San Mateo 12

1Ta hich ora ta jun sc'ahc'alel cux-o'tan c'ax Jesús ta banti ts'umbil trigo. Ay swi'nalic te jnopojeletic yu'un, ha yu'un hahch sjixticlan ta sc'abic te sit te trigo soc la swe'ic. 2C'alal ilotic yu'un te fariseohetic, hich la yalbeyic: Ilawil, te jnopojeletic awu'un yac spasbelic te bin ma hichuc ya sc'an pasel ta sc'ahc'alel cux-o'tan, xchihic. 3Pero halbotic yu'un te Jesús: ¿Yu'un bal ma ba awilojic ta hun te bin la spas te David te c'alal ay swi'nal soc te mach'atic sjoquinej; 4ha te och ta sna Dios, la swe' te pan ac'bil ta stojol Dios, te ma hichuc ya sc'an pasel te ya swe' te David o te mach'atic sjoquinej, te ha nax ya xhu' ya swe'ic te sacerdotehetique? 5Soc ¿yu'un bal ma ba awilojic ta Ley te ta sc'ahc'alel cux-o'tan te sacerdotehetic ta Templo ya sjimbe sc'oblal te sc'ahc'alel cux-o'tan, pero ma yu'unuc ha smulic ya xhil? 6Ya calbeyex te li' ay te mach'a c'ax hich sc'oblal a te bin ut'il te Templo. 7Te ha'uc la ana'beyic scuentahil te hich ya yal: Ha ya jc'an te yac awa'iyic c'uxultaywanej, ma ha'uc ya jc'an milbil mahtaniletic, te xchihe, ma ba yac atojol-lehbeyic smul te mach'atic mayuc smulic te hichuque. 8Como te Nich'anil ay ta scuenta winic ha Ajwalil yu'un te sc'ahc'alel cux-o'tan, xchi. 9Sohl bahel tey a te Jesús, c'oht ta sinagoga yu'unic. 10Ay jtuhl winic tey a te chamen schihal sc'ab. La sjoc'obeyic te Jesús yu'un ya slehbeyic smul a: ¿Lec bal te ya yich' lecubtesel ta sc'ahc'alel cux-o'tan? xchihic. 11Hich halbotic yu'un te Jesús: ¿Ay bal mach'a ay ta awohlilic te ay stuminchij te ya xch'ay cohel ta ch'en ta sc'ahc'alel cux-o'tan te ma ba ya stsac loq'uel? 12¿Ma bal c'ax to xan hich ay sc'oblal jtuhl winic a te bin ut'il jcoht tuminchij? Ha yu'un ha stojil te ya yich' pasel te bin lec ta sc'ahc'alel cux-o'tan, xchi sc'oblalic. 13Ha yu'un hich la yalbe te winique: Xach'a ac'ab, xchi. Hich la xach' sc'ab, lecub, hich c'oht te bin ut'il te yan sc'abe. 14Ha yu'un loq'uic bahel te fariseohetic, baht schapic bin ya yut ya smilic te Jesús. 15C'alal hich la sna' te Jesús, loc' hahchel tey a. Bayel mach'atic t'unot bahel yu'un, spisil la slecubteslan, 16soc la spasticlan ta mandar te ma me spucbeyic sc'oblal, 17scuenta yu'un hich ya xc'oht ta pasel a te bin yaloj te jalwanej Isaías, te hich la yal: 18Ha ca'bat ini te tsahbil cu'un; te c'ux ta co'tan, te bayel yutsil co'tan yu'un. Ya ca'be ta stojol te Espíritu cu'un, ha ya spuc ta halel ta stojol jyanlumetic te bin toj ta pasele. 19Ma ba ya shach c'op, ma ba ya x'awon, ma ba ya x'a'iybot sc'op ta callehetic. 20Ma ba ya slajin swaq'uel te jalal te waq'uelix, ma ba ya stup'be sc'ahc'al te xutunte' yac ta tihlel, ha to teme la yac' c'ohtuc ta pasel te bin stojil ta pasele. 21Ha nix sbihil te ya smuc'ulin yo'tanic te jyanlumetic, te xchihe. 22La yiq'uic tal ta stojol jtuhl winic te ay pucuj ta yo'tan soc ts'o'sit soc uma'; la slecubtes, hich la yil q'uinal soc c'opoj. 23Spisil te ants-winiquetic, xcham yo'tanic yu'un, hich la yalic: ¿Ha ni bal te Snich'an David ini? xchihic yu'un. 24Yan te fariseohetic, c'alal la ya'iyic, hich la yalic: Ha nax ta scuenta Beelzebú te yajaw pucujetic te ya sloq'ues a te pucujetique, xchihic. 25Na'bot yo'tanic yu'un te Jesús, hich halbotic: Spisil banti junax cuentahimbil te ya scontrahin sba, ya me xjihn, soc spisil pueblo o na te ya scontrahin sba, ma ba ya xhalaj. 26Te Satanás teme ya sten bahel Satanás, ha nix ya scontrahin sba. ¿Bin ut'il c'an halajuc te ban cuentahimbil yu'une? 27Teme ta scuenta Beelzebú ya jloq'ues pucujetic, ¿mach'a ta scuenta hiche te ya sloq'ueslan pucujetic te awal-anich'anique? Ha yu'un ha'ic me ya schahpanex. 