San Mateo 18

1Ta hich ora te jnopojeletic tal ta stojol Jesús, hich la sjoc'obeyic: ¿Mach'a a te c'ax hich muc' sc'oblal a te bin ut'il yantic ta banti ay te cuentahinel yu'un te ch'ulchane? xchihic. 2Te Jesús la yic' tal jtuhl alal, la stehc'ambe ta yohlilic, 3hich la yal: Jamal ya calbeyex, teme ma ba hich yac ap'is abahic te bin ut'il alaletic, ma xhu' ya x'ochex ta banti ay te cuentahinel yu'un te ch'ulchan. 4Ha yu'un mach'ayuc a te peq'uel ya yac' sba hich te bin ut'il te alal ini, ha muc' sc'oblal ya xc'oht yu'un spisil yantic ta banti ay te cuentahinel yu'un te ch'ulchane. 5Soc mach'ayuc a te ta scuenta jbihil ya yic' jtuhluc alal hich te bin ut'il te alal ini, ho'on me la yic'on abi. 6Mach'ayuc a te ya yac' yahluc jtuhluc ha'i alaletic ini te sch'uhunejonic, ha lec te yacuc yich' chucbeyel cha' ta snuc' soc ya x'etanot cohel ta sc'ubulil mar. 7¡Ay me swocol te bahlumilal yu'un te bintic ya x'ac'awan ta yahlel ta mulil! Ay c'ohchinojibaletic, pero ¡ay me swocol te mach'a ya yac' te c'ohchinojibaletique! 8Ha yu'un teme ha ya ya'bat ale amul te ac'ab o te awoc, boja loq'uel, ch'aya bahel: ha lec xan a te nol-oc o nolc'ab a yac awich' acuxlejal te bin ut'il teme schebal ac'ab o schebal awoc a ya xch'ojotat ochel ta c'ahc' te sbahtel q'uinal ay. 9Soc teme ha ya ya'bat ale amul te asite, loq'uesa, ch'aya bahel: ha lec xan a teme jun xanix asit a yac awich' acuxlejal te bin ut'il teme schebal asit a ya xch'ojotat ochel ta c'ahc' yu'un infierno. 10Tsahtaya me abahic te ma ba yac ap'ajic jtuhluc ha'i alaletic ini; como ya calbeyex, te ch'ul a'batetic yu'unic ta ch'ulchan spisil ora yac yilbelic sit te Jtat ay ta ch'ulchan; 11como te Nich'anil ay ta scuenta winic ha talem scoltaybel te mach'a ch'ayeme. 12¿Bin xchihex yu'un? Teme ay mach'a ay ho'winic (100) ta coht stuminchij, teme ay jcoht ya xhowiy bahel, ¿ma bal yacuc yihquitay hilel ta wits te balunlajuneb yo'winic (99) ta coht, ya xbaht sle te jcoht ch'ayem hilel? 13Teme la stahe, ya calbeyex te c'ax hich yutsil yo'tan yu'un a te bin ut'il yutsil yo'tan yu'un te balunlajuneb yo'winic (99) ta coht te ma ba ch'ayic stuquelic. 14Ha nix hich te Atatic ay ta ch'ulchan ma sc'an te ya xch'ay jtuhluc ha'i alaletic ini. 15Ha yu'un teme ay la sta smul ta atojol te awermano, bahan, a'beya sna' te smul ta stuquel. Teme lec la ya'iybat te ac'ope, lec ayat soc a te awermanohe. 16Pero teme ma ba ya ya'iybat te ac'ope, ic'a bahel cha'oxtuhl yantic scuenta yu'un ha testigo ya xc'ohtic yu'un te jayp'ahl c'op yac awalbe abahic. 17Teme ma ba ya ya'iybe te sc'opique, halbeya te iglesia; teme ma ba ya ya'iybe sc'op te iglesia, hich me ya xc'ohtix awu'un a te bin ut'il jyanlum o jc'an-patan. 18Jamal ya calbeyex, spisil bintic yac achuquic ta bahlumilal, ha nix hich ya yich' chuquel ta ch'ulchan; soc spisil bintic yac atilic ta bahlumilal, ha nix hich ya yich' tilel ta ch'ulchan. 19Yan buelta ya calbeyex, teme chebex yac achap ac'opic ta bahlumilal yu'un te biluc yac ac'anic, hich ya xpasbotex yu'un te Jtat ay ta ch'ulchan, 20como te banti ay stsoboj sbahic cha'oxtuhl ta scuenta jbihil, tey ayon ta yohlilic a, xchi te Jesús. 21Hich te Pedro nohpoj tal ta stojol te Jesús, hich la sjoc'obe: Cajwal, ¿jayeb buelta ya jpasbe perdón te quermano teme ya sta smul ta jtojole? ¿Ha bal huqueb buelta? xchi. 22Halbot yu'un te Jesús: Ma ba ya calbat te ha nax huqueb buelta, ha to huqueb buelta ta lajlajuneb schanwinic (70), xchi. 23Te cuentahinel yu'un te ch'ulchan hich c'ohem te bin ut'il jtuhl ajwalil te la sc'an la spas cuenta soc te a'batetic yu'une. 24C'alal hahch yich' cuenta te betiletic, ay jtuhl mach'a ay jpic soc ho'bahc' (10,000) talento te sbete. 25Te bin ut'il ma ba hu' yu'un stojel te sbete, la yal mandar te yajwal te ya yich' chonel soc yihnam soc yal-snich'nab soc spisil bintic ay yu'un scuenta stojel te sbete. 26Pero te a'bat la spahcan sba ta stojol, la yalbe bayel wocol: Cajwal, mahliybon, ya jtojbat spisil, xchi. 27Na'bot yo'bolil sba yu'un te yajwale, hich la sch'aybe te sbet soc la scoltay bahel. 28Pero c'alal loc' bahel te a'bate, la sta jtuhl smohlol ta a'batil te ay ho'winic (100) denario sbet yu'un; c'oht stsac, la spit' ta snuc', la yalbe: Tojbon te abete, la yut. 29Te smohlol ta a'batil la spahcan sba ta ye'tal yoc, la yalbe wocol: Mahliybon, ya jtojbat spisil, xchi. 30Pero ma ba la sc'an, ha baht yac' ta otsesel ta cárcel ha to c'alal la stoj te sbete. 31C'alal la yilic bin c'oht ta pasel te yantic smohlol ta a'batil, bayel la smel yo'tanic yu'un, hich baht yalbeyic ya'iy te ajwalil yu'unic spisil te bin c'oht ta pasel. 32Ha yu'un te a'bat ic'ot tal yu'un te yajwal, hich halbot yu'un: ¡Chopol a'batat! Spisil la jch'aybat abet yu'un la awalbon wocol. 33¿Ma bal hichuc la sc'an te la ac'uxultay te amohlol ta a'batil hich te bin ut'il la jc'uxultayat te ha'ate? la yut. 34Ha yu'un ilin te yajwal, la ya'be ta sc'ab mach'atic scuentahinejic yaq'uel castigo ha to c'alal la stoj spisil te sbete. 35Ha nix hich ya spasbeyex te Jtat ay ta ch'ulchan teme ma spisiluc awo'tan yac apasbe abahic perdón ta tuhlutuhl soc awermanotac, xchi te Jesús.


Copyright
Learn More

will be added

X\