Filipenses 4

1Ha yu'un, quermanotac te c'uxex ta co'tan soc te ya jna'ulanex spisil ora, te stse'elilex co'tan soc jcoronahex, ayuc me yip awo'tanic ta stojol te Cajwaltic, ha'ex te c'uxex ta co'tane. 2Ya calbe bayel wocol te Evodia soc te Síntique te jun pajaluc yo'tanic ta scuenta te Cajwaltique. 3Ha nix hich ya calbat wocol, ha'at te jmohlol jbahtic te jun awo'tan, te yacuc acoltaybon te cheb antsetic ini, ha'ic te la sjoquinlanonic ta a'tel ta scuenta te lec yach'il c'op, soc nix te Clemente soc te yantic jmohloltac ta a'tel te ay sbihilic ta libro yu'un cuxlejal. 4Spisiluc me ora tse'eluc awo'tanic ta stojol te Cajwaltique. Ya jcha'halbeyex xan: ¡Tse'eluc me awo'tanic! 5Ac'a chicnajuc ta comonsitil te slequil awo'tanique. Nopol ya xtal te Cajwaltique. 6Ma me ayuc bin ya sna'ulan awo'tanic yu'un, pero ta scuenta sc'oponel Dios soc yalel wocol, a'beya sna' Dios spisil te bintic yac ac'ambeyic, soc halbeyahic wocol Dios yu'un. 7Hich te lamal q'uinal te ya yac' te Diose, te c'ax muc' te ma xhu' cu'untic sna'el, ya me scanantaybeyex awo'tanic soc apensaric ta scuenta te Cristo Jesús. 8Ta slajibal, quermanotac, spisil te bin smelelil, te bin lec sc'oblal, te bin stojil, te bin mayuc ya'baquil, te bin t'ujbil, te bin lec sc'oblal; teme ay bin t'ujbil ta pasel, teme ay bin ya xhalbot yutsil sc'oblale, ha me xana'ulanic. 9Te bin la anopic, te la awich'ic, la awa'iyic soc te la awilic ta jtojol, ha me xapasic; ha me ya sjoquinex te Dios yu'un lamal-o'tanil. 10C'ax bayel tse'el co'tan ta scuenta Cajwaltic yu'un te la acha'na'onic xan. La ana'onic, ha nax te ma ba weht awu'unic bin ut'il yac acoltayonic. 11Ma hichuc ya cal yu'un te mayuc bin ay cu'un, yu'un nopbilix cu'un te jun co'tan ya x'ayinon, biluc a te ya xc'oht ta jtojol. 12Quiloj bin ut'il ay te c'alal mayuc bin ay cu'un soc bin ut'il ay te c'alal ay bayel bin ay cu'un. Nopbil cu'un bin ut'il ya xcuxajon ta jujuchahp, teme nojel jch'uht o teme ay jwi'nal, teme ay bin ay cu'un o teme mayuc bin ay cu'un. 13Spisil ya xhu' cu'un ta scuenta Cristo te ya ya'bon yip co'tan. 14Pero lec te la awa'iybonic te jwocole. 15Ana'ojic, ha'ex te ayex ta Filipos, te c'alal hahch ta halel te lec yach'il c'op, te c'alal loc'on tal ta Macedonia, mayuc junuc iglesia te la scoltayon a te bintic tuhun cu'un, ha nax te ha'exe. 16Como te c'alal ayon ta Tesalónica cheb oxeb buelta la aticombonic te bin tuhun cu'une. 17Ma yu'unuc yacon ta sc'anel jmahtan, ha yac jlehbel sit te ya xp'ohl xan ta cuenta awu'unique. 18Yo'tic ts'acal la jquich'ix, ayix bayel bin ay cu'un; lequix ayon, te bin ut'il la jquich'beyix ta sc'ab te Epafrodito te bin la aticonic tal, ha mahtanil te sumet yic', ha milbil mahtanil te lec yo'tan Dios yu'une. 19Ha yu'un te Dios cu'un hich me ya ya'beyex spisil bintic ya xtuhun awu'unic te bin ut'il ay yutsil sc'uhlejal ta scuenta Cristo Jesús. 20Ac'a yich' halbeyel yutsil sc'oblal sbahtel q'uinal te Jtatic Dios. Hichuc. 21Halbon xcoltanuc spisil te mach'atic ch'uhltesbilic ta scuenta Cristo Jesús. Xcoltanuquex laj yu'un te quermanotactic te li' sjoquinejonique. 22Spisil te mach'atic ch'uhltesbilic ya sticombeyex spatil awo'tanic, ha bayel ya spatbeyex awo'tanic te mach'atic ayic ta sna César. 23Ac'a sjoquinex ta apisilic te yutsil yo'tan te Cajwaltic Jesucristo. Hichuc.


Copyright
Learn More

will be added

X\