San Mateo 22

1Te Jesús la scha'c'oponlan xan ta sloc'ombahil c'op, hich la yal: 2Te cuentahinel yu'un te ch'ulchan hich c'ohem te bin ut'il jtuhl ajwalil te la spas q'uin yu'un ya xnuhpun te snich'ane. 3La sticon bahel te a'batetic yu'un ta yiq'uel tal te mach'atic ic'bilic ta yilel te nuhpunel, pero ma ba la sc'an talic. 4La scha'ticon xan yan a'batetic yu'un, hich la yalbe bahel: Halbeya te mach'atic ic'bilic cu'un te chapalix te we'elile. La yich'ix milel te torohetic soc te juhp'en wacaxetic, spisil chapalix cu'un; la'ic ta yilel te nuhpunel, xchi. 5Pero ma la yich'ic ta cuenta te yiq'uelique: jtuhl baht ta sc'al, yan baht ta chombajel; 6te yantic la stsaquic te a'batetic, la smajic soc la smilticlanic. 7C'alal hich la ya'iy te ajwalil, ilin yu'un, la sticon bahel soldadohetic yu'un, la slajin te jmilawetic soc la schic'be te pueblo yu'unique. 8Hich la yalbe te a'batetic yu'une: Chapalix te q'uin scuenta nuhpunel, pero te mach'atic ic'ticlambilic mayuc stuc yu'unic. 9Ha yu'un bahanic ta behbetic, ic'ahic tal ta il-nuhpunel mach'ayuc a te yac atahic, xchi. 10Hich loq'uic bahel ta behbetic te a'batetic, la yic'ticlanic tal spisil te mach'atic la stahic, te mach'atic lec yo'tanic soc ma lecuc yo'tanic, hich noj ta ic'abil banti ay te nuhpunele. 11C'alal och bahel ta yilel yic'ab te ajwalil, la yil tey a jtuhl winic te ma ba slapoj c'u'ul yu'un il-nuhpunel, 12hich la yalbe: Amigo ¿bin ut'il ochat tal li'i te ma ba alapoj c'u'ul yu'un il-nuhpunel? la yut. Ma ba weht bin la yal yu'un te winique. 13Ha yu'un te ajwalil la yalbe te a'batetic yu'une: Chucbeyahic yoc sc'ab, ch'ojahic bahel ta fuera ta yihc'al q'uinal, tey ya xc'oht yoq'uetay sba a soc tey ya xc'oht sc'uxuxan ye a, xchi. 14Como tsobol te mach'atic ic'bilic, pero mayuc tsobol te tsahbilique, xchi te Jesús. 15Hich te fariseohetic baht schapic bin ut'il ya schuc sba ta sc'op te Jesús. 16La sticonic bahel te jnopojeletic yu'unic soc te winiquetic yu'un Herodes, hich c'oht yalbeyic: Maestro, jna'ojcotic te smelelil ya xc'opojat soc smelelil yac awac' ta nopel te be yu'un Dios, mayuc sc'oblal awu'un te bin ya yal yantic, como ma ba yac awilbe bin yilel stalel te ants-winiquetique. 17Hala ca'iycotic hiche, ¿bin xchihat yu'un, stojil bal teme ya yich' tojel patanil ta stojol César o ma'uc? xchihic. 18Pero na'bot yo'tanic yu'un te Jesús te chopol bin snopojic, hich la yalbe: ¿Bin yu'un yac awa'bonic jyacol, jchebal-o'tanex? 19A'bonic quil te taq'uin yu'un patanil, xchi. La ya'beyic yil jun denario. 20Ha yu'un te Jesús la sjoc'obe: ¿Mach'a sloc'omba yac awilic ini, soc mach'a sbihil te ts'ihbabil tey a? xchi. 21Yu'un César, xchihic. Halbotic yu'un te Jesús: A'beya César te bin yu'un César, soc a'beya Dios te bin yu'un Dios, xchi. 22Xcham yo'tanic yu'un te bin la yal; hich la yihquitayic hilel te Jesús, bahtic. 