San Mateo 10

1Te Jesús la yic'ticlan tal te lahchaytuhl (12) jnopojeletic yu'un, la yac'ticlambe ya'tel ta sloq'uesel pucujetic soc ta slahmajtesel spisil chameletic soc spisil te ban c'uxic. 2Hich ay te sbihilic te lahchaytuhl jpuc-c'opetique: Ha primero te Simón, te Pedro yan sbihil, soc Andrés te yihts'ine; Jacobo te snich'an Zebedeo, soc Juan te yihts'ine; 3Felipe, Bartolomé, Tomás, Mateo te jc'an-patan, Jacobo snich'an Alfeo, Lebeo, te Tadeo yan sbihile, 4Simón te cananeo, soc Judas Iscariote, ha te la yac' ta c'abal te Jesús. 5Te Jesús la sticonlan bahel te lahchaytuhl, hich la snohpteslan bahel: Ma me xbahex ta sq'uinal jyanlumetic soc ma me x'ochex bahel ta slumal samaritanohetic, 6ha nax me ya xbahex ta stojol te ch'ayem tuminchijetic yu'un Israel. 7C'alal yaquex ta bahel a, halahic te sc'op Dios, hich me xawalic: Nopolix ay te cuentahinel yu'un te ch'ulchan, xchihanic me. 8Ya me alecubteslanic jchameletic soc jc'a'el-chameletic, ya me acha'cuxajtesic mach'a chamenic, soc ya me aloq'ueslanic pucujetic. Ta mahtanil la awich'ic, hich ni me ta mahtanil yac awaq'uic. 9Ma me xawich'ic bahel oro, plata o cobre ta schuhquil ach'uhtic; 10ma me xawich' achojaq'uic ta behel, o cha'lihc ac'u'ic, yan atepic, o yan anahbate'ic, como te j'a'tele tey nix ya xhu' ya sta swe'el a. 11Ta bayuc muc'ul pueblo o tut pueblo banti ya x'ochex, joc'oya awa'iyic mach'a lec yo'tan tey a, tey ya xwayex a ha to c'alal ya xloq'uex bahel. 12C'alal ya xc'ohex tey ta na, patbeyahic yo'tan. 13Teme lec yo'tan te yajwal na, ya me xc'oht ta stojol te lamal q'uinal awu'unique; yan teme ma ba lec yo'tan, ya me suht tal ta atojolic te lamal q'uinal awu'unique. 14Teme ay mach'a ma ba ya yiq'uex ochel soc teme ma ba ya sc'an ya ya'iybeyex te ac'opique, loc'anic bahel ta na o ta pueblo tey a, soc tihtina hilel slumil awoquic. 15Jamal ya calbeyex, ta yorahil ich'el ta c'op peq'uel xan castigo ya yich' te Sodoma soc Gomorra te bin ut'il ya yich' ha'i pueblo ini. 16Ya jticonex bahel hich te bin ut'il tuminchijetic ta yohlil chojetic. Ha yu'un p'ijanic me hich te bin ut'il chan soc lamaluc me awo'tanic hich te bin ut'il stsuhmut. 17Tsahtaya me abahic ta stojol te winiquetic, como ay me ya yaq'uex ta sc'ab mach'atic ay ya'telic ta chahpanwanej, soc ay me ya yaq'uex ta majel ta sinagogahetic yu'unic. 18Soc ay ya xtehc'anotex ta stojol gobernadoretic soc ajwaliletic ta jcuenta, scuenta testigo ya xc'ohex cu'un ta stojolic soc ta stojol te jyanlumetique. 19Teme ac'otex ta c'abal, ma me xanopilan ta awo'tanic bin ya xc'oht awalic soc bin ut'il yac ajaq'uic te c'ope, como ta yorahil ya x'a'botex te bin yac awalique, 20como ma ha'uquex te ya xc'opojex, ha ya xc'opoj ta acuentahic te Espíritu yu'un te Atatique. 21Te jtuhle ya yac' ta milel te yermano, te tatil ya yac' ta milel te snich'ane. Te al-nich'anetic ya scontrahinic te sme'static soc ya me yaq'uic ta milel. 