Romanos 11

1Ha yu'un ya cal: ¿Yu'un bal Dios jc'axel la sch'ay hilel te pueblo tsahbil yu'un? xchihon. ¡Ban c'an hichuc! Melel te ho'one israel-winicon, sts'umbalon Abraham, talemon ta jchahp yu'un Benjamín. 2Te Dios ma ba jc'axel sch'ayoj hilel te pueblo yu'un te nahil la sna'be sba. ¿Yu'un bal ma ba ana'ojic bin xchi sc'oblal te Elías ta Shun Dios, te c'alal la sc'opon Dios ta scontrahinel te Israel, te hich la yal: 3Cajwal, la smiliquix te jalwanejetic awu'un soc la sjinticlaniquix te scajtajib ta chiq'uel mahtanil awu'un; jtuquel xanix hilemon, soc ya sc'an ya smilonic, te xchihe? 4Pero ¿bin sutbot sc'op yu'un te Diose?: Ay lajunwinic swaxaclajunbahc' (7,000) ta tuhl winiquetic q'uejbil cu'un te ma ba squejanej sbahic ta stojol Baal, xchi. 5Ha nix hich ta ora ini, ay stsahbenal te stsahbilic ta scuenta yutsil-o'tanil. 6Teme ta scuenta yutsil-o'tanil, yu'un nix ma ta scuentahuc ya'telic a; te ha'uc ta scuenta ya'telic, ma ha'uquix yutsil-o'tanil te yutsil-o'tanile. 7¿Bin ut'il ay a hiche? Te bin yac slehbel te Israel ma ba la stahic, pero te mach'atic tsahbilic yu'un Dios la stahic stuquelic, pero te yantique, tonob yo'tanic, 8hich te bin ut'il ts'ihbabil: Dios la yac' potsobuc yo'tanic, la ya'be sitic te ma ba ya yilic q'uinal a, soc schiquinic te ma ba ya ya'iyic q'uinal a, c'alal ora yo'tic, xchi. 9Soc hich ya yal te David: Ac'a sutp'ijuc ta syacolic soc ta stsacojibal te sq'uinique, ha sc'ohchinojibal soc castigo ac'a c'ohtuc yu'unic. 10Ac'a mahcuc sitic scuenta yu'un ma ba ya yilic q'uinal, soc ac'a c'ujajuc spatic spisil ora, xchi sc'oblalic. 11Ha yu'un ya cal: ¿Yu'un bal la sc'ohchin sbahic te Israel te hich jc'axel yahlic bahel? ¡Ban c'an hichuc! Pero ta scuenta te c'axun-c'op yu'unic te tal colel ta stojol te jyanlumetic, scuenta yu'un ya xhahchbot yo'tanic a te Israel. 12Teme ta scuenta te c'axun-c'op yu'unic te c'uhlejub te bahlumilal, soc te bin ut'il la yihquitay sbahic te hich chicnaj sc'uhlejal te jyanlumetic, c'ax to xan hich ay c'uhlejalil ya xc'oht a te c'alal ts'acal ya x'ochic tal. 13Ha ya jc'oponex ha'ex jyanlumex. Te bin ut'il ho'on jpuc-c'opon yu'un te jyanlumetic, ha yu'un bayel sc'oblal ta co'tan te ca'tel, 14scuenta yu'un ayuc bin ut'il ya cac' hahchuc yo'tanic te mach'atic jun jts'umbal soc, te hich ayuc mach'atic ya xcolic a, 15como teme ta scuenta te ihquitaybilic hilel te hich junax yo'tanic soc Dios c'oht te bahlumilal, ¿bin yilel ya xc'oht te c'alal ya xcha'ic'otic xan te Israel? ha me cuxlejal ya xc'oht ta yohlil mach'atic chamenic. 16Teme ch'ultesbil te sba-sit, ha nix hich ch'ultesbil te jayeb xan aye; soc teme ch'ultesbil te slohp', ha nix hich ch'ultesbil te sc'abc'abe. 17Teme ay sc'abc'ab te jepbot loq'uel, soc ha'at ha'mal olivohat la awich' ts'aquel te banti jepen soc yac yich'bel te yutsilal te slohp' olivo, 18ha yu'un ma me xatoy aba ta stojol te sc'abc'abe; yan teme yac atoy aba, na'a me te ma ha'ucat yac awa'be swe'el te slohp', ha ya ya'bat awe'el stuquel. 