San Mateo 13

1Ha nix yorahil a, loc' ta na te Jesús, c'oht shuhcan sba ta ti'mar. 2La stsob tal sbahic bayel ants-winiquetic; ha yu'un och ta barco te Jesús, la shuhcan sba tey a, spisil te ants-winiquetic ayic ta ti'ha'. 3Bayel bin la yalbe ya'iyic ta sloc'ombahil c'op, hich la yal: Ay jtuhl jts'umbajel loc' ta slihlinel sts'unub. 4Te c'alal yac ta slihlinel, ay c'oht ta ti'be, tal ta biq'uel yu'un ha'mal mutetic. 5Ay c'oht ta ba tontiquil te ma ba pim slumil, ora ch'ihy ta scaj te ma ba c'ubul te slumile; 6pero te c'alal loc' tal c'ahc'al, ora chic'ot yu'un soc taquij, yu'un ma ba c'uhben te slohp'e. 7Ay c'oht ta yohlil ch'ixileltic, c'alal tohy mohel te ch'ixetic, ha tenot yu'un. 8Pero ay c'oht ta lequil lum, la yac' sit, ay la yac' ho'winic (100), ay la yac' oxwinic (60), ay la yac' lajuneb scha'winic (30) ta p'ij te site. 9Te mach'a ay schiquin, ac'a me ya'iy, xchi. 10Te jnopojeletic nohpojic bahel ta sjoc'obeyel te Jesús: ¿Bin yu'un ta sloc'ombahil c'op yac ac'oponlan? xchihic. 11Halbotic yu'un te Jesús: Te ha'exe a'bibilex ana'ic te bin muquen ay yu'un te cuentahinel yu'un ch'ulchan, pero te yantique, ma ba a'bibil sna'ic stuquelic, 12como mach'ayuc a te ay bin ay yu'un, ya x'a'bot xan yan, hich me ay xan yan yu'un a. Pero te mach'a mayuc bin ay yu'un, ya me yich' pojbeyel te bin ay to nix yu'une. 13Ha scuentahil te ya jc'oponlan ta sloc'ombahil c'op: yu'un aunque sjel te ya yilic, ma ba ya yilic q'uinal, aunque sjel te ya ya'iyic, ma ba ya ya'iyic q'uinal soc ma ba ya sna'beyic scuentahil. 14Ha me yaquix ta c'ohel ta pasel ta stojolic te bin yaloj te jalwanej Isaías, te hich la yal: Yac awa'iybelic, pero ma xana'beyic scuentahil; yac awilbelic, pero ma xc'oht ta awo'tanic, 15como tonoben yo'tanic ha'i pueblo ini, wocol ya x'och c'op ta schiquinic, soc smuts'oj sitic; scuenta yu'un ma ba ya yilic ta sitic, ma ba ya ya'iyic ta schiquinic, ma ba ya xc'oht ta yo'tanic, soc ma ba ya suhtes yo'tanic, te ya jlecubtes te hichuque, te xchihe. 16Pero bayel yutsil asitic ha'ex como yac awilic, soc bayel yutsil achiquinic como yac awa'iyic. 17Jamal ya calbeyex, bayel jalwanejetic soc mach'atic toj yo'tanic yo'tanuc la yilic te bin yac awilbelic te ha'exe, pero ma ba la yilic stuquel, soc yo'tanuc la ya'iyic, pero ma ba la ya'iyic stuquel. 18A'iya me awa'iybeyic sc'oblal te sloc'ombahil c'op yu'un te jts'umbajel: 19Teme ay mach'a ya ya'iybe sc'oblal te cuentahinel yu'un Dios, pero ma ba ya sna'be scuentahil, ya xtal te mach'a chopol, ya sloq'uesbe te bin ts'umbil ta yo'tan. Ha sc'oblal te ts'unubil te c'oht ta ti'be. 20Te ts'unubil te c'oht ta ba tontiquil, ha sc'oblal te mach'a ya ya'iy te c'op soc tse'el yo'tan yu'un ta ora, 21pero bahal nax ay slohp', ma ba ya xhalaj; c'alal ya xtal wocol o uts'inel ta scuenta te c'op, ora ya xyahl. 