22Ya me yihlayex spisilic ta scaj te jbihile, pero te mach'a jun yo'tan ya xhil c'alal ta slajibal, ya me xcol stuquel. 23C'alal ya yuts'inex ta banti jun pueblo, ahnanic bahel ta yan pueblo. Como jamal ya calbeyex te ma to ba lajem abehentaybelic spisil a te pueblohetic yu'un Israel te ya xtal te Nich'anil ay ta scuenta winic. 24Te jnopojel, ma ha'uc toyol yu'un te maestro yu'une, soc te a'bat ma ha'uc toyol yu'un te yajwale. 25Tic'uc a te jnopojel te pajal ya xc'oht soc te maestro yu'un, soc te a'bat te pajal ya xc'oht soc te yajwale. Teme a'bot sbihilin Beelzebú te tatile, ¿ha'uc to balix a te mach'atic ay yu'un ta sna? 26Ha yu'un ma me xaxi'ic; como mayuc bin mucul te ma ba ya yich' chicnajtesel, mayuc bin muquen te ma ba ya xna'ot. 27Te bin ya calbeyex ta yihc'al q'uinal, jamal xawalic ta sacal q'uinal; soc te bin yac awa'iy ta muquen ta achiquinic, halahic ta ba nahetic. 28Ma xaxi'ic te mach'atic ya smilbeyex abaq'uetalic, te ma xhu' yu'un ya smilbeyex ach'uhlelic; ha me xaxi'ic te Mach'a ya xhu' ya slajin ta infierno te ach'uhlel soc abaq'uetal. 29¿Ma bal ya schonic cha'coht tut mutetic ta asarion? Pero ma ba ya xch'ay cohel ta lum jcohtuc teme ma hichuc ya sc'an yo'tan te Atatique. 30Ahtaybil spisil te stsotsel ajolique. 31Ha yu'un ma me xiwex; c'ax hich ac'oblalic a te bin ut'il te tut mutetique. 32Mach'ayuc a te ya yal ta stojol ants-winiquetic te ya sna'bon jba, ha nix hichon ya cal ta stojol te Jtat ay ta ch'ulchan te ya jna'be sbahe. 33Yan te mach'a ya smucon ta yo'tan ta stojol ants-winiquetic, ha nix hichon ya jmuc ta co'tan ta stojol te Jtat ay ta ch'ulchane. 34Ma me xacuyic te tal cac' lamal q'uinal ta bahlumilal; ma ba tal cac' lamal q'uinal, ha tal hach guerra, 35como talemon yu'un ya scontrahin sba soc stat te winique, te ach'ix ya scontrahin sba soc snan, soc te alibal ya scontrahin sba soc yalibme'el. 36Te scontra te winic ha nix te mach'atic ay yu'un ta sna. 37Te mach'a c'ax hich c'ux ta yo'tan a te sme'stat te bin ut'il te ho'one, ma xtuhun cu'un. Te mach'a c'ax hich c'ux ta yo'tan a te yal-snich'anic te bin ut'il te ho'one, ma xtuhun cu'un. 38Soc te mach'a ma ba ya yich' bahel scruz soc ya st'unon, ma ba ya xtuhun cu'un. 39Te mach'a c'ux ya ya'iy te scuxlejal, ya me xch'ay scuxlejal; yan te mach'a ya xch'ay te scuxlejal ta jcuenta, ha me ya sta stuquel. 40Te mach'a ya yiq'uex, ho'on me ya yic'on abi; te mach'a ya yic'on, ha me ya yic' te Mach'a la sticonon tale. 41Te mach'a ya yic' jtuhl jalwanej ta scuenta bin ut'il jalwanej, ya me yich' mahtanil te ha smahtan jalwanej; soc te mach'a ya yic' te mach'a toj yo'tan ta scuenta bin ut'il toj yo'tan, ya me yich' mahtanil te ha smahtan mach'a toj yo'tane. 42Mach'ayuc a te ya ya'be junuc vaso siquil ha' jtuhluc te peq'uel ay te bin ut'il ha jnopojel, jamal ya calbeyex te ma ba ya xch'ay te smahtane, xchi te Jesús.


Copyright
Learn More

will be added

X\