Filipenses 1

1Pablo soc Timoteo, a'batetic yu'un te Jesucristo, ta stojol spisil te mach'atic ch'uhltesbilic te ayic ta stsojol Cristo Jesús ta Filipos, soc te obispohetic soc te diáconohetique. 2Ayuc me yutsil-o'tanil soc lamal q'uinal ta atojolic yu'un te Jtatic Dios soc yu'un te Cajwaltic Jesucristo. 3Te c'alal ya jna'ex, ya calbe wocol te Dios cu'un ta acuentahic. 4Tse'el co'tan ya jc'opombeyex Dios spisil ora ta apisilic, 5yu'un te jmohlol jbahtic ta a'tel ta scuenta te lec yach'il c'op c'alal ta shahchibal c'alal ora ini. 6Sch'uhunej co'tan te mach'a la shach te lequil a'tel ta atojolic, ya me shu'tes bahel ha to c'alal ya sta sc'ahc'alel yu'un te Jesucristo. 7Ha lec te hich ya ca'iyex ta co'tan ta apisilic, yu'un ayex ta co'tan; yu'un teme ayon ta cárcel o teme ya xc'opojon yu'un te lec yach'il c'op soc te ya cac' ta na'el te ha melel, pajal quich'beyejtic yutsil yo'tan te Diose. 8Ha testigo cu'un te Dios te bayel yac jna'belex apisilic ta scuenta te yutsil sc'uxul yo'tan te Jesucristo. 9Ha ya jc'opombeyex Dios yu'un te behbehuc yac ta p'ohlel te sc'uxul awo'tanic yu'un te bintic ay ta na'el soc sna'beyel scuentahil, 10scuenta yu'un hich yac atsahic a te bin lec, scuenta yu'un mayuc awa'baquilic soc mayuc bin quechel ta acuentahic a ta yorahil sc'ahc'alel te Cristo, 11te nojelex ta sit yu'un te bintic stojil ta pasel te ya xtal ta scuenta Jesucristo, scuenta yutsilal soc yalbeyel yutsil sc'oblal te Diose. 12Quermanotac, ya jc'an te yac ana'ic te c'ax hich yac ta puhquel bahel te lec yach'il c'op yu'un te bin pasbilone. 13Ha scuentahil te chicanix ta spisil te pretorio soc spisil yantic te chuculon ta scuenta Cristo. 14Soc ay tsobol quermanotactic te tey la yich' xan yip yo'tanic a ta scuenta te Cajwaltic yu'un te bin ut'il chuculon, mayuc xiwel yu'unic a ya yaq'uic xan fuersa ta yalel te sc'op Diose. 15Melel ay nix mach'atic te ya spucbeyic sc'oblal Cristo ta scuenta il-o'tantaywanej soc ta scuenta tsaltamba; pero ay yantic te ya spasic soc sc'anojel yo'tanic. 16Ha'ic ini ya spasic ta scuenta sc'uxul yo'tanic, yu'un sna'ojic te ac'bilon li'i yu'un ya xc'opojon yu'un te lec yach'il c'ope. 17Te yantique ya spucbeyic sc'oblal Cristo ta scuenta tsaltamba, ma ha'uc soc spisil yo'tanic, ya scuyic te ya ya'bonic xan jwocol yu'un te ayon ta chuquel. 18¿Bin cochel a? Ha nax ay sc'oblal te ya yich' halbeyel sc'oblal te Cristo, teme smacoj sba ta c'op a o teme melele; ha tse'el co'tan yu'un, soc tse'el co'tan spisil ora, 19como jna'oj te ta scuenta te yac ac'opombonic Dios soc ta scuenta te ya scoltayon te Espíritu yu'un Jesucristo, ha ya yac' te ya xcolon ta libre. 20Ha ya sc'an co'tan soc ha smuc'ul co'tan te mayuc bin ya jta q'uexlal yu'un, pero socuc yip co'tan ta ora ini, hich te bin ut'il ta spisil ora, yacuc x'ich'ot ta muc' Cristo ta scuenta jbaq'uetal, teme cuxulon o teme ya xchamone, 21como ha jcuxlejal te Cristo, soc teme ya xchamon, ha jganar. 22Pero teme ya to xcuxajon ta jbaq'uetal, te hich ya jta xan sit te ca'tele, ma jna' banti ya jtsa. 23Ta schebal ma jna' ban ya jtsa; co'tanuc te ya xloc'on bahel, te ya joquin te Cristo, ha c'ax lec xan ya ca'iy a. 24Pero bayel xan sc'oblal te ya xhilon ta jbaq'uetal ta acuentahic. 25Te bin ut'il hich jch'uhunej, ya jna' te ya xhilon, ya to joquinex xan ta apisilic yu'un alequilic soc yu'un ayuc xan stse'elil awo'tanic yu'un te bin ach'uhunejic, 26scuenta yu'un bayel awutsilalic cu'un ta scuenta Cristo Jesús yu'un te ayon ta awohlilic yan buelta. 27Ha nax ya calbeyex wocol te hichuc ya x'ayinex te bin ut'il ya sc'an te lec yach'il c'op yu'un Cristo, scuenta yu'un teme ya xtal quilex o ma ba ya xtal quilex, ya me ca'iybeyex ac'oblalic te jun awo'tan abahic soc te pajal yaquex ta ya'beyel yipal yu'un sch'uhunel te lec yach'il c'op, 28te ma ba yac axi'ic te mach'atic ya scontrahinexe; tey ya xchicnaj a te ch'ayel ya xbahtic, yan te ha'exe ya xcolex; ha yu'un Dios ini. 29Como ma hipuc a te a'botex te yac ach'uhunic te Cristo, ha nix hich a'botex te ya xc'ax awocolic ta scuenta, 30te hich nix yac ta c'axel awocolic te awilojic te c'ax ta jtojol, soc yac awa'iyic te ay ta jtojol ta ora ini.


Copyright
Learn More

will be added

X\