San Mateo 19

1C'alal laj yo'tan ta c'op te Jesús, loc' bahel ta Galilea, baht ta sq'uinal Judea ta jehch Jordán. 2T'unot bahel yu'un bayel ants-winiquetic, hich la slecubteslan tey a. 3Talic te fariseohetic ta stojol yu'un ya stsajic, hich la sjoc'obeyic: ¿Lec bal teme biluc nax scuentahil ya yihquitay yihnam te winique? xchihic. 4La sjac' te Jesús: ¿Yu'un bal mayuc awilojic ta Shun Dios te ta shahchibal Dios la spas jtuhl winic soc jtuhl ants, 5soc te hich la yal: Ha yu'un ya yihquitay sme'stat te winic, ya yic' sba soc te yihnam, junax sbaq'uetal ya xc'oht schebalic, te xchihe? 6Ha yu'un ma chebuquix, jun xanix baq'uet ya xc'oht. Ha yu'un te bin junax la yac' te Diose, ma me ayuc mach'a ya sjat, xchi. 7La sjoc'obeyic: ¿Bin yu'unix a hiche te la yal mandar te Moisés te ya spasbe shunal, hich ya sticon bahel? xchihic. 8Te Jesús la yalbe: Ta scaj te tulan awo'tanic te Moisés la ya'beyex permiso te yac awihquitayic te awihnamique; pero ma hichuc ay ta shahchibal. 9Ho'on ya calbeyex, spisil mach'a ya yihquitay hilel yihnam, teme ma ta scuentahuc yajmul, soc teme ya xnuhpun soc yan ants, yac me ta antsiwej a abi; soc te mach'a ya yic' yihnamin te ihquitaybil ants, ha nix hich yac ta antsiwej, xchi. 10Hich halbot yu'un te jnopojeletic yu'une: Teme hich ay sc'oblal te yihnam soc te winique, ha lec te ma ba ya xnuhpunic, xchihic. 11Halbotic yu'un te Jesús: Ma spisiluc ya xhu' ya yich'ic ha'i c'op ini, ha nax te mach'atic a'bibilic. 12Ay mach'atic te eunuco a te ya x'ayin, ay eunucohetic te hich pasbilic yu'un winiquetic, soc ay eunucohetic te hich la spas sbahic ta scaj te cuentahinel yu'un te ch'ulchan. Te mach'a ya xhu' yu'un te ya yich' ha'i c'op ini, ac'a yich', xchi. 13Ay ic'ot tal alaletic ta stojol Jesús yu'un yacuc scajanlambe sc'ab ta sjolic soc yu'un yacuc sc'opombe Dios; pero te jnopojeletic la scomic. 14Ha yu'un hich halbotic yu'un te Jesús: Ac'a taluc ta jtojol te alaletic, ma me xacomic, como ha yu'unic te cuentahinel yu'un te ch'ulchane, xchi. 15Hich la scajanlambe sc'ab ta sjolic, patil baht te Jesús. 16Ay mach'a tal sjoc'obe: Lequil maestrohat, ¿bin lec ya jpas scuenta yu'un ya jta jcuxlejal scuenta sbahtel q'uinal? xchi. 17Halbot yu'un te Jesús: ¿Bin yu'un te la awal te lecon ta winiquil? Mayuc mach'a lec, ha nax jtuhl, ha te Diose. Pero teme yac ac'an yac ata acuxlejal, pasa te bin ya yal te mandariletique, xchi. 18¿Bin mandariletiquil? xchi. La sjac' te Jesús: Ma me xawa'iy milaw; ma me xawa'iy antsiwej; ma me xawa'iy elec'; ma me xlehawanat ta c'op; 19ich'a ta muc' te atat soc anan; soc hich me c'ux yac awa'iy te apat-axuhc te bin ut'il c'ux yac awa'iy aba te ha'ate, xchi. 20La sjac' te quereme: Ta jtutil to jcanantayej spisil ini. ¿Bin xan yan ya sc'an pasel cu'un a? xchi. 21Halbot yu'un te Jesús: Teme yac ac'an te mayuc bin ya spasat falta, bahan, chona hilel te bintic ay awu'un, q'uebembeya hilel te pobrehetic, hich me ay ac'uhlejal ta ch'ulchan; soc la', t'unawon, xchi. 22Te querem, c'alal la ya'iy te c'op ini, ay ta mel-o'tan a loc' bahel, como bayel sc'uhlejal. 23Ha yu'un te Jesús hich la yalbe te jnopojeletic yu'une: Jamal ya calbeyex, mero wocol ya x'och tey ta banti ay te cuentahinel yu'un te ch'ulchan te mach'a jc'uhlej. 24Soc ya calbeyex xan, ha ma wocoluc ya sohl ta yoc aguja te camello, ha wocol ya x'och tey ta banti ay te cuentahinel yu'un Dios te jc'uhleje, xchi. 25C'alal hich la ya'iyic te jnopojeletic, xcham yo'tanic yu'un, hich la yalic: ¿Mach'a ya xhu' ya xcol hiche? xchihic yu'un. 26Ilticlambot sitic yu'un te Jesús, hich la yalbe: Te ants-winiquetic ma xhu' yu'unic spasel ini, pero te Dios spisil ya xhu' yu'un stuquel, xchi. 27La sjac' te Pedro: Te ho'otcotic quihquitayejcotic hilel spisil soc jt'unojatcotic; ¿bin ya jtahcotic a? xchi. 28Halbotic yu'un te Jesús: Jamal ya calbeyex, te c'alal ya yich' ach'ubtesel spisil, te c'alal ya xhuhcaj te Nich'anil ay ta scuenta winic ta smuc'ul-huctajib yu'un te yutsilal, ha'ex te at'unojonic ya me xhuhcajex ta lahchayeb (12) huctajibaletic yu'un yac achahpanic te lahchaychahp (12) sts'umbal Israel. 29Mach'ayuc a te yihquitayej hilel sna, sbanquiltac, swixitac, yihts'inab, stat, snan, yihnam, yal-snich'nab o sq'uinal ta scuenta te jbihile, ho'winic (100) xan buelta ya x'a'bot, soc ya me yich' scuxlejalic sbahtel q'uinal. 30Ay tsobol mach'atic te nahil ayic te slajibal ya xc'ohtic, soc te mach'atic patil ayic te nahil ya xc'ohtic.


Copyright
Learn More

will be added

X\