San Mateo 24

1C'alal loc' bahel ta Templo te Jesús, yaquix ta bahel a, nohpoj tal te jnopojeletic yu'un, la ya'beyic yil te nahetic yu'un te Templo. 2Hich halbotic yu'un te Jesús: ¿Ya bal awilic spisil ini? Jamal ya calbeyex te mayuc cajal ya xhil junuc ton ta sba yan ton, spisil me ya yich' jinticlanel, xchi. 3C'alal hucul ta Wits yu'un Olivohetic a te Jesús, stuquel nohpojic tal te jnopojeletic, hich la yalbeyic: Hala ca'iycotic, ¿bin ora ya xc'oht ta pasel ini soc bin señahil yu'un te ya xtalat soc yu'un te slajibal c'ahc'al? xchihic. 4La sjac' te Jesús: Xawil me abahic, ma me ayuc mach'a ya slo'loyex, 5como bayel me yich'beyejon jbihil ya xtalic, te hich ya yalic: Ho'on Cristohon, xchihic; bayel mach'atic ya slo'loylanic. 6Yac awa'iyic te ay guerrahetic soc ya xchicnaj sc'oblal te ya xhahch guerrahetic, pero ma me xnihc awo'tanic yu'un, como ya sc'an ya xc'oht ta pasel spisil ini; pero ma to ha'uc te slajibal c'ahc'ale. 7Ya xhahch scontrahin sbahic nacionetic, soc ya scontrahin sbahic te jujuchahp banti scuentahinejic; ya xtal wi'nal soc nihquel ta bayuc. 8Pero ta spisil ini shahchibal to nax te sc'uxule. 9Ya me yaq'uex ta c'abal scuenta uts'inel, ya smilex soc yac awich'ic ihlayel yu'un spisil ants-winiquetic ta scaj te jbihile. 10Ta hich ora ay tsobol mach'atic ya xchebaj yo'tanic, talel c'axel me ya yac' sbahic ta c'abal soc talel c'axel me ya yihlay sbahic. 11Ya xchicnaj hahchel tsobol lotil jalwanejetic soc ya slo'loylanic tsobolic. 12Ta scaj te ya xp'ohl te mulil, bayel mach'atic ya xpehc'aj te sc'uxul yo'tanique. 13Pero te mach'a ya xcuhch yu'un c'alal ta slajibal, ha me ya xcol stuquel. 14Ya me xpuhc ta halel ta swohlol bahlumilal sc'oblal te lec yach'il c'op yu'un te cuentahinel yu'un Dios, scuenta testigo-c'op ta stojol spisil nacionetic, ha to me ya xtal a te slajibal c'ahc'ale. 15Ha yu'un te bin ora yac awilic ta ch'ul awilal te bin ilobtic sba te ya xjinawan, te la yalbe sc'oblal te jalwanej Daniel, (te mach'a ya yil te hun ini, ac'a me sna'be scuentahil), 16ha yu'un te mach'atic ayic ta Judea ac'a me ahnuquic bahel ta witsiltic. 17Te mach'a ay ta ba na, ma me xco tal yu'un ya sloq'ues te bin ay ta sna; 18soc te mach'a ay ta sq'uinal, ma me suht bahel ta stamel te smuc'ul-c'u'. 19¡Ay me swocolic te mach'atic swoloj yal a soc te ay chu'alaletic yu'unic ta hich ora! 20C'ambeyahic Dios te manchuc yorahiluc sic a te ya x'ahnex bahel soc te manchuc sc'ahc'alel cux-o'tan a, 21como ya me xtal tulan wocol ta hich ora, te mayuc hich c'ohem ta pasel ta shachel to tal bahlumilal c'alal ora, soc mayuc hich ya xc'oht xan ta patil. 22Te manchuc ya xpehc'ambot sc'ahc'alel, mayuc mach'a ya xcol te hichuque. Pero ta scaj te mach'atic tsahbilic ya xpehc'ambot sc'ahc'alel. 23Ha yu'un teme ay mach'a hich ya yalbeyex: Ilawilic, li' ay te Cristo, o: Ilawilic, tey ay a, teme xchihe, ma me xach'uhunic. 24Como ya xchicnaj hahchel lotil cristohetic soc lotil jalwanejetic soc ya spasic muc' señahiletic soc jchahp a'teliletic yu'un ya slo'loyic te mach'a tsahbilic, te yacuc xhu' yu'unique. 25Ilawilic, nahil la jcalbeyex awa'iyic. 26Ha yu'un teme ay mach'a ya yalbeyex: Ilawilic, ay ta jochol taquin q'uinal, teme xchihe, ma me xloq'uex bahel tey a; o: Ilawilic, ay ta yutil tsahlul na, teme xchihe, ma me xach'uhunic. 