San Mateo 21

1C'alal nopol ya xc'ohtiquix ta Jerusalén, te hulic ta Betfagé ta wits yu'un Olivohetic, te Jesús la sticon bahel cheb jnopojeletic yu'un, 2hich la yalbe bahel: Bahanic ta tut pueblo te chican ta ilel yac awilic, tey chucul ya xc'oht atahic jcoht burra a soc yal. Tilahic, ic'bonic tal. 3Teme ay mach'a ay bin ya yalbeyex, hich me xawalbeyic: Ha ya xtuhun yu'un te Cajwaltic, patil ya suht talel, xchihex me. 4Hich c'oht ta pasel scuenta yu'un ya xc'oht ta pasel te bin yaloj te jalwanej, te hich la yal: 5Halbeyahic te yantsil-nich'an Sión: Yac ta talel ta atojolic te Ajwalil awu'unic, ha manso soc cajal ta burra, cajal ta yal burra, ha yal j'ihcatsijel chambahlam, te xchihe. 6Hich bahtic te jnopojeletic, la spasic hich te bin ut'il halbotic yu'un te Jesús. 7La yiq'uic tal te burra soc te tut burro, la spacbeyic sempatin smuc'ul-c'u'uletic, tey cajaj a te Jesús. 8Te bayel ants-winiquetic la slimticlan smuc'ul-c'u'ic ta be; ay yantic te la sbojticlanic tal ya'binal te', la sji'ic bahel ta be. 9Te mach'atic nahil ayic soc te mach'atic patil ayic, hich yacalic ta yalel ta aw: ¡Hosana ta stojol te snich'an David! ¡Bayel yutsil te mach'a ya xtal ta scuenta sbihil te Cajwaltique! ¡Hosana ta toyol! xchihic ta aw. 10C'alal och bahel ta Jerusalén te Jesús, xjuyetic hahchel ta c'op yu'un spisil te pueblo, hich la yalic: ¿Mach'a a ini? xchihic yu'un. 11Hich la yalic te ants-winiquetic: Ha te Jesús, te jalwanej te talem ta Nazaret ta sq'uinal Galilea, xchihic. 12Och bahel ta templo yu'un Dios te Jesús, la stenticlan loq'uel spisil te mach'atic yacalic ta chombajel soc ta mambajel ta Templo; la sbuchticlambe smesahic te jel-taq'uinetic soc la sbuchticlambe shuctajibic te mach'atic yacalic ta chon stsuhmut, 13hich la yal: Hich ts'ihbabil: Te Jna, ha snahul sc'oponel Dios ya xc'oht te sbihile, xchi, pero te ha'ex, la ac'atp'uniquix ta sch'en j'eleq'uetic, la yut. 14Tey ta Templo tal ts'o'sitetic soc coxo'etic ta stojol Jesús, la slecubteslan. 15Pero te principal sacerdotehetic soc te escribanohetic ilinic yu'un te c'alal la yilic te jchahp a'teliletic yac spasbel soc te hich yacalic ta aw ta Templo te alaletic: ¡Hosana ta stojol te Snich'an David! te xchihique. 16Hich la yalbeyic te Jesús: ¿Ya bal awa'iy te bin yac yalbelic te alaletic ini? xchihic. La jca'iy. ¿Ma bal ayuc awilojic ta hun: Ta ye alaletic soc chu'alaletic la awa'be yalic te bayel yutsil ac'oblal? xchi te Jesús. 17Tey la yihquitaylan hilel a, loc' bahel ta pueblo, baht ta Betania, tey c'oht ta wayel a. 18Ta sab, c'alal yac ta suhtel tal ta Jerusalén, ay swi'nal a. 19C'alal la yil jtehc' higuera ta ti'be, baht yil, pero mayuc sit la stahbe, ha nax ya'binal; hich la yalbe te te'e: Ma me jaymehl ya sitinat, la yut. Ora taquij te higuera. 20C'alal la yilic te jnopojeletic, xcham yo'tanic yu'un, hich la yalic: ¿Bin ut'il ay a te ora taquij te higuera? xchihic. 21Halbotic yu'un te Jesús: Jamal ya calbeyex, te ayuc sch'uhunel awo'tanic, teme ma xchebetuc awo'tanic, ma ha'uc nax te hich yac apasbe te higuera-te', teme yac awalbeyic ha'i wits ini: Loc'an teye, ch'oja ochel aba ta mar, teme yac awutique, hich ni me ya xc'oht ta pasel a. 22Spisil te bin yac ac'anic ta sc'oponel Dios, teme ya xch'uhun awo'tanic, ya me x'a'botex, xchi. 23C'alal och bahel ta Templo te Jesús, yac ta p'ijubteswanej a, nohpojic tal te principal sacerdotehetic soc te mamaletic yu'un te pueblo, hich la sjoc'obeyic: ¿Bin awa'tel ta spasel ini? Soc ¿mach'a la ya'bat awa'tel? xchihic. 