22Te ts'unubil te c'oht ta yohlil ch'ixileltic, ha sc'oblal te mach'a ya ya'iy te c'op, pero te bin ya xbaht ta yo'tan sna'el te bintic ay ta bahlumilal soc te lo'loyel yu'un te c'uhlejalil ya stenic te c'ope, ma ba ya yac' sitinuc. 23Yan te ts'unubil te c'oht ta lequil lum, ha sc'oblal te mach'a ya ya'iy soc ya xc'oht ta yo'tan te c'ope; ya yac' sit ta ho'winic (100), ta oxwinic (60) o ta lajuneb scha'winic (30), xchi te Jesús. 24Ay yan sloc'ombahil c'op halbot ya'iyic yu'un te Jesús, hich la yal: Te cuentahinel yu'un te ch'ulchan, hich c'ohem te bin ut'il jtuhl winic te la slihlin ts'unubil ta sq'uinal; 25pero wayal spisilic a tal te scontra, la slihlin ac ta yohlil te trigo, loc' bahel. 26C'alal col tal te trigo soc sitin, tey chicnaj a te aque. 27Talic te a'batetic yu'un te yajwal, hich la yalbeyic: Cajwal, ¿ma bal lequil ts'unubiluc te la ats'un ta aq'uinal? ¿Banti tal te aque? xchihic c'ohel. 28Ha jcontra te hich la spase, xchi te yajwal q'uinale. ¿Ya bal ac'an te ya jbulticlancotic? xchihic te a'batetic. 29Halbotic yu'un te yajwalic: Ma'uc, ay wan pajal yac abulic te trigo soc te aque. 30Pajal ac'a coluc soc ha to ta yorahil ya yich' bojel; ta yorahil te ya yich' bojel hich ya calbe te jboj-trigohetic: Ha nahil xatsobic te aque, tomticlanahic ta chuquel yu'un ya yich' chiq'uel; yan te trigo tsobahic ochel ta snahul cu'un stuquel, ya me cut, xchi te Jesús. 31Ay yan sloc'ombahil c'op la yalbe ya'iyic, hich la yal: Te cuentahinel yu'un te ch'ulchan hich c'ohem te bin ut'il sbac' mostaza te ay mach'a la yich' bahel, la sts'un ta sq'uinal. 32Melel ha mero tut yu'un spisil yantic ts'unubiletic, pero te c'alal ya xcol tal, c'ax hich smuc'ul ya xc'oht a te bin ut'il te yantic ts'unubiletic ta yawil ts'unubil, te' ya xc'oht, ya xtal te ha'mal mutetic, ya spas spechechic ta sc'abc'ab, xchi. 33Ay yan sloc'ombahil c'op la yalbe ya'iyic: Te cuentahinel yu'un te ch'ulchan hich c'ohem te bin ut'il levadura te jtuhl ants la swots' soc oxp'is harina ha to c'alal la spajubtes spisil, xchi. 34Ha nax ta sloc'ombahil c'op la sc'opon te ants-winiquetic te Jesús, mayuc bin la yalbe teme ma ha'uc ta sloc'ombahil c'op. 35Hich c'oht ta pasel a te bin yaloj te jalwanej, te hich la yal: Ya xc'opojon ta sloc'ombahil c'op, ya cac'ticlan ta na'el te bintic muquen ay ta shahchel to tal te bahlumilal, te xchihe. 36Hich te Jesús la yihquitay hilel te ants-winiquetic, och bahel ta na. Te jnopojeletic nohpojic tal ta stojol, hich la yalbeyic: Hala ca'iycotic sc'oblal te sloc'ombahil c'op yu'un te ac te ts'umbil ta q'uinal, xchihic. 37Hich la sjac' te Jesús: Te mach'a ya sts'un te lequil ts'unubil, ha te Nich'anil ay ta scuenta winic. 38Te q'uinal, ha te bahlumilal; te lequil ts'unubil, ha te al-nich'anetic yu'un te cuentahinel yu'un te ch'ulchan, soc te ac, ha te yal-snich'nab te mach'a chopol. 