San Mateo 23

1Patil te Jesús la sc'opon te ants-winiquetic soc te jnopojeletic yu'un, hich la yal: 2Te escribanohetic soc te fariseohetic ya xhuhcajic ta shuctajib Moisés. 3Ha yu'un spisil te bin ya yalbeyex apasic, ch'uhunahic spasel; pero ma me ha'uc xanopbeyic ya'telic, como ma ba ya spasic te bin ya yalique. 4Ya xchuquic ihcatsil te alic soc wocol ta ich'el bahel, ya ya'beyic ta snehquel te ants-winiquetic, pero ni jch'ixuc yal sc'ab ya scoltayic ta sliquel. 5Ya spas spisil ya'telic yu'un nax ya yac' sbahic ta ilel yu'un te ants-winiquetique. Ya smuc'ubtesic te yawil mandariletic soc ya snahtubtesic te smehyil paq'uique; 6ya smulanic te ya xhuhcajic ta shahchibal huctajibaletic ta q'uin soc ta shahchibal huctajibaletic ta sinagogahetic; 7ya smulanic te pat-o'tan ta plazahetic soc te hich ya xhalbotic yu'un ants-winiquetic: Rabí, te xchi sc'oblalique. 8Yan te ha'exe ma me xawac' abahic ta cuyel ta rabí, como jtuhl nax te Maestro awu'unic, soc awermano abahic ta apisilic. 9Soc ma me ayuc mach'a te yac awalbe ‘jtat’ li' ta bahlumilali, como jtuhl nax te Atatic, ha te ay ta ch'ulchan. 10Soc ma me xawac' abahic ta cuyel ta maestro, como jtuhl nax te Maestro awu'unic, ha te Cristo. 11Te mach'a muc' ta awohlilic, ha a'bat awu'unic ac'a c'ohtuc. 12Como te mach'a ya stoy sba, ya me yich' pehc'anel, yan te mach'a ya spehc'an sba, ya xtoybot sc'oblal. 13Pero ¡ay me awocolic, escribanohetic, fariseohetic, jchebal-o'tanex! como yac amacbelic ta stojol ants-winiquetic te cuentahinel yu'un te ch'ulchane. Ma ba ya x'ochex ha'ex, soc ma ba yac awaq'uic ochel te mach'atic ya sc'an ya x'ochic. 14¡Ay me awocolic, escribanohetic, fariseohetic, jchebal-o'tanex! como yac awich'beyic sna me'ba' antsetic, soc naht yac atsahtsah-c'oponic Dios. Toyol me castigo yac awich'ic yu'un. 15¡Ay me awocolic, escribanohetic, fariseohetic, jchebal-o'tanex! como yac abehentayic mar soc q'uinal ta slehel mach'a yac awa'be sch'uhunic Dios ta ac'opic, soc teme la sch'uhunic, cheb buelta c'ax hich nich'anil yu'un infierno ya xc'oht awu'unic a te bin ut'il te ha'exe. 16¡Ay me awocolic, ts'o'sit jtojobteswanejex! te hich yac awalic: Teme ay mach'a ay bin ya yal ta jamal ta scuenta te Templo, mayuc sc'oblal c'ohem; yan teme ay mach'a ay bin ya yal ta jamal ta scuenta te oro yu'un te Templo, ya me sc'ohtes ta pasel, xchihex. 17¡Sonso ts'o'sitex! ¿Binti a te tulan sc'oblal, ha bal te oro o ha bal te Templo te ya sch'ultes te oro? 18Soc hich yac awalic: Teme ay mach'a ay bin ya yal ta jamal ta scuenta te scajtajib ta chiq'uel mahtanil, mayuc sc'oblal c'ohem; yan teme ay mach'a ay bin ya yal ta jamal ta scuenta te mahtanil ay ta sba, ya me sc'ohtes ta pasel, xchihex. 19¡Ts'o'sitex! ¿binti a te tulan sc'oblal, ha bal te mahtanil o ha bal te scajtajib te ya sch'ultes te mahtanile? 