28Yan teme ta scuenta te Espíritu yu'un Dios ya jloq'ues pucujetic, yu'un nix ha hulix ta atojolic te cuentahinel yu'un te Diose, 29como ¿bin ut'il c'an ochintaybeyec sna te winic te ay yip yu'un ya spojbe sbiluc, teme ma nahiluc ya yich' chuquel? Ha to ya xhu' ya spojbe sbiluc a abi. 30Te mach'a ma ba jun yo'tan ta jtojol, ha scontrahinejon abi; soc te mach'a ma ba ya sjoquinon ta stsobel, ha yac spucbel. 31Ha yu'un ya calbeyex, spisil muliletic soc spisil sbohlc'optayel Dios ay perdón yu'un; yan te sbohlc'optayel te Ch'ul Espíritu, mayuc perdón yu'un stuquel. 32Mach'ayuc a te ay bin ya yal ta scontrahinel te Nich'anil ay ta scuenta winic, ya xpasbot perdón yu'un; yan te mach'a ay bin ya yal ta scontrahinel te Ch'ul Espíritu, ma ba ya xpasbot perdón stuquel, ni ha'uc ta ora ini o ta patil. 33Teme lec te te', lec sit ya yac'; teme ma lecuc te te', ma lecuc te sit ya yac', como ta scuenta sit ya xna'bot sba te te'e. 34¡Sts'umbalex jti'awal chanetic! ¿Bin ut'il c'an lecuc ac'opic te chopolexe? Como ya xloc' ta ehal te bintic nojel ta o'tanil. 35Te mach'a lec ta winiquil ya xloc' ta ye te bintic lec sq'uejoj ta yo'tan; te mach'a chopol ta winiquil, ya xloc' ta ye te bintic ma lecuc sq'uejoj ta yo'tan. 36Ya calbeyex te spisil c'op te mayuc stuc te ya yalic te ants-winiquetic ya me xc'ohtic ta ich'el ta c'op yu'un ta yorahil chahpanel. 37Como ta scuenta ac'op ya xhalot te mayuc amul, soc ta scuenta ac'op ya xhalot ay amul, xchi sc'oblalic yu'un te Jesús. 38Ha yu'un ay escribanohetic soc fariseohetic te la yalbeyic: Maestro, ya jc'an ya quilbatcotic seña awu'el, xchihic. 39La sjac' te Jesús: Te jcaj ts'umbalil te chopol yo'tanic soc te j'antsiwejetic ya sc'an ya yilbonic seña cu'el, pero mayuc seña ya x'a'bot yilic, ha nax te seña te jalwanej Jonás. 40Como hich te bin ut'il oxeb c'ahc'al soc oxeb ahc'abal ay ta sch'uht muc'ul chay te Jonás, ha nix hich te Nich'anil ay ta scuenta winic oxeb c'ahc'al soc oxeb ahc'abal ya x'ayin ta ye'tal lum. 41Te yajwal Nínive pajal me ya stehc'an sbahic ta yorahil ich'el ta c'op soc te jcaj ts'umbalil ini, ya xhalbot smulic yu'un, como la suhtes yo'tanic yu'un te bin halbotic yu'un te Jonás, pero ha toyol yu'un Jonás te mach'a li' aye. 42Te ajwalil-ants ta stojol Sur pajal me ya stehc'an sba ta yorahil ich'el ta c'op soc te jcaj ts'umbalil ini, ya xhalbot smulic yu'un, como c'alal ta sti'il bahlumilal hahch tal ya'iybe sp'ijil-c'op te Salomón, pero ha toyol yu'un Salomón te mach'a li' aye. 43Te c'alal ya xloc' ta yo'tan winic te chopol espíritu, ya xbehen ta taquin q'uinal, yac slehbel banti ya scux yo'tan, pero ma ba ya sta. 44Ha yu'un ya yal: Ya suhton bahel ta jna te banti loq'uemon tal, xchi. C'alal ya xc'oht tey a, jochol, buen mesbil soc buen ch'albil a ya xhul sta. 45Ha yu'un ya xbaht yic' talel huqueb xan chopol espírituhetic te c'ax hich schopolilic a, ya x'ochic soc tey ya xnahinic a; c'ax hich chopol ya xc'oht a te winic te bin ut'il ay ta nahil to. Ha nix hich ya xc'oht te jcaj ts'umbalil ini, xchi te Jesús. 46C'alal hich yac ta yalbeyel a te ants-winiquetic, tec'ajtic hulel ta fuera te snan soc te yihts'inab, yo'tanuc ya sjuquic ta c'op. 47Ay mach'a la yalbe te Jesús: Li' teq'uel ta fuera te anan soc te awihts'inab, yo'tanuc ya sjucat ta c'op, xchi. 48Te Jesús la sjac'be sc'op te mach'a hich halbot yu'une: ¿Mach'a a te jnan soc mach'a a te quihts'inab yac awale? xchi. 49La shach sc'ab ta stojol te jnopojeletic yu'un, hich la yal: Ha jnan soc ha quihts'inab ini. 50Como spisil te mach'atic ya spasbeyic te bin ya sc'an yo'tan te Jtat ay ta ch'ulchan, ha quihts'inab soc ha jnan stuquel, xchi.


Copyright
Learn More

will be added

X\