23Ha nix ta yorahil, te saduceohetic, te ya yalic te mayuc cha'cuxajel, talic ta stojol, hich la sjoc'obeyic te Jesús: 24Maestro, la yal te Moisés: Teme ay mach'a cham te mayuc yal-snich'an, ha ya x'ic'bot yihnam yu'un te yihts'in, ha ya shachbe sts'umbal te sbanquile, xchi. 25Ay ta cohlilcotic huctuhl winiquetic, jun sme'static; nuhpun te banquilal, patil cham. Te bin ut'il mayuc yal-snich'an hil soc, te yihnam ic'bot yu'un te yihts'ine. 26Ha nix hich c'oht ta pasel ta stojol te schebal, yoxebal, c'alal ta shuquebal ihts'inal. 27Patil cham te antse. 28Ta yorahil cha'cuxajel, ¿mach'a yihnam ya xc'oht, te bin ut'il spisil la yihnaminic? xchihic. 29La sjac' te Jesús: Howiyemex ta c'op, ma xana'ic bin ya yal ta Shun Dios soc bin ut'il ay yu'el te Diose. 30Como ta yorahil cha'cuxajel ma ba ya xnuhpuniquix soc ma ba ya x'ac'otix ta nuhpunel, hich ya xc'ohtic te bin ut'il ch'ul a'batetic yu'un Dios ta ch'ulchan. 31Pero te bin ut'il ay te cha'cuxajel yu'un te mach'atic chamenic, ¿ma bal awilojic ta hun te bin yalbeyejex te Dios te hich la yal: 32Ho'on Dioson yu'un Abraham, Dioson yu'un Isaac, soc Dioson yu'un Jacob, te xchihe? Ma ha'uc Dios yu'un te mach'atic chamenic, ha Dios yu'un te mach'atic cuxulic, xchi te Jesús. 33C'alal hich la ya'iyic te ants-winiquetic, xcham yo'tanic yu'un te nohptesel yu'une. 34C'alal la ya'iyic te fariseohetic te ma ba weht suhtib yu'un te saduceohetic yu'un te bin la yal te Jesús, hich jun la yac' sbahic. 35Jtuhl smohlolic te ha maestro yu'un te Ley la stsaj yil te Jesús, hich la sjoc'obe: 36Maestro, ¿bin mandaril te mero muc' sc'oblal? xchi. 37Halbot yu'un te Jesús: C'ux laj me xawa'iy te Cajwaltic Dios ta spisil awo'tan, ta spisil ach'uhlel soc ta spisil ap'ijil. 38Ha te shahchibal mandaril soc te ha muc' sc'oblal. 39Te schebal ha nix hich pajal soc: C'ux me xawa'iy ta awo'tanic apat-axuhc hich te bin ut'il c'ux yac awa'iy aba. 40Te cheb mandariletic ini, ha yich'o-ip spisil te Ley soc te bintic la yalic te jalwanejetic, xchi te Jesús. 41Te c'alal stsoboj sbahic a te fariseohetic, ay bin joc'obotic yu'un te Jesús: 42¿Bin xchihex yu'un te Cristo, mach'a snich'an? xchi. Ha Snich'an David, xchihic. 43Hich halbotic yu'un: ¿Bin yu'unix a hiche te David, ta scuenta te Espíritu, la yalbe Cajwal, como hich la yal: 44Te Cajwaltic Dios hich la yalbe te Cajwal: Huclan ta jwa'el-c'ab ha to c'alal ya cac' ta ye'tal awoc te acontratac, xchi? 45Teme Cajwal xchi te David ta stojol, ¿bin ut'il c'an ha'uc snich'an? xchi te Jesús. 46Mayuc mach'a hu' yu'un sjac'bel; tey mayuquix mach'a la sc'an te ay bin ya sjoc'obe te Jesús.


Copyright
Learn More

will be added

X\