Romanos 12

1Ha yu'un, quermanotac, ya calbeyex wocol ta scuenta te sc'uxul yo'tan Dios te yacuc awac' abaq'uetalic scuenta cuxul chic'bil mahtanil, te ch'ultesbil soc te lec yo'tan Dios yu'un, te hich ya sc'an ch'uhuntayel awu'unic te Diose. 2Ma me xapajbeyic stalel te bahlumilal, yanuc awilelic ta scuenta yach'ubtesel te snopojibal awu'unic, scuenta yu'un hich yac ana'ic a te bin ya sc'an yo'tan te Dios, te ha ay yutsil soc te c'ax leque. 3Ta scuenta te bin a'bilon yu'un Dios, ya calbeyex ta apisilic te ma me c'ax hich muc' yac acuy abahic a te bin ut'il ya sc'ane, yich'ojuc me scuentahil te yac ap'is abahic, ha chican hich smuc'ul sch'uhunel awo'tan a'botex yu'un Dios ta jujutuhlex. 4Hich te bin ut'il ay bayel ta chahp te ay ta jbaq'uetaltic, pero ma junuc nax ya'telic ta spisilic, 5ha nix hichotic, aunque tsobolotic, junax jbaq'uetaltic ta scuenta Cristo, junax c'ohemotic. 6Ha yu'un ay chahpalchahp mahtaniletic cu'untic, ha chican bin a'bibilotic yu'un Dios: te mach'a ha smahtan yalel sc'op-jalwanej, pasa chican hich smuc'ul sch'uhunel yo'tan; 7teme a'batinel, ac'a yac' sba ta a'batinel; te mach'a ya xp'ijubteswan, ac'a ya'iy p'ijubteswanej; 8te mach'a ya yac' yip-o'tanil, ac'a yac' yip o'tanil; te mach'a ya xmahtanteswan, junuc me yo'tan ac'a yac'; te mach'a ya xtsobawan, spisiluc me yo'tan ac'a spas; te mach'a ya ya'iy c'uxultaywanej, tse'eluc me yo'tan ac'a spas. 9Ma me babac'opuc te sc'uxul awo'tanic. Ihlayahic te bin chopol, t'una me te bin leque. 10Talel c'axel c'ux me xawa'iy abahic te bin ut'il awermano abahic; talel c'axel me xawich' abahic ta muc'. 11O'tantaya spasel te bin ya sc'an pasel, ma me xch'ajubex; ayuc yip awo'tanic ta a'batinel ta stojol te Cajwaltique. 12Tse'eluc awo'tanic ta smahliyel, cuhchuc me awu'unic wocol, ma me xquehchajex ta sc'oponel Dios. 13A'beyahic bin ya xtuhun yu'un te mach'atic ch'uhltesbilic; ic'ahic ochel ta ana te mach'atic yan banti talemic. 14Halbeyahic lec sc'oblal te mach'atic ya yuts'inex; halbeyahic lec sc'oblal, ma me xabohlobtesbeyic sc'oblal. 15Tse'eluc me awo'tanic soc te mach'atic tse'el yo'tanic; oc'anic me soc te mach'atic ya x'oq'uic. 16Junuc me awo'tan abahic. Ma me xatoy abahic, joquinahic te mach'atic peq'uel ayique. Ma me p'ijuc xacuy abahic. 17Ma me xasutbeyic ta bin chopol te mach'a chopol bin ya spasbeyex; pasahic te bin lec ta stojol spisil ants-winiquetic. 18Ta ban c'alal ya xhu' awu'unic, lamaluc me awo'tanic soc spisil ants-winiquetic. 19Quermanotac te c'uxex ta co'tan, ma me xapac ac'abalic, ac'a a'tejuc te yilimba Dios, como hich ts'ihbabil: Ho'on cu'un suhtesbeyel spacol; ho'on ya ca'be stoj, xchi te Cajwaltique. 20Ha yu'un teme ay swi'nal te acontra, a'beya swe'el; teme taquin yo'tan, a'beya bin ya yuch', como teme hich yac apase, sjel ta yac abusambe c'ahc'al ac'al ta sjol. 21Ma me xawac' stsalat te bin chopol, ha'at me xatsal ta bin lec te bin ma lecuque.


Copyright
Learn More

will be added

X\