San Marcos 5

1C'ohtic ta loq'uel ta jehch mar, ta sq'uinal te gadarenohetic. 2C'alal loc' ta barco te Jesús, tal ta tahel yu'un jtuhl winic te loq'uem tal ta muquenaletic, te ay bohl espíritu ta yo'tan. 3Nahinem ta muquenaletic, mayuc mach'a ya xhu' ya schuc ni ha'uc ta cadena. 4Bayelix buelta la yich' chucbeyel yoc sc'ab ta cadena, pero la stuch'ticlan. Mayuc mach'a hu' ta chuquel yu'un. 5C'ahc'al ahc'abal behen ta ha'maltic soc ta muquenaletic, yac ta aw soc yac yehchenteslambel sba ta ton. 6C'alal namal to ay a te Jesús, la yil soc ahnimal baht squejan sba ta stojol. 7Tulan c'opoj, hich la yal: ¿Bin awochelon a, Jesús, Snich'anat Dios te mero toyol ay? ¡Hala ta jamal ta stojol Dios te ma ba yac awuts'inon! xchi, 8yu'un hich halbotix yu'un te Jesús: Bohl espíritu, loc'an ta yo'tan te winique, la yut. 9Te Jesús la sjoc'obe: ¿Bin abihil? xchi. Legión jbihil, como tsobolotcotic, xchi. 10Soc x'ajwalc'opojic te manchuc ya xticonotic loq'uel ta yan lugar. 11Ay jtsohb chitametic yacalic ta we'el ta nopol tsehl. 12Te pucujetic x'ajwalc'opojic: Ticonawotcotic bahel te banti ay te chitametic yu'un ya x'ochotcotic ta yo'tanic, xchihic. 13Ora ac'otic bahel yu'un te Jesús. Hich loq'uic te bohl espírituhetic, ochic ta yo'tan te chitametic, ay wan ho'bahc' (2,000) ta coht. La sch'ojticlan cohel sbahic ta shehmelul q'uinal ta mar, tey la sjiq'uic ha' a. 14Te jcanan-chitametic loq'uic ta ahnel, la spuquic ta halel ta pueblo soc ta bayuc. Hich loq'uic tal ta yilel te bin c'oht ta pasele. 15C'alal c'ohtic ta banti ay te Jesús, la yilic te winic te ay tsobol pucuj ta yo'tan, huculix, slapojix sc'u' spac', soc ya sna'ix q'uinal; hich xiwic yu'un. 16Te mach'atic te la yilic bin pasbot te mach'a ay pucuj ta yo'tan soc te bin pasbot te chitametic, la spucbeyic sc'oblal yantic. 17Hich hahch sc'ambeyic te Jesús te yacuc xloc' bahel ta sq'uinalic. 18Te c'alal yac ta ochel ta barco a te Jesús, halbot wocol yu'un te winic te ay pucujetic ta yo'tan ta nahil to te yacuc sjoquin bahel. 19Pero ma ba ic'ot bahel yu'un te Jesús, hich halbot: Bahan ta ana, halbeya ya'iy te mach'atic ay awu'un te bin muc' la spasbat te Cajwaltic soc bin ut'il la sc'uxultayat, xchi sc'oblal. 20Hich baht te winique, hahch spuc ta halel te bin muc' pasbot yu'un te Jesús; ta spisilic xcham yo'tanic yu'un. 21C'alal cha'suht ta barco ta jehch mar te Jesús, bayel ants-winiquetic la stsob tal sbahic ta stojol; ay ta ti'mar a te Jesús. 22Tal jtuhl principal yu'un te sinagoga, Jairo sbihil. C'alal la yil te Jesús la squejan sba ta ye'tal yoc, 23soc hich la yalbe bayel wocol ta stojol: Chamelix te cantsil-nich'an. Con, cajambon ac'ab ta stojol scuenta yu'un hich ya xcol a, hich cuxul ya xhil, xchi. 24Hich te Jesús la sjoquin bahel te winique. T'unot bahel yu'un tsobol ants-winiquetic, lats'bil bahel yu'unic. 25Pero ay jtuhl ants te ayix lahchayeb (12) ha'bil te ma xquehchaj yilbel sch'ich'el scuenta schamel. 26C'axix bayel swocol ta poxtayel yu'un tsobol jpoxtaywanejetic, soc la slajinix spisil staq'uin yu'un, pero ma ba lecub yu'un, behbe nax juch'el. 27C'alal la ya'iybe sc'oblal te Jesús, walac' tal ta spat Jesús ta yohlil te tsobol ants-winiquetic, c'oht spicbe sti'il smuc'ul-c'u'. 28Como hich la yal ta yo'tan: Aunque sti'iluc nax smuc'ul-c'u' ya jpicbe, tic' ya xcolon a, xchi. 29Hich ora quehchaj te sch'ich'ele. La ya'iy sba te lequix ay yu'un te swocole. 30C'alal la ya'iy te Jesús te ay loc' te yu'ele, la sut sba sc'opon te mach'atic tey ayic a: ¿Mach'a la spicbon jc'u'? xchi. 31Halbot yu'un te jnopojeletic yu'une: Yac awil te ipal ants-winiquetic te slats'ojat, soc yac awal: ¿mach'a la spicbon jc'u'? xchihat, xchihic yu'un. 32Pero la sle yil ta sjoyobal mach'a a te hich la spase. 33La ya'iy sba te ants te lecubtesotix, hich yac ta nihquel yu'un xiwel a tal squejan sba ta ye'tal yoc, la yalbe ya'iy ta jamal spisil te bin ut'il ay. 34Te Jesús la yalbe: Cantsil-nich'an, colatix ta scuenta sch'uhunel awo'tan. Bahan, lamaluc me q'uinal yac awa'iy, colematix ta awocol, xchi sc'oblal. 35Yac to ta c'op a te Jesús, ay mach'atic tal ta sna te principal yu'un te sinagoga, hich hul yalbeyic: Chamix te awantsil-nich'ane, ¿bin yu'un yac awa'be xan swocol te Maestrohe? xchihic c'ohel. 36C'alal la ya'iy te Jesús te bin hul ta halbeyel, la yalbe te principal yu'un te sinagoga: Ma me xiwat; ha nax ac'a sch'uhunel awo'tan, xchi sc'oblal. 37Te Jesús ma ba la sc'an ay mach'a yan ya xt'unot yu'un, ha nax te Pedro, Jacobo soc Juan te yihts'in Jacobo. 38C'alal c'ohtic ta sna te principal yu'un te sinagoga, te Jesús la yil te xjuyetic, la yil te mach'atic yaquic ta oq'uel soc ta aw. 39Och bahel, hich la yalticlambe: ¿Bin yu'un te xjuyetex soc te ayex ta oq'uel? Ma ba chamen te ach'ixe, wayal nax, xchi. 40La slabanic; pero te Jesús la sloq'ueslan spisilic, la yic' ochel te sme'stat te ach'ix soc te mach'atic sjoquinej, och bahel te banti ay te ach'ixe. 41La snit hahchel ta sc'ab, hich la yalbe: Talita cumi, xchi. (Tut ach'ix, ya calbat, hahchan, xchi c'ohem.) 42Ora hahch soc behen te ach'ixe, yu'un ayix lahchayeb (12) ya'bilal. Bayel xiwic yu'un. 43Pero te Jesús la spas ta mandar te ma me ayuc mach'a ya sna'. Soc la yal te ac'a ya'beyic swe'el te ach'ixe.


Copyright
Learn More

will be added

X\