27Como hich te bin ut'il tsantsehwal te ya xchicnaj c'alal banti ya xloc' tal c'ahc'al ha to banti ya xmahl c'ahc'al, hich ya xtal te Nich'anil ay ta scuenta winic. 28Ta banti ay te chamen baq'uet, tey ya stsob sbahic a te hosetique. 29Xc'ax nax a te bayel wocole, ya x'ihc'ub te c'ahc'al, ma xyac' sts'anabul te u, ya xch'ay cohel tal ta ch'ulchan te eq'uetic soc ya me syuc' sbahic te bintic ay ta sjamalil ch'ulchan. 30Tey ora ya xchicnaj tal ta ch'ulchan a te seña yu'un te Nich'anil ay ta scuenta winic, hich ya xhahch smel yo'tanic spisil te jaychahp mach'atic ayic ta bahlumilal, ya me yilic te Nich'anil ay ta scuenta winic te yac ta talel ta stocalil ch'ulchan soc yu'el soc bayel yutsilal. 31Soc ya me sticonlan bahel te ch'ul a'batetic yu'un soc tulan yoq'uel corneta, ya stsobic tal ta schanebal ic' te mach'atic tsahticlambil yu'un, c'alal ta jehch ta jehch sti'il te ch'ulchane. 32Ta scuenta te higuera nopahic bin ut'il ay te sloc'ombahil c'op: C'alal ya x'uhnenub te sc'ab soc ya xloc' tal te ya'binal, yac ana'ic te nopol ya sta yorahil te ha'alel q'uinal. 33Ha nix hichex te c'alal yac awilic spisil ini yac ana'ic te nopol ya sta yorahil, te ayix ta mero ti'nahil. 34Jamal ya calbeyex, ma to xlaj a te jcaj ts'umbalil ini te ya xc'oht ta pasel spisil ini. 35Ya xlaj ch'ulchan soc bahlumilal, pero ma ba ya xlaj stuquel te jc'ope. 36Pero mayuc mach'a ya sna' bin c'ahc'alil soc bin orahil, ni ha'uc te ch'ul a'batetic ta ch'ulchan ni ha'uc te Nich'anil, ha nax stuquel te Tatile. 37Hich te bin ut'il ta yorahil Noé, hich nix ay ta yorahil ya xtal te Nich'anil ay ta scuenta winic. 38Como te bin ora ma to xtal a te puhlel, yacalic ta we'el uch'el, yacalic ta nuhpunel soc yac yac'belic nuhpunel a, ha to c'alal och ta barco te Noé, 39ma ba la sna'ic ha to c'alal tal te puhlel soc spisilic lajinotic yu'un, hich ya xtal te Nich'anil ay ta scuenta winic. 40Ay cha'tuhl te sjoc sbahic ta a'tel ta sq'uinal, jtuhl ya x'ic'ot, jtuhl ya xhil. 41Ay cha'tuhl antsetic te sjoc sbahic ta juch', jtuhl ya x'ic'ot, jtuhl ya xhil. 42Cuxuluc me awo'tanic, como ma na'biluc awu'unic bin ora ya xtal te Ajwalil awu'unique. 43Na'ahic me, te lajuc sna' te yajwal na te bin ora ya xtal j'elec', la sq'uehlan sit, ma ba la yac' ta elc'anel sbiluc te hichuque. 44Ha nix hichex, chapaluquex me, como ya xtal te Nich'anil ay ta scuenta winic te bin ora ma ba yac ana'belic a. 45¿Mach'a yac awa'iy a te a'bat te jun yo'tan soc p'ij, te a'bot scuentahimbe sna te yajwal yu'un ya ya'iy mac'linwanej ta yorahil? 46Bayel me yutsil te a'bat te hich yac spasbel a te ya xhul ta tahel yu'un te yajwale. 47Jamal ya calbeyex, ya me x'a'bot ta scuenta spisil bintic ay yu'un te yajwale. 48Yan teme hich ya yal ta yo'tan te mach'a ma lequil a'batuc: Ma orahuc ya xtal te cajwal, teme xchihe, 49hich ya xhahch smajticlan te smohlol ta a'batil soc ya sjoquin ta we'el ta uch'el jyacubeletic, 50ya xtal te yajwal te a'bat te c'alal ma ba yac smahliybel soc te bin ora ma ba yac sna'bel a, 51ya me x'a'bot tulan castigo yu'un, soc ya x'a'bot sjoquin te jchebal-o'tanetic, tey ya xc'oht yoq'uetay sba soc tey ya xc'oht sc'uxuxan ye a.


Copyright
Learn More

will be added

X\