Apocalipsis 22

1Patil te ch'ul a'bat la ya'bon quil te muc'ul-ha' scuenta cuxlejal, xleblon sjahts' hich te bin ut'il cristal, te yac ta loq'uel tal ta stojol te smuc'ul-huctajib Dios soc ta stojol te Jcolel Tuminchij, 2yac ta behel ta yohlil te calle ta muc'ul pueblo. Ta jujujehch sti'il te muc'ul-ha' ay te te' scuenta cuxlejal, te lahchayeb buelta ya sitin ta jun ha'bil, jujun buelta ta jujun u. Te ya'binal te te' ya xtuhun yu'un slecubtesel te nacionetique. 3Mayuquix tey a te bin chopol sc'oblale. Tey ay a te smuc'ul-huctajib te Dios soc te Jcolel Tuminchij, soc te a'batetic ayic ta a'batinel yu'un, 4ya me yilbeyic sit yelaw, soc ay ta sti'bahic te sbihile. 5Mayuquix ahc'abal; ma xtuhun yu'unic tsumbil c'ahc' o te sc'ahc'alel te c'ahc'al, como te Cajwaltic Dios ya me sacubtes q'uinal ta stojolic, soc ya me ya'iyic cuentahinwanej ta sbahtel q'uinal. 6Hich la yalbon te ch'ul a'bat: Melel ha'i c'op ini soc ay ta ich'el ta cuenta. Te Cajwaltic, te Dios yu'un te espírituhetic yu'un te jalwanejetic, sticonej tal te ch'ul a'bat yu'un scuenta yu'un ya ya'be yilic te a'batetic yu'un te bintic nopol ya xc'oht ta pasel, xchi. 7¡Ilawil, nopol ya xtalon! Bayel me yutsil te mach'a ya scanantay te sc'op-jalwanej te ay ta libro ini, xchi te Jesús. 8Ho'on Juanon te la jca'iy soc te la jquil spisil ini. Laj nax ca'iybel a soc laj nax quilbel a, la jpahcan jba ta ye'tal yoc ta sch'uhuntayel te ch'ul a'bat te la ya'bon quil ini. 9Pero la yalbon: ¡Ma hichuc xapas! Pajal ayotic ta a'batinel soc te awermanotac te jalwanejetic soc te mach'atic ya scanantayic te c'op te ay ta libro ini. ¡Ha me xach'uhuntay te Diose! xchi. 10Soc la yalbon xan: Ma me xamac te sc'op-jalwanej te ay ta libro ini, como nopolix yorahil. 11Te mach'a ma tojuc, ac'a spas xan te bin ma tojuque; te mach'a bohloben, bohloben ac'a hiluc; te mach'a toj yo'tan, ac'a spas xan te bin toj ta pasel; soc te mach'a ch'ultesbil, ch'ultesbil ac'a hiluc. 12Hich la yal te Jesús: ¡Nopol ya xtalon! Soc quich'oj ya xtal te stojol sc'abic, ya ca'be stojol ta jtuhlutuhl ha chican bin spasoj. 13Ho'on te Alfa soc Omega, te shahchibal soc te slajibal, te shahchibal ayon soc slajibal ayon. 14Bayel me yutsilic te mach'atic ya sac' sc'u' spaq'uic, scuenta yu'un hich ya xhu' ya slo'beyic sit a te te' scuenta cuxlejal soc hich ya xhu' ya x'och bahel ta ti'ts'ahc yu'un te muc'ul pueblo. 15Yan te ts'i'etic, te j'ilojeletic, j'antsiwejetic, j'antsineletic, jmilawetic, te mach'atic sch'uhunejic loc'ombahetic soc spisil mach'atic te ya smulanic te ya ya'iyic lot, ya me xhilic ta pat ts'ahc stuquelic. 16Ho'on Jesuson, jticonej tal te ch'ul a'bat cu'un scuenta yu'un ya yalbe te iglesiahetic ha'i testigo-c'op ini. Ho'on slohp'on soc sts'umbalon David, ho'on te jsacubel ec', xchi. 17Te Espíritu soc te Jnuhpunel Ach'ix ya yalic: La' me, xchihic. Te mach'a ya ya'iybe sc'op, hich ac'a yal: La' me, xchihuc. Ac'a taluc te mach'a taquin yo'tan. Mach'ayuc a te ya sc'an, smahtan ac'a yuch' te ha' scuenta cuxlejal. 18Spisil mach'atic ya ya'iybeyic te sc'op-jalwanej ta libro ini, ya ca'be sna' ini: Teme ay mach'a ya ya'be sobra, Dios me ya x'a'bot yu'un te jaychahp wocol te ts'ihbabil ta libro ini. 19Soc teme ay mach'a ay bin ya sloq'ues ta bin ts'ihbabil ta libro yu'un te sc'op-jalwanej ini, ha nix hich ya xloq'uesot yu'un Dios, ma ba ya x'a'bot slo'be sit te te' scuenta cuxlejal soc ma ba ya x'och ta muc'ul ch'ul pueblo, te ts'ihbabil sc'oblalic ta libro ini. 20Te mach'a ya yal ha'i testigo-c'op ini, hich ya yal: Melel, nopol ya xtalon, xchi. ¡Hichuc, la', Cajwal Jesús! 21Ac'a sjoquinex apisilic te yutsil yo'tan te Cajwaltic Jesucristo. Hichuc.


Copyright
Learn More

will be added

X\