Apocalipsis 7

1Patil la jquil chaneb ch'ul a'batetic tec'ajtic ta schanxuhcul bahlumilal, scomojic te chaneb ic' te ya xbehenic ta bahlumilal scuenta yu'un ma ba ya xbehen ic' ta q'uinal, ta mar o ta te'etic. 2Soc la jquil yan ch'ul a'bat te mo tal ta banti ya xloc' tal c'ahc'al, yich'oj te sello yu'un te cuxul Dios. Tulan la yawtay te chaneb ch'ul a'batetic te yich'oj ya'telic ta sjinel te q'uinal soc te mar, 3hich la yal: Ma to me xajinic te q'uinal, te mar o te te'etic ha to teme la jcac'ticlambecotic sello ta sti'bahic te a'batetic yu'un te Dios cu'untique, xchi. 4La jca'iy jaytuhlic te ac'ticlambot yich'ic sello: ha waxaclajunpic (144,000) ta tuhl yu'un spisil ta chahp te yal-snich'nab Israel. 5Ta jchahp sts'umbal Judá j'ohlil scha'pic (12,000) ta tuhl, ta jchahp sts'umbal Rubén j'ohlil scha'pic (12,000) ta tuhl, ta jchahp sts'umbal Gad j'ohlil scha'pic (12,000) ta tuhl, 6ta jchahp sts'umbal Aser j'ohlil scha'pic (12,000) ta tuhl, ta jchahp sts'umbal Neftalí j'ohlil scha'pic (12,000) ta tuhl, ta jchahp sts'umbal Manasés j'ohlil scha'pic (12,000) ta tuhl, 7ta jchahp sts'umbal Simeón j'ohlil scha'pic (12,000) ta tuhl, ta jchahp sts'umbal Leví j'ohlil scha'pic (12,000) ta tuhl, ta jchahp sts'umbal Isacar j'ohlil scha'pic (12,000) ta tuhl, 8ta jchahp sts'umbal Zabulón j'ohlil scha'pic (12,000) ta tuhl, ta jchahp sts'umbal José j'ohlil scha'pic (12,000) ta tuhl, soc ta jchahp sts'umbal Benjamín j'ohlil scha'pic (12,000) ta tuhl ac'ticlambot sellohilic. 9Patil la jquil c'ax tsobolic, mayuc mach'a ya xhu' ya yahtay, talemic ta spisil ta chahp nacionetic, ts'umbaliletic, pueblohetic soc c'opiletic; tec'ajtic ta stojol te muc'ul-huctajibal soc ta stojol te Jcolel Tuminchij, slapojic sac sc'u' spaq'uic soc stuchticlanejic xahn ta sc'abic. 10Tulan hich yacalic ta c'op: Ay colel ta scuenta te Dios cu'untic te hucul ta muc'ul-huctajibal, soc ta scuenta te Jcolel Tuminchij, xchihic. 11Spisil te ch'ul a'batetic, te mamaletic soc te chaneb bintic cuxajtic sjoytayejic ta tec'lej te muc'ul huctajibal, la spahcan sbahic ta stojol te muc'ul-huctajibal soc la sch'uhuntayic te Diose, 12hich yacalic ta yalel: ¡Hichuc! Ac'a yich' halbeyel yutsil sc'oblal, ac'a yich' yutsilal, p'ijil-o'tanil, halbeyel wocol, yich'el ta muc', yu'el soc yip te Dios cu'untic ta scuenta sbahtel q'uinal. ¡Hichuc! xchihic. 13Ay jtuhl te mamaletic la sjoc'obon: ¿Mach'atic a ini te sac sc'u' spac' slapojic soc banti talemic? xchi. 14La jcalbe: Tatil, ha'at yac ana', la jcut. Hich la yalbon: Ha'ic ini te c'axem yu'unic te tulan uts'inel; sac'ojiquix sc'u' spaq'uic, ha la sacubtesic te ta sch'ich'el te Jcolel Tuminchij. 15Ha yu'un te ayiquix ta stojol te smuc'ul-huctajib te Dios soc c'ahc'al ahc'abal ayic ta a'batinel ta templo yu'un. Te Mach'a hucul ta muc'ul huctajibal ya me smuc'ubtes te snahilpac' ta stojolic. 16Ma ba ya xwi'najiquix soc ma ba ya ya'iyiquix taquinti'il, ma ba ya ya'iyiquix sc'uxul c'ahc'al, o yan sq'uixnal, 17como te Jcolel Tuminchij te ay ta yohlil te muc'ul-huctajibal ha ya scanantay soc ya me stojobteslan bahel ta banti ay sloq'uib ha'etic scuenta cuxlejal. Soc ya me xcusticlambot ya'lel sitic yu'un te Diose, xchi.


Copyright
Learn More

will be added

X\