San Mateo 11

1C'alal laj yo'tan te Jesús ta snohptesel te lahchaytuhl (12) jnopojeletic yu'une, hahch bahel tey a, baht ya'iy p'ijubteswanej soc yalel sc'op Dios ta yantic pueblohetic yu'unic. 2Te Juan te ay ta cárcel, c'alal la ya'iy te bin yac spasbel te Cristo, hich la sticon bahel cheb jnopojeletic yu'un ta sjoc'obeyel: 3¿Ha'at laj bal te mach'a sc'oblal ya xtal o ya bal jmahliycotic yan? xchihic c'ohel. 4Hich la sjac' te Jesús: Bahanic, a'beyahic sna' te Juan te bintic yac awa'iybelic soc te bintic yac awilbelique: 5Ya yiliquix q'uinal te ts'o'sitetic, ya xbeheniquix te coxo'etic, lecubtesbiliquix te jc'a'el-chameletic, ya ya'iyiquix q'uinal te cohquetic, la yich'iquix cha'cuxajtesel mach'atic chamenic, soc yaquix ta halbeyel ya'iy te lec yach'il c'op te pobrehetique. 6Bayel me yutsil te mach'a ma ba ya sc'ohchin sba ta jcuenta, xchi. 7C'alal suhtic bahel a, te Jesús hahch yalbe sc'oblal te Juan ta stojol te mach'atic tey ayic a: ¿Bin a te loc' tal awilic ta jochol taquin q'uinal, ha bal jalal yac ta yuq'uilanel ta ic'? 8¿Bin tal awilic, ha bal jtuhl winic te slapoj buen fino pac'? Te mach'atic slapojic buen fino pac', ayic ta sna ajwaliletic stuquelic. 9Pero ¿bin loc' tal awilic hiche, ha bal jtuhl jalwanej? Melel nix a, soc ya calbeyex te ha c'ax hich a te bin ut'il jalwanej, 10como ha nix sc'oblal ini te bin ts'ihbabil hilel: Ya jticon te jal-c'op cu'un te nahil ya xbaht awu'un, te ha ya schahpambat abe ta atojol, te xchihe. 11Jamal ya calbeyex, spisil mach'atic alataybilic yu'un ants, mayuc chicnajem te c'ax hich sc'oblal a te bin ut'il Juan te J'ac'-ich'-ha'. Pero te mach'a c'ax peq'uel ay ta banti ay te cuentahinel yu'un te ch'ulchan ha toyol c'ohem yu'un te Juan. 12C'alal ta yorahil te Juan te J'ac'-ich'-ha' yalel c'alal ora, bayel ya yich' uts'inel te cuentahinel yu'un te ch'ulchan, soc te j'uts'inwanejetic ya sc'an ya stsaquic ta fuersa. 13Spisil te jalwanejetic soc te Ley la yalic sc'op Dios ha to ta yorahil te Juan. 14Te yacuc ac'an yac ach'uhunic, te Juan ha nix te Elías te sc'oblal ya xtale. 15Te mach'a ay schiquin, ac'a ya'iy. 16¿Bin ya jpaj soc a te mach'atic cuxajtic ta ora ini? Ha pajal ayic soc te queremetic te huhcajtic ta plaza te hich ya yawtayic te smohloltac: 17La jcoq'uesimbeyexcotic amay, pero ma ba ahc'otajex; la jc'ayojtaybeyexcotic c'ayoj yu'un mel-o'tan, pero ma ba oq'uex, xchihic; 18yu'un tal te Juan te ma ba we' uch', hich ya yalic: Ay pucuj ta yo'tan, xchihic. 19Tal te Nich'anil ay ta scuenta winic te ya xwe' x'uch' stuquel, hich ya yalic: Bayel ya xwe' soc ya yuch' vino, ha jun yo'tan sba soc te jc'an-patanetic soc yantic jmulawiletic, xchihic. Pero te p'ijil-o'tanil ya xchicnaj ta scuenta te yal-snich'nabe, xchi te Jesús. 20Te Jesús hahch stahticlan ta halel te pueblohetic banti la spasticlan ta ilel bayel ta chahp a'teliletic, como ma ba la sc'an la suhtes yo'tanic, hich la yal: 21¡Ay me awocol, Corazín! ¡Ay me awocol, Betsaida! Te ha'uc la yich' pasel ta Tiro soc ta Sidón te jchahp a'teliletic te la yich' pasel ta atojolic, namey la suhtes yo'tanic, la slapiquix pac' yu'un mel-o'tan soc la shuhcanix sbahic ta tan te hichuque. 22Ha yu'un ya calbeyex te ta yorahil ich'el ta c'op ha peq'uel castigo ya yich' te Tiro soc te Sidón te bin ut'il ya yich' te Corazín soc te Betsaida. 23Soc ha'at, Capernaum, te awich'oj tohytesel c'alal ta ch'ulchan, ya me awich' ch'ojel bahel c'alal ta stsobojibal mach'atic chamenic. Te teyuc la yich' pasel ta Sodoma te jchahp a'teliletic te la yich' pasel ta atojol, cuxul c'alal ora te hichuque. 24Ha yu'un ya calbeyex te c'alal ya sta yorahil ich'el ta c'op ha peq'uel xan castigo ya yich' te Sodoma te yac awich' te ha'ate, xchi te Jesús. 25Ta hich ora la yal te Jesús: Ya calbat yutsil ac'oblal, Jtat, Yajwalat ch'ulchan soc bahlumilal, yu'un ma ba la awa'be sna'ic ha'i c'op ini te mach'atic p'ij yo'tanic soc te mach'atic ay bintic ya sna'ic, ha la awa'be sna'ic te bic'tal alaletique. 26Hichuc, Jtat, yu'un hich la sc'an awo'tan. 27Spisil te bintic ay, a'bibilon ta jc'ab yu'un te Jtate; soc mayuc mach'a ya sna'be sba te Nich'anil, ha nax te Tatil te ya sna'be sba, soc mayuc mach'a ya sna'be sba te Tatil, ha nax te Nich'anil te ya sna'be sba soc te mach'atic ya sc'an ya x'a'botic sna'beyic sba yu'un te Nich'anil. 28La'ic ta jtojol apisilic te luhbunex soc te ay awihcatsic, ho'on ya ca'beyex acux awo'tanic. 29Ich'bonic te yugo cu'un soc nopbonic co'tan, como manso soc peq'uel co'tan, hich yac atahic cux-o'tanil yu'un ach'uhlelic a, 30como ma ba wocol ta ich'el te yugo cu'un soc ma ba al te ihcatsil cu'une, xchi.


Copyright
Learn More

will be added

X\