Apocalipsis 14

1Patil la jquil teq'uel ta wits Sión te Jcolel Tuminchij, joquimbil yu'un waxaclajunpic (144,000) ta tuhl te ts'ihbalambil ta sti'bahic te sbihil soc te sbihil te State. 2Soc la jca'iy xlamlon c'op ta ch'ulchan hich te bin ut'il ya xc'opoj swihlib ha' soc hich te bin ut'il tulan ya xc'opoj chahwuc. Hich la jca'iy te bin ut'il mach'atic yac stijbelic arpa yu'unic. 3Yac sc'ayojtaybelic yach'il c'ayoj ta stojol te muc'ul-huctajibal soc ta stojol te chaneb bintic cuxajtic soc te mamaletic. Mayuc mach'a ya xhu' yu'un snopel te c'ayoj, ha nax stuquel te waxaclajunpic (144,000) ta tuhl te mambil scolelic ta yohlil te mach'atic ayic ta bahlumilale. 4Ha'ic te ma ba la sbohlobtes sc'oblalic ta scuenta antsetic, yu'un la stsahtay sbahic. Ha'ic te ya st'unic ta bayuc ya xbaht te Jcolel Tuminchij. Mambil scolelic ta yohlil ants-winiquetic scuenta sba sit ya xc'oht ta stojol Dios soc ta stojol te Jcolel Tuminchij. 5Ma sna'ic lot; mayuc yabaquilic. 6La jquil yan ch'ul a'bat yac ta wihlel ta po'tal ch'ulchan, yich'oj te lec yach'il c'op scuenta sbahtel q'uinal yu'un ya yalbe ya'iy mach'atic nahinemic ta bahlumilal, spisil nacionetic, ts'umbaliletic, c'opiletic soc pueblohetic. 7Hich tulan yac ta yalel: Xi'ahic me te Diose soc halbeyahic yutsil sc'oblal, como la stahix yorahil te ya x'ich'awan ta c'op. Ch'uhuntayahic te mach'a la spas te ch'ulchan soc bahlumilal, te mar soc te sloq'uib ha'etic, xchi. 8Tap'al tal ta spat yan ch'ul a'bat te hich la yal: Jihnemix, jihnemix te muc'ul Babilonia, ha te la ya'be yuch'ic spisil nacionetic te vino yu'un te antsinel yu'une, xchi. 9Tap'al tal ta spatic te yoxebal ch'ul a'bat te hich la yal ta tulan: Teme ay mach'a ya sch'uhuntay te chambahlam te xiweltic sba soc te sloc'ombahil, soc te ya yich'be smarca ta sti'ba o ta sc'ab, 10ha nix hich ya me yuch' te vino scuenta yilimba Dios te mayuc scahp a ya xcohcombot ta stasahil te yilimba Dios. Ya x'a'bot swocolic ta c'ahc' soc azufre ta stojol te ch'ul a'batetic soc ta stojol te Jcolel Tuminchij. 11Sbahtel q'uinal xtomomet ya xmo sch'ahilel te swocolique. Ma ba ya scux yo'tanic c'ahc'al ahc'abal te mach'atic ya sch'uhuntayic te chambahlam te xiweltic sba soc te sloc'ombahil, soc te ya yich'be te marca yu'un te sbihile, xchi. 12Ha ya sc'an te ay yip yo'tanic te mach'atic ch'uhltesbilic, ha te mach'atic ya sch'uhunic spasel te smandar Dios soc te jun yo'tanic ta stojol te Jesús. 13La jca'iy ay mach'a c'opoj tal ta ch'ulchan te hich la yalbon: Ts'ihbaya: Bayel me yutsilic te mach'atic ayic ta stojol Cajwaltic a te ya xway sbaq'uetalic li' bahele, xchi. Melel, xchi te Espíritu, ya me scux yo'tanic yu'un te ya'telic, como ya xt'unotic yu'un te ya'telique, xchi. 14Patil la jquil saquil tocal. Ay mach'a hucul ta sba te tocal, sjel ta Snich'an winic, ay corona ta sjol te pasbil ta oro, soc ta sc'ab ay hoz te ay ye. 15Soc ay yan ch'ul a'bat te loc' tal ta templo, tulan la yawtay te mach'a hucul ta sba tocal: Ochan ta a'tel soc te hoz awu'un, boja, como la stahix yorahil sbojel, yu'un yijix te sit te ay ta bahlumilal, xchi. 16Ha yu'un te mach'a hucul ta sba tocal och ta sbojel ta bahlumilal soc te hoz yu'un, hich la yich' bojel te sit ay ta bahlumilal. 17Ay yan ch'ul a'bat loc' tal ta templo ta ch'ulchan, ha nix hich yich'oj hoz te ay ye. 18Soc ay yan ch'ul a'bat te scuentahinej te c'ahc' te loc' tal ta stojol te scajtajib ta chiq'uel mahtanil, tulan la yawtay te mach'a yich'oj hoz te ay ye: Ochan ta sbojel soc te hoz awu'un te ay ye, tsoba te ts'usub ta bahlumilal, yu'un syijilix te ts'usube, xchi. 19Hich te ch'ul a'bat och ta a'tel ta bahlumilal soc te hoz yu'un, la stsob te ts'usubetic soc la sch'oj ochel ta smuc'ul yawil sp'e'ojibal ts'usub yu'un te yilimba Dios. 20La yich' p'e'el ta sp'e'ojibal ts'usub ta spat te muc'ul pueblo, oquin loq'uel tal ch'ich' tey a, tohy mohel c'alal ta freno yu'un te cawuhetic, chanbahc' (1,600) estadiohetic oquin bahel.


Copyright
Learn More

will be added

X\