19Hich wan yac awal: Pues la yich' jepel loq'uel te sc'abc'ab scuenta yu'un ho'on la jquich' ts'aquel a, xchihat. 20Hich nix a; jepbotic loq'uel ta scaj te ma ba la sch'uhunic; yan te ha'ate ta scuenta sch'uhunel awo'tan te teq'uelate. Ma me xatoy abahic, xiwuc me awo'tanic, 21como teme Dios ma ba la spasbe perdón te mero sc'abc'ab, ha nix hich ma ba ya spasbat perdón te ha'ate. 22Ha yu'un, ilawil te lec yo'tan soc te tulan yo'tan te Diose: ha te tulan yo'tan ta stojol te mach'atic yahlic, pero lec yo'tan ta atojol, teme tey ya xhilat a ta banti ay te lec-o'tanile; te manchuque, ha nix hich ya me awich' set'el loq'uel. 23Ha nix hich te Israel, teme ma ba stalel te mayuc sch'uhunel yo'tanic, ya me yich'ic xan ts'aquel, como ay yu'el te Dios yu'un ya scha'tsac xan. 24Como teme ha'at te ha'mal olivohat la awich' set'el loq'uel soc la awich' ts'aquel ta lequil olivo, te ma hichuc ay ta pasele, ¿ha'uc to balix a te mach'atic mero sc'ab te olivo, te ya yich'ic xan ts'aquel te banti nix loq'uesbilique? 25Quermanotac, ma jc'an te ma ba yac ana'ic bin ut'il ay ini te bin mayuc ta na'el ta namey, scuenta yu'un ma ba yac acuy abahic ta p'ij: Ta Israel ay banti tonob yo'tanic ha to c'alal ts'acay ochel te jyanlumetique. 26Hich ya xcol spisil Israel, hich te bin ut'il ts'ihbabil: Ta Sión ya xhahch tal te Mach'a ya x'ac'awan ta libre; ya me sloq'ues ta stojol Jacob te mayuc sch'uhunel yo'tanic ta stojol Dios. 27Ha ini te c'op te ya jchahp soc te bin ora ya jloq'uesbe te smulique, te xchihe. 28Ha yu'un scontrahinejic te lec yach'il c'op ta acajic; pero ta scuenta tsahel, c'uxultaybilic ta scaj te antiguo tatiletique, 29como ma xhu' ta lajimbeyel sc'oblal te mahtaniletic soc te iq'uel yu'un Dios. 30Hich te bin ut'il ma ba la ach'uhumbeyic smandar Dios ta nahil to, pero ta ora ini la awich'iquix c'uxultayel ta scuenta te ma ba ya sch'uhumbeyic smandar Dios te israeletic, 31ha nix hich yo'tic ma ba yac sch'uhumbeliquix mandar scuenta yu'un ha nix hich ya me yich'ic c'uxultayel, hich te bin ut'il awich'ojic c'uxultayel te ha'exe. 32Como Dios la yac' te chucul c'oht spisilic yu'un sc'axuntayel mandar, scuenta yu'un ya sc'uxultay ta spisilic. 33¡C'ax c'ubul ay te yutsil sp'ijil soc te bin ay ta na'el yu'un Dios! ¡Ma xhu' ta na'el te chahpanel yu'un soc ma xhu' ta na'el te behetic yu'une! 34¿Mach'a sna'oj te bin snopoj te Cajwaltique? o ¿mach'a a te j'ac'-o'tanil yu'un? 35¿Mach'a a te nahil ay bin la ya'be te Dios scuenta yu'un ya x'a'bot stojol yu'un? 36como spisil talem ta stojol, soc ha cuxul ta scuenta, soc ha nix yu'un Dios spisil bintic ay. Ay ta halbeyel yutsil sc'oblal sbahtel q'uinal stuquel. Hichuc.


Copyright
Learn More

will be added

X\