39Te jcontra te la sts'un te ac, ha te pucuje; te yorahil tsob-trigo, ha te slajibal c'ahc'al, soc te jtsob-trigohetic, ha te ch'ul a'batetique. 40Hich te bin ut'il ya yich' bulel te ac soc ya yich' chiq'uel ta c'ahc', hich ya xc'oht ta pasel ta slajibal c'ahc'al. 41Te Nich'anil ay ta scuenta winic ya me sticon bahel te ch'ul a'batetic, ya me stsobic tey ta yohlil banti ay te cuentahinel yu'un spisil mach'atic ya ya'be sta smulic soc te ya spasic te bintic chopol, 42ya yotseslanic ta horno yu'un c'ahc'; tey ya xc'oht yoq'uetay sbahic a soc tey ya xc'oht sc'uxuxan yehic a. 43Te mach'atic toj yo'tanic hich me ya xtihlic te bin ut'il te c'ahc'al tey ta banti ay te cuentahinel yu'un te Statique. Te mach'a ay schiquin, ac'a me ya'iy. 44Te cuentahinel yu'un te ch'ulchan hich c'ohem te bin ut'il c'uhlejalil mucul ta lum, te ay mach'a la sta soc la scha'muc xan hilel; tse'el yo'tan a baht schon spisil bintic ay yu'un, ha baht sman te q'uinale. 45Soc te cuentahinel yu'un te ch'ulchan hich c'ohem te bin ut'il jtuhl jmambajel te ya sle lequil perlahetic; 46c'alal la sta jun perla te mero t'ujbil, baht schon spisil bintic ay yu'un, ha la sman. 47Soc te cuentahinel yu'un te ch'ulchan hich c'ohem te bin ut'il tsaco-chay te ya x'otsesot cohel ta ha', ya stsob spisil ta chahp chayetic. 48C'alal nojix a, ya sloq'uesic ta ti'ha', ya shuhcan sbahic, ya yaq'uic ta moch te banti lequic, ya sch'ojic bahel te banti ma lecuque. 49Hich ya xc'oht ta slajibal c'ahc'al; ya me xloc' tal te ch'ul a'batetic, parte ya yaq'uic te mach'atic toj yo'tanic, parte ya yaq'uic te mach'atic chopol yo'tanic 50soc ha ya sch'ojic ochel ta horno yu'un c'ahc'; tey ya xc'oht yoq'uetay sbahic a, soc tey ya xc'oht sc'uxuxan yehic a, xchi. 51Hich joc'obotic yu'un te Jesús: ¿La bal ana'beyic scuentahil spisil ini? xchi. La jna'cotic, xchihic. 52Ha yu'un spisil escribano te snopbeyej sc'oblal te cuentahinel yu'un te ch'ulchan hich c'ohem te bin ut'il jtuhl yajwal na te ya stsa loq'uel tal ta yawil te bin yach'il soc te bin poco'ix, xchi te Jesús. 53C'alal laj yo'tan te Jesús ta yalel spisil te sloc'ombahil c'opetic ini, loc' bahel tey a. 54C'alal c'oht ta slumal, la ya'iy p'ijubteswanej ta sinagoga yu'unic; xcham yo'tanic yu'un, hich la yalic: ¿Banti la sta te sp'ijile soc bin ut'il ya xhu' yu'un spasel te jchahp a'teliletic ini? 55¿Ma bal ha'uc snich'an te carpintero? ¿Ma bal ha'uc snan te María, soc ma bal ha'uc yihts'inab te Jacobo, José, Simón soc te Judas? 56¿Ma bal li'uc joctic spisil yihts'inab ach'ixetic? ¿Ha yu'un banti la sta spisil ini? xchihic. 57Hich bohlob yo'tanic ta stojol. Pero hich halbotic yu'un te Jesús: Te jalwanej ay ta ich'el ta muc', ha nax ma x'ich'ot ta muc' ta slumal soc ta sna, xchi yu'un. 58Hich mayuc bayel la spas jchahp a'teliletic tey a, ta scaj te mayuc sch'uhunel yo'tanic.


Copyright
Learn More

will be added

X\