yip yo'tan, itaj nax ya swe'. 3Te mach'a ya swe' spisil, ma me sp'aj te mach'a ma ba ya swe'e. Ha nix hich te mach'a ma ba ya swe' spisil, ma me xyich'o-c'optay te mach'a ya swe' spisil, como ic'bil yu'un Dios. 4¿Mach'a yac acuy aba a te yac awalbe smul te ya'bat te yane? Ha chican stuquel te yajwal teme lec ya yil o teme ma lecuc ya yil te ya'bate. Lec ya xc'oht, como ay yu'el te Cajwaltic te ya yac' te lec ya xc'oht yu'une. 5Ay mach'a ay sc'oblal te jun c'ahc'al yu'un te yantic c'ahc'aletic; ay mach'a te pajal sc'oblal ta yo'tan spisil te c'ahc'aleletique. Ya sc'an te jujutuhl mero hich yo'tan te bin snopoje. 6Te mach'a ya yich' ta cuenta te jun c'ahc'al, ha ya spas ta scuenta te Cajwaltic, soc te mach'a mayuc ta cuenta yu'un te c'ahc'al, ha ya spas ta scuenta te Cajwaltique. Te mach'a ya swe', ta scuenta Cajwaltic ya swe', como ya yalbe wocol Dios yu'un; soc te mach'a ma swe', ta scuenta Cajwaltic ma ba ya swe', soc ha nix hich ya yalbe wocol Dios yu'un. 7Ma jtuquel-o'tanticuc te cuxulotic, soc ma jtuquel-o'tanticuc te ya xchamotique. 8Teme cuxulotic, ha ta scuenta Cajwaltic te cuxulotic; teme ya xchamotic, ha ta scuenta Cajwaltic te ya xchamotique. Ha yu'un teme cuxulotic o teme ya xchamotic, ha yu'unotic te Cajwaltique. 9Como ha cham Cristo soc cha'cuxaj tal scuenta yu'un ha Ajwalil ya xc'oht yu'un te mach'atic chamenic soc te mach'atic cuxulique. 10Pero te ha'ate ¿bin yu'un yac awalbe smul te awermano? Ha nix hichat, ¿bin yu'un yac ap'aj te awermano? como jpisiltic ya xc'ohotic ta ich'el ta c'op ta stojol te chapajibal yu'un Cristo. 11Yu'un hich ts'ihbabil: Ho'on cuxulon, xchi te Cajwaltic, spisilic me ya squejan sbahic ta jtojol; soc spisil ehal ya me yalic ta jamal te ho'on Dioson, xchi. 12Ha yu'un jujutuhlotic ya xc'oht cac'tic cuenta ta stojol Dios. 13Ha yu'un ma me talel c'axeluc ya jlehbe jba jmultic, ha lec ac'a jnoptic bin ut'il ma ba ya ca'betic sc'ohchinojibal o te bin ya xyahlic yu'un te quermanotique. 14Jna'oj soc hich ay ta co'tan ta scuenta te Cajwaltic Jesús, te mayuc bin bohloben sc'oblal; pero te mach'a ya scuy te bohloben sc'oblale, yu'un nix bohloben sc'oblal ta stojol abi. 15Teme ta scaj we'elil te ya smel yo'tan te awermano, yu'un nix ma ba ayat ta spasel te bin ya sc'an te sc'uxul-o'tanile. Ma me ha'uc ta scuenta te bin yac awe' te yac awac' ch'ayuc te mach'a cham Cristo yu'une. 16Ma me xawac' te chopol ya xhalot sc'oblal yu'un te bin lec te yac awalic, 17como te cuentahinel yu'un Dios ma ha'uc we'el uch'el, ha te bin toj ta pasel, lamal q'uinal soc tse'el-o'tanil ta scuenta te Ch'ul Espíritu, 18como te mach'a hich ya yac' sba ta a'batinel yu'un Cristo, lec yo'tan Dios yu'un soc lec sc'oblal yu'un ants-winiquetic. 19Ha yu'un ya me jt'untic bin ut'il ya xlahmaj q'uinal yu'un soc te talel c'axel ya quich'tic quiptic a. 20Ma me xajimbe te ya'tel Dios ta scaj we'elil. Spisil bintic ay, lec sc'oblal, pero ma lecuc teme ay mach'a ya ya'be sc'ohchin sba yantic ta scuenta te bin ya swe'e. 21Ha lec te ma ba ya swe' ti'bal o te ma ba ya yuch' vino, o biluc a te ya yac' sc'ohchin sba te awermano. 22Te bin ach'uhunej, ch'uhuna atuquel ta stojol Dios. Ha bayel yutsil te mach'a ya sna' te ma teyuc ya sta smul a te bin lec ya ya'iy ya spase. 23Yan te mach'a ya swe' aunque ya sna' te ma lecuc te hich ya spas, tey ya sta smul a, como ma ba ya spas soc sch'uhunel yo'tan; soc spisil te bintic ma ba talem ta scuenta sch'uhunel-o'tanil, ha mulil abi.


Copyright
Learn More

will be added

X\