Apocalipsis 6

1La jquil te Jcolel Tuminchij la sjam jun sello, soc la jca'iy te jun ta schanebal te bintic cuxajtic te c'opoj hich te bin ut'il chahwuc: La', xchi. 2Hich la jquil ay jcoht saquil cawu. Te mach'a cajal tey a yich'oj st'ihmalte' soc a'bot scorona, ha jtsalawal te loc' bahel ta ya'iyel tsalaw. 3C'alal la sjam te schebal sello, la jca'iy te hich la yal te schebal bintic cuxajtic: La', xchi. 4Hich loc' tal jcoht tsajal cawu. Te mach'a cajal tey a a'bot yip ta sjinel te lamal q'uinal ta bahlumilal soc te talel c'axel ya smil sbahic te ants-winiquetic. Soc a'bot yich' muc'ul espada. 5C'alal la sjam te yoxebal sello, la jca'iy te hich la yal te yoxebal bintic cuxajtic: La', xchi. La jquil ay jcoht ihc'al cawu. Te mach'a cajal tey a ay ta sc'ab sp'isojbil yalal. 6La jca'iy ay mach'a c'opoj ta yohlil te chaneb bintic cuxajtic, te hich la yal: Jun denario stojol te jun litro trigo, soc jun denario stojol te oxeb litro cebada, pero ma me xawixtalan te aceite soc te vino, xchi. 7C'alal la sjam te schanebal sello, la jca'iy te hich la yal te schanebal bintic cuxajtic: La', xchi. 8Hich la jquil ay jcoht c'anal cawu. Te mach'a cajal tey a, Lajel te sbihile, ha t'umbil yu'un te Yawil mach'atic chamenic. A'bot ta scuenta jun ta schanxeht'el te bahlumilal yu'un ya smil ta espada, ta wi'nal, ta tulan chamel soc ta ti'awal chambahlametic. 9C'alal la sjam te yo'ebal sello, la jquil ayic ta ye'tal te scajtajib ta chiq'uel mahtanil te sch'uhlelic mach'atic la yich'ic milel ta scuenta te sc'op Dios soc te testigo-c'op la yalique. 10Tulan hich yac yalbelic: Cajwal te toj awo'tan soc te smelelil te ac'ope, ¿bin to ora te yac awich' ta c'op soc te yac awa'be stoj te mach'atic ayic ta bahlumilal te la smal jch'ich'elcotic? xchihic. 11Hich ac'ticlambot slapic saquil pac' soc halbotic te ya me smahliyic jtebuc xan, ha to teme ts'acay spisil te smohloltac soc te yermanotac te ya to xlajic ta milel hich te bin ut'il lajic ta milele. 12La jquil c'alal la sjam te swaquebal sello, tal tulan nihquel. Ihc'ub te c'ahc'al hich te bin ut'il ihc'al ch'ixal pac', tsajub te u hich te bin ut'il ch'ich', 13soc te eq'uetic ta ch'ulchan luhbajic cohel tal ta bahlumilal hich te bin ut'il ya xluhbaj sit higuera teme yuc'ot yu'un tulan ic'. 14Te ch'ulchan ch'ay bahel hich te bin ut'il ya yich' balel hun, soc jeltaybot yawilic spisil witsiltic soc te q'uinaletic joytaybilic ta ha'. 15Te ajwaliletic te ayic ta bahlumilal, te mach'atic tulan ya'telic, te capitán soldadohetic, jc'uhlejetic, te mach'atic ich'bilic ta muc', spisil te mosohetic soc te mach'atic ayic ta libre, la snac' sbahic ta ch'entiquil soc ta sc'uhb tontiquil ta witsiltic, 16hich la yawtayic te witsiltic soc te ch'entiquil: La', mucawotcotic, nac'awotcotic ta sit te mach'a hucul ta muc'ul-huctajibal, soc ta stojol te yilimba te Jcolel Tuminchij, 17como c'ohtix sc'ahc'alel te tulan yilimba, ¿mach'a c'an hu'uc yu'un stehc'ambel sba? xchihic ta aw.


Copyrighted Material
Learn More

will be added

X\