San Marcos 4

1Yan buelta hahch ta p'ijubteswanej ta ti'mar te Jesús. Tsobol mach'atic la stsob tal sbahic ta stojol, ha yu'un och ta barco, la shuhcan sba tey a; yan te ants-winiquetic hilic ta ti'ha'. 2Ay bayel bin la ya'be snopic ta scuenta sloc'ombahil c'op. Hich la yal ta p'ijubteswanej: 3A'iya me awa'iyic: Ay jtuhl jts'umbajel loc' ta slihlinel sts'unub; 4te c'alal yac ta slihlinel, ay c'oht ta ti'be, tal ta biq'uel yu'un mutetic. 5Ay c'oht ta ba tontiquil te ma ba pim slumil, ora ch'ihy como ma ba c'ubul te slumile; 6pero te c'alal loc' tal te c'ahc'al, ora chic'ot yu'un ta scaj te ma ba c'uhben slohp', hich taquij. 7Ay c'oht ta yohlil ch'ixileltic, pero tohy mohel te ch'ixetic, tenot yu'un, hich ma ba sitin. 8Pero ay c'oht ta lequil lum, la yac' sit, ay la yac' lajuneb scha'winic (30), ay la yac' oxwinic (60), ay la yac' ho'winic (100) buelta sit, xchi te Jesús. 9Soc la yalbe xan ya'iyic: Te mach'a ay schiquin, ac'a me ya'iy, xchi. 10C'alal stuquel ay a te Jesús, te mach'atic nopol ayic soc nix te lahchaytuhl la sjoc'obeyic bin ut'il ay te sloc'ombahil c'op. 11Hich halbotic yu'un te Jesús: Te ha'ex a'bibilex ana'ic te bin muquen ay yu'un te cuentahinel yu'un Dios; yan te mach'atic ayic ta fuera ha nax ta sloc'ombahil c'op ya xhalbot ya'iyic stuquelic, 12scuenta yu'un ya yilic, pero ma xc'oht ta yo'tanic, soc ya ya'iyic, pero ma sna'beyic scuentahil; scuenta yu'un ma ba ya suhtes yo'tanic te hich ya xpasbot perdón yu'un smulic, xchi. 13Soc halbotic yu'un te