Apocalipsis 2

1Ts'ihbabeya te ch'ul a'bat yu'un te iglesia te ay ta Éfeso: Hich ya yal te mach'a ay huqueb eq'uetic ta swa'el-c'ab soc te ya xbehen ta yohlil te huqueb yawil c'ahc' pasbil ta oro: 2Ya jna' bin yilel awa'tel, te tulan ayat ta a'tel soc te ya xcuhch awu'un; soc ya jna' te ma xcuhch awu'un te mach'atic chopolic, te atsajoj te mach'atic ya scuy sbahic ta jpuc-c'opetic pero ma ha'uc, soc la atsaquix ta slotic. 3C'axem awocol soc cuhchem awu'un, tulan a'tejemat ta scuenta jbihil, soc ma ba luhbenat. 4Pero ay bin ma ba lec co'tan awu'un: ha te hilix awu'un te sc'uxul awo'tan te ay ta nahil to. 5Na'a te banti yahlemat, suhtesa awo'tan soc pasa te bin nahil la apase. Teme ma ba yac asuhtes awo'tan, ya me xtalon ta ban ayat soc ya me jpojbat te yawil c'ahc' awu'un ta yawil. 6Pero ay bin ay awu'un: ha te yac awihlaybe ya'tel te Nicolaítahetic; ha nix hichon ya quihlay. 7Te mach'a ay schiquin, ac'a me ya'iy te bin ya xhalbot yu'un te Espíritu te iglesiahetique. Te mach'a ya ya'iy tsalaw, ya ca'be slo'be sit te te' scuenta cuxlejal te ay ta yutsil ts'unubil q'uinal yu'un Dios, xchi. 8Ts'ihbabeya te ch'ul a'bat yu'un te iglesia ta Esmirna: Hich ya yal te Mach'a ha shahchibal soc slajibal, te laj soc te cha'cuxaj tal: 9Ya jna' bin yilel awa'tel, ya jna' te awocol, soc te pobre ayat (aunque c'uhlejat); ya jna' bin ut'il ayat ta labanel yu'un te mach'atic judíohetic ta sc'opic pero ma ha'uquic, ha sinagoga yu'un Satanás. 10Ma me xiwat yu'un teme ya xc'ax awocol. Ay me ya yotsesex ta cárcel te pucuj scuenta atsajelic; lajuneb c'ahc'al ya me xc'ax awocolic. Junuc me awo'tan ha to c'alal ya xlajat, ya me ca'bat te corona scuenta cuxlejal. 11Te mach'a ay schiquin, ac'a me ya'iy te bin ya xhalbot yu'un te Espíritu te iglesiahetique. Te mach'a ya ya'iy tsalaw, ma ba ya ya'iybe sc'uxul te schebal buelta lajel, xchi. 12Ts'ihbabeya te ch'ul a'bat yu'un te iglesia ta Pérgamo: Hich ya yal te mach'a yich'oj te espada te scha'bunjehchel ay ye: 13Ya jna' banti nahinemat, ta banti ay te shuctajib te Satanás. Pero stalel jun awo'tan ta jtojol, ma ba amucoj ta awo'tan te ach'uhunejon, ni ha'uc te c'alal laj ta awohlilic te Antipas te testigo cu'un te jun yo'tan ta jtojol, tey ta banti nahinem te Satanás. 14Pero ay bintic ma lecuc co'tan awu'un: ay mach'atic sch'uhunejic te bin la yac' ta nopel Balaam, te la ya'be snop te Balac bin ut'il ya yac' c'ohchinojibal ta stojol te israeletic, ha te ya swe'ic te bin a'bibil ta milbil mahtanil ta stojol lotil diosetic soc te ya ya'iyic antsiwej. 15Soc ha nix hich ay mach'atic ay ta awohlilic te sch'uhunejic te bin ya yaq'uic ta nopel te Nicolaítahetic. 16Ha yu'un, suhtesa awo'tan, teme ma'uque, ya xtalon ta ora ta banti ayat, ya ca'be guerra ta espada te ya xloc' ta que. 17Te mach'a ay schiquin, ac'a me ya'iy te bin ya xhalbot yu'un te Espíritu te iglesiahetique. Te mach'a ya ya'iy tsalaw, ya ca'be swe' te maná nac'bil, soc ya ca'be tut saquil ton te ts'ihbabil tey a te yach'il sbihil te mayuc mach'a ya sna', ha nax ya sna' stuquel te mach'a ya yich'e, xchi. 18Ts'ihbabeya te ch'ul a'bat yu'un te iglesia ta Tiatira: Hich ya yal te Snich'an Dios, te sjel ta yat c'ahc' te sit soc hich yilel yoc te bin ut'il xlipet huxbil bronce: 19Ya jna' bin yilel awa'tel, te sc'uxul awo'tan, sch'uhunel awo'tan, te yac awac' aba ta a'batinel, te slamalil awo'tan, soc te c'ax hich awa'tel a te bin ut'il ta shahchibal. 20Pero ay bin ma lecuc co'tan awu'un: ha te mayuc bin yac awal yu'un te ants Jezabel, te scuyoj sba ta jalwanej-ants, te ya ya'be snopic soc ya smon te a'batetic cu'un te ya ya'iyic antsiwej soc te ya yac' sbahic ta antsinel, soc te ya swe'ic te we'elil a'bibil ta stojol loc'ombahetic. 21Hal c'ahc'al la jmahliy te ya suhtes yo'tan, pero ma ba ya sc'an ya suhtes yo'tan yu'un te yac yac'bel sba ta antsinel. 22Ha yu'un ya me jch'oj ta swayib, soc ya cac' c'axuc bayel swocolic te mach'atic ya yantsinic, teme ma ba ya suhtes yo'tanic yu'un te bin ya spas te antse. 23Ya cac' lajuc te yalatac, hich spisil te iglesiahetic ya me sna'ic te ho'on ya jtsahtay te snopojibal yu'unic soc te bin ay ta yo'tanic. Ho'on ya ca'beyex jujutuhl ha chican bin yilel te awa'telique. 24Yan te jayeb xan ayex ta Tiatira, te ma hichuc ay snopojibal awu'unic soc ma ba anopbeyejic te bin muquen ay yu'un te Satanás te ya yalic, hich ya calbeyex: Mayuc yan ihcatsil ya ca'beyex acuchic; 25pero te bin ay awu'unic ich'ahic ha to c'alal ya xtalon. 26Te mach'a ya ya'iy tsalaw soc te ya ya'telin spasel te ca'tel c'alal ta slajibal, ya ca'be yich' ya'tel ta stojol te nacionetic; 27ta scuenta te bastón-taq'uin ya me scuentahinlan, soc ya swuyticlan hich te bin ut'il pac'bil oxom, hich te bin ut'il te ca'tel quich'oj yu'un te Jtate. 28Soc ya me ca'be te jsacubel ec'. 29Te mach'a ay schiquin, ac'a me ya'iy te bin ya xhalbot yu'un te Espíritu te iglesiahetique, xchi.


Copyright
Learn More

will be added

X\