Apocalipsis 9

1Te yo'ebal ch'ul a'bat la yoq'uesin te scorneta; la jquil ay ec' ch'ay cohel tal ta ch'ulchan, hul ta bahlumilal. A'bot te llave yu'un te xahabe. 2La sjam te xahab, xtomet loq'uel bayel ch'ahil tey a hich te bin ut'il sch'ahilel muc'ul horno. Ihc'ub te c'ahc'al soc ic' yu'un te ch'ahil yac ta loq'uel tal ta xahab. 3Loc' c'ulubetic ta ch'ahil, c'ohtic ta q'uinal, a'bot yipic hich te bin ut'il yipic te tsec ayic ta q'uinal. 4Pasotic ta mandar te ma me xyuts'inic te aquiltic, te yaxal ha'maletic soc te'etic ta q'uinal, ha nax te mach'atic ma ba yich'ojic te sello yu'un Dios ta sti'bahic. 5Ma ba a'bot te ya smilic, ha a'bot te ya ya'beyic swocolic ho'eb u; hich sc'uxul te swocolic te bin ut'il ya xti'awan tsec. 6Ta hich ora te ants-winiquetic ya me sle slajibic, pero ma ba ya xweht yu'unic. Yo'tanuc ya xchamic, pero ya x'ahn ta stojolic te lajele. 7Te c'ulubetic hich yilelic te bin ut'il cawuhetic chahpambilic ta guerra. Te bin ay ta sjolic, sjel ta corona pasbil ta oro, soc sjel ta sit yelaw winic te sit yelawique. 8Te stsotsel sjolic sjel ta stsotsel sjol ants, soc sjel ta sbaquel ye choj te sbaquel yehique. 9Ay smahquil stahnic pasbil ta taq'uin yilel, soc xnililet xiq'uic hich te bin ut'il xnililet ya xbehen bayel carretahetic nitbilic ta cawu te ahnimal ya xbahtic ta guerra. 10Ay snehic hich te bin ut'il sne tsec te ya xti'awanic. Ta snehic ya xhu' yu'unic yuts'inel te ants-winiquetic ho'eb u. 11Ha yajawic te jcanan-xahab, Abadón sbihil ta hebreo, Apolión sbihil ta griego. 12Tey laj a te jcaj wocol; ay cha'caj xan te ya xtale. 13Te swaquebal ch'ul a'bat la yoq'uesin te scorneta; la jca'iy ay loc' c'op ta yohlil te chaneb xulubiletic yu'un te scajtajib ta chiq'uel pom pasbil ta oro te ay ta stojol te Diose. 14Hich la yalbe te swaquebal ch'ul a'bat te yich'oj te corneta: Tila te chaneb ch'ul a'batetic chuculic ta sti'il te muc'ul-ha' Éufrates, xchi sc'oblal. 15Hich la yich'ic tilel te chaneb ch'ul a'batetic te chapajtic te bin ora, bin c'ahc'alil, bin uhil, soc bin ha'bilil, scuenta yu'un ya smilic jun ta yoxchahpal te ants-winiquetique. 16La jca'iy jaytuhl te soldadohetic te cajajtic ta cawu, ha lajunwinic millón (200,000,000) ta tuhl. 17La jquil ta jnahalsit cawuhetic soc te mach'atic cajajtic tey a, ay smahquil stahnic te tsaj hich te bin ut'il c'ahc', te yax-el'el soc c'an hich te bin ut'il azufre. Te sjol te cawuhetic sjel ta sjol choj, soc yac ta loq'uel c'ahc' ta yehic soc ch'ahil soc azufre. 18Jun ta yoxchahpal te ants-winiquetic lajic yu'un te oxchahp wocol: ha te c'ahc', te ch'ahil soc te azufre yac ta loq'uel ta yehic; 19te yip te cawuhetic ay ta yehic soc ta snehic; como te snehic, te hich yilelic te bin ut'il chan, ay sjolic te ya x'uts'inwanic a. 20Te jayeb xan mach'atic ma ba lajic yu'un te wocoletic ini, ma teyuc la suhtes yo'tanic yu'un a te bin spasoj ta sc'abic, soc ma ba la yihquitayic sch'uhunel te pucujetic soc te yahcananic pasticlambil ta oro, plata, bronce, ton, soc te', te ma xyilic q'uinal, ma xya'iyic c'op soc ma xbehenic. 21Ma ba la suhtes yo'tanic yu'un smilawic, yilojelic, schijil-o'tanic soc yeleq'uic.


Copyright
Learn More

will be added

X\