San Mateo 15

1Ay talic ta stojol Jesús escribanohetic soc fariseohetic te talemic ta Jerusalén, hich hul yalbeyic: 2¿Bin yu'un te jnopojeletic awu'un yac xc'axuntaybelic te costumbre yu'un te mamaletique? ¿Bin yu'un ma ba nahil ya spoc sc'abic te c'alal ya xwe'ic? xchihic. 3Hich halbotic yu'un te Jesús: ¿Bin yu'un te ha'ex nix yac ac'axuntaybeyic te smandar Dios ta scuenta te costumbre awu'unique? 4Como hich la yal ta mandar te Dios: Ich'a ta muc' te ame'atat, xchi, soc: Te mach'a ya sbohlc'optay te stat o te snan ya me xlaj yu'un, xchi. 5Pero te ha'ex yac awalic: Mach'ayuc a te ya yalbe te stat o te snan: Ha smahtan Dios spisil te bintic sc'oblal ha'at ya ca'bat, teme xchihe, 6ma fuersahuc ya yich'ix ta muc' a te stat o te snane. Hich yac alajimbeyic sc'oblal te smandar Dios ta scuenta te costumbre awu'unique. 7¡Jchebal-o'tanex! Smelelil te bin la yalbeyex ac'oblalic te Isaías te c'alal hich la yal: 8Te pueblo ini ta ye nax ya yich'onic ta muc', pero te yo'tanic namal ayic ta jtojol, 9tojol ya sch'uhuntayonic, sc'op nax winiquetic te ya yaq'uic ta nopel, te xchihe, xchi. 10Te Jesús la yic'ticlan tal ta stojol te ants-winiquetic, hich la yalbe: A'iya awa'iyic soc na'beyahic scuentahil: 11Ma ba ya xjihnot te winic yu'un te bin ya x'och ta ye, ha ya xjihnot yu'un te bintic ya xloc' tal ta ye, xchi. 12Ha yu'un nohpojic tal ta stojol te jnopojeletic, hich la sjoc'obeyic: ¿La bal ana' te ma lecuc la ya'iyic te fariseohetic c'alal hich la ya'iyic? xchihic. 13La sjac' te Jesús: Spisil ts'unubiletic te ma ha'uc sts'unoj te Jtat ay ta ch'ulchan, ya me yich'ticlan bulel. 14Ac'a yil sbahic; ha'ic ts'o'sitetic te yac stojobtesbelic ts'o'sitetic; teme ts'o'sit nix te ya stojobtes ts'o'sit, pajal me ya xch'ayic cohel ta ch'en soc, xchi. 15La sjac' te Pedro: Hala ca'iycotic sc'oblal te sloc'ombahil c'op ini, xchi. 16La yal te Jesús: ¿Ha ni bal hichex te ma xana'beyic scuentahil? 17¿Ma bal yacuc ana'ic te spisil bintic ya x'och ta ehal ya xc'oht ta ch'uhtul, patil ya xloc' ta tsa'tayel? 18Yan te bin ya xloc' ta ehal ya xhahch tal ta o'tanil, ha me ya xjihnot yu'un te winique. 19Como ta o'tanil ya xloc' talel te bin chopol ta nopel, te milaw, antsiwej, chijil-o'tanil, elec', lehaw ta c'op soc te sbohlc'optayel Dios. 20Ha'ic ini te ya xjihnotic yu'un te winique; pero ma ha'uc ya xjihnot yu'un teme ma ba spocoj sc'ab a ya xwe'e, xchi. 21Loc' bahel tey a te Jesús, baht ta sq'uinal Tiro soc Sidón. 22Ay jtuhl Cananea-ants te tey hahchem talel a, tal yawtay te Jesús: ¡Cajwal, Snich'anat David, c'uxultayawon! Bayel yac ta uts'inel yu'un pucuj te cantsil-al, xchi. 23Pero ma ba jac'bot sc'op yu'un te Jesús. Ha yu'un nohpoj tal te jnopojeletic yu'un, hich la yalbeyic: Ticona suhtel, yu'un yac ta aw ta jpatic, xchihic. 24La sjac' te Jesús: Ha nax ticombilon tal ta stojol te ch'ayem tuminchijetic yu'un Israel, xchi. 25Pero te ants tal squejan sba ta stojol, hich la yal: ¡Cajwal, coltayawon! xchi. 26La sjac' te Jesús: Ma lecuc te ya yich' pojbeyel te pan yu'un te al-nich'aniletic yu'un ha ya yich' a'beyel swe'ic te bic'tal ts'i'etique xchi. 27Pero la yal te antse: Melel, Cajwal; pero te bic'tal ts'i'etic ya swe'ic te xeht'elul we'elil ya xch'ay cohel ta ye'tal smesa te yajwalique, xchi. 28Ha yu'un hich jac'bot yu'un te Jesús: ¡Ants, bayel sch'uhunel awo'tan! Ac'a c'ohtuc ta pasel te bin yac ac'ambel, xchi sc'oblal. Ha nix ta yorahil a lecub te yantsil-ale. 29Hahch bahel tey a te Jesús, c'oht ta Mar yu'un Galilea; mo bahel ta wits, tey c'oht shuhcan sba a. 30Bayel mach'atic talic ta stojol, la yic'ticlanic tal coxo'etic, ts'o'sitetic, uma'etic, nolc'abetic soc bayel yantic jchameletic, la ya'beyic ta ye'tal yoc te Jesús, te ha la slecubteslan. 31Te ants-winiquetic xcham yo'tanic yu'un te c'alal la yilic te c'opoj te uma'etic, lecub te nolc'abetic, behen te coxo'etic soc la yilic q'uinal te ts'o'sitetique. La yalbeyic bayel yutsil sc'oblal te Dios yu'un Israel. 32Te Jesús la yic'ticlan tal te jnopojeletic yu'un, hich la yal: Ya jna'be yo'bolil sba te ants-winiquetic, como yoxebalix c'ahc'al a te sjoquinejonic, mayuc bin ya swe'ic; ma jc'an ya jticonlan bahel como ma ba we'emic, ya wan xlaj yipic ta be, xchi. 33Ha yu'un la sjaq'uic te jnopojeletic yu'un: ¿Banti ya xhu' ya jtahcotic hich yipal pan li' ta jochol q'uinal yu'un ya xnoj sch'uhtic a te bayel ants-winiquetic? xchihic. 34Halbotic yu'un te Jesús: ¿Jaypehch pan ay awu'unic? xchi. Hucpehch soc cha'oxcoht bic'tal chayetic, xchihic. 35Te Jesús la spas ta mandar te ants-winiquetic te yacuc shuhcan sbahic ta lum. 36La stsac te hucpehch pan soc te chayetic, la yalbe wocol Dios yu'un, la xet'ticlan soc la yac'ticlambe te jnopojeletic yu'un; te jnopojeletic la spucticlambeyic te ants-winiquetique. 37We'ic spisilic, noj sch'uhtic; soc la stsobic te sobra te hile, huqueb moch noj a. 38Ay lajunbahc' (4,000) ta tuhl winiquetic te we'ic, ma ba la yich' ahtayel te antsetic soc te alaletique. 39C'alal laj sticombel bahel te ants-winiquetic, och ta barco, baht ta sq'uinal Magdala.


Copyright
Learn More

will be added

X\