20Como te mach'a ay bin ya yal ta jamal ta scuenta te scajtajib ta chiq'uel mahtanil, spisil ya sta ta halel soc te bin cajal tey a. 21Soc te mach'a ay bin ya yal ta jamal ta scuenta te Templo, spisil ya sta ta halel soc te mach'a nahinem tey a. 22Soc te mach'a ay bin ya yal ta jamal ta scuenta te ch'ulchan, ha ya sta ta halel a te smuc'ul-huctajib Dios soc te Mach'a hucul tey ahe. 23¡Ay me awocolic, escribanohetic, fariseohetic, jchebal-o'tanex! como yac aloq'ues jun ta slajunebal te menta, anís, soc comino, pero yac awihquitayic te bin tulan sc'oblal ta Ley: ha te bin toj ta pasel, te c'uxultaywanej soc te sch'uhunel-o'tanil. Ha ya sc'an pasel soc nix te yane. 24¡Ts'o'sit jtojobteswanejex te yac achihchinic te bic'tal us soc yac abiq'uic cohel te camello! 25¡Ay me awocolic, escribanohetic, fariseohetic, jchebal-o'tanex! como yac apoquic te spat vaso soc te plato, pero ta yutil nojel ta elec' soc ta bintic ma tojuc ta pasel. 26¡Ts'o'sit fariseo! ha nahil xapocbe te yutil te vaso soc te plato, scuenta yu'un hich pocbil ya xc'oht soc a te spate. 27¡Ay me awocolic, escribanohetic, fariseohetic, jchebal-o'tanex! como hich c'ohemex te bin ut'il muquenal te bombil ta sac, t'ujbil ta ilel ta spat, pero ta yutil nojel ta sbaquel chamen winiquetic soc spisil bintic ilobtic sba. 28Ha hichex ta ilel, toj yac awac' abahic ta ilel ta stojol te ants-winiquetic, pero te awo'tanic nojel ta chebal-o'tanil soc ta mulil. 29¡Ay me awocolic, escribanohetic, fariseohetic, jchebal-o'tanex! como yac apasbeyic smuquenal te jalwanejetic soc yac ach'albeyic sna'ojibalic te mach'atic toj yo'tanic, 30soc hich yac awalic: Te ayucotiquix ta bahlumilal a ta yorahil te jme'jtatcotic, ma ba la jpaj co'tancotic soc ta smalbeyel sch'ich'elic te jalwanejetic te hichuque, xchihex. 31Ha yu'un ha'ex nix yac awalbel abahic te ha'ex yal-snich'anex te mach'atic la smilic te jalwanejetique. 32¡Hu'tesbeyahic ta pasel hiche te bin hahchem ta pasel yu'un te ame'atatique! 33¡Chanex, sts'umbalex jti'awal chanetic! ¿bin ut'il c'an coluquex yu'un te ya x'ac'otex ta ch'ayel ta infierno? 34Ha yu'un ya jticombeyex jalwanejetic, p'ijil winiquetic soc jp'ijubteswanejetic; ay me yac amilic, ay me yac ajihpanic ta cruz, ay me yac amajic ta sinagogahetic awu'unic soc ay me yac anutsic bahel ta jujun pueblo. 35Hich yac amulimbeyic smalbeyel sch'ich'el spisil te mach'atic toj yo'tanic te lajic ta milel ta bahlumilal, c'alal ta sch'ich'el Abel te toj yo'tan ha to ta sch'ich'el Zacarías te snich'an Berequías te la amilic ta ohlil yu'un te Templo soc te scajtajib ta chiq'uel mahtanil. 36Jamal ya calbeyex, ta spisil ini ya xc'oht ta stojol ha'i jcaj ts'umbalil ini. 37¡Jerusalén, Jerusalén te yac amilticlanic te jalwanejetic soc te yac ach'ojticlanic ta ton te mach'atic ticombilic tal ta atojolic! ¡Bayel buelta c'an jtsob te awal-anich'nabic hich te bin ut'il ya stsob yalatac ta ye'tal xic' te me'mut, pero ma la ac'anic! 38Jochol ya xhil te anahe, 39como ya calbeyex te ma ba yac awilboniquix jsit ha to teme yac awalic: ¡Bayel yutsil te mach'a ya xtal ta scuenta sbihil te Cajwaltique! xchi te Jesús.


Copyrighted Material
Learn More

will be added

X\