24Halbotic yu'un te Jesús: Ha nix hich ay bin ya joc'obeyex, teme yac asutbonic, ha nix hichon ya calbeyex awa'iyic te bin ca'tel ta spasel ini. 25Te ich'-ha' yu'un te Juan, ¿banti tal? ¿Talem bal ta ch'ulchan o ta stojol ants-winic? xchi. Hich talel c'axel la yalbe sbahic: Teme ya caltic: Talem ta ch'ulchan, teme xchihotic, ya me yalbotic: ¿Bin yu'unix ma ba la ach'uhunic hiche? ya me yutotic. 26Teme ya caltic: Talem ta stojol ants-winic, teme xchihotic, ya jxi'tic te jlumaltic, como spisil sch'uhunejic te ha jalwanej te Juan, xchihic. 27Ha yu'un hich la yalbeyic te Jesús: Ma jna'cotic, xchihic. Ha yu'un hich halbotic yu'un te Jesús: Ha nix hichon, ma ba ya calbeyex te bin ca'tel quich'oj ta spasel ini. 28¿Bin xchihex yu'un ini? Ay jtuhl winic te ay cheb snich'nab, nohpoj tal, hich la yalbe te jtuhle: Jnich'an, bahan ta a'tel ta ts'unubil cu'un, xchi. 29La sjac' te snich'an: Ma jc'an, xchi. Pero patil la suhtes yo'tan, baht ta a'tel. 30Nohpoj tal ta stojol te yane, ha nix hich la yalbe; la sjac' te snich'an: Yacuc, jtat, ya xbohon, xchi, pero ma ba baht. 31Ta schebalic, ¿mach'a la spas te bin la sc'an yo'tan te state? xchi. La yalic: Ha te mach'a nahil la yalbe, xchihic. Halbotic yu'un te Jesús: Jamal ya calbeyex, te jc'an-patanetic soc te j'antsineletic ha nahil yacalic ta ochel awu'unic ta banti ay te cuentahinel yu'un te Diose; 32como te Juan tal ta atojolic yu'un ya ya'beyex awilic te be yu'un te bin stojil ay ta pasel, pero ma ba la ach'uhunic, yan te jc'an-patanetic soc te j'antsineletic la sch'uhunic stuquelic. Pero te ha'exe, aunque la awilic, ma ba la asuhtes awo'tanic yu'un yac ach'uhunic. 33A'iya me awa'iyic yan sloc'ombahil c'op: Ay jtuhl yajwal q'uinal te la sts'un sts'usubil, la sjoy ta corral, la shotbe spits'ojbil soc la spas toyol ilo-q'uinal yu'un, soc la yac' ta majanel yu'un j'a'teletic, baht ta namal stuquel. 34C'alal nopol ya stahix yorahil ya xc'anub sit a, la sticon tal a'batetic yu'un ta stojol te j'a'teletic yu'un ya yich'be te site. 35Pero te j'a'teletic la stsaquic te a'batetic, la smajic te jtuhle, ay yan la smilic, soc la sch'ojic ta ton te yane. 36La scha'ticon xan yan a'batetic yu'un, c'ax hich a te bin ut'il ta nahil to; pero ha nix hich la spasbeyic. 37Ta slajibal la sticon tal te snich'an, hich la yal: Ya yich'bonic ta cuenta stuquel te jnich'ane, xchi. 38Pero te j'a'teletic c'alal la yilbeyic te snich'an, hich la yalbe sbahic: Ha ini te ya xbaht yich' te q'uinale. La'ic, jmiltic, hich ya quich'betic te sq'uinale, xchihic. 39Hich la stsaquic, la sloq'uesic bahel ta spat scorralil te ts'usubil, tey c'oht smilic a. 40Te c'alal ya suht tal te yajwal te ts'usubil, ¿bin ya spasbe te j'a'teletic? xchi te Jesús. 41La sjaq'uic: Mayuc sc'uxul yo'tan ya me slajin te mach'atic chopolic, ya me yac' ta majanel yu'un yantic j'a'teletic te ya ya'beyic stuquel te sit sts'usubil te c'alal ya sta yorahil, xchihic. 42Hich joc'obotic yu'un te Jesús: ¿Ma bal awilojic ta Shun Dios: Te ton ch'ayot hilel yu'un te jpas-nahetic, ha sjol yich'o-ip c'oht. Ha te Cajwaltic te hich la spas, bayel yutsil ya quiltic, te xchihe? 43Ha yu'un ya calbeyex, ya me awich'ic pojbeyel ta atojolic te cuentahinel yu'un Dios, ha ya x'a'botic te mach'atic ya ya'beyic te site. 44Te mach'a ya xyahl ta sba te ton ini, ya me xwuy, soc te mach'a ya xtenot yu'une, jc'axel juch'bil ya xhil yu'un, xchi te Jesús. 45Te principal sacerdotehetic soc te fariseohetic, c'alal la ya'iyic te sloc'ombahil c'op, la sna'ic te ha sc'oblalic te bin la yale. 46La snopic bin ya yut ya stsaquic, pero la xi'ic te slumalic, como sch'uhunejic te ha jalwanej te Jesús.


Copyright
Learn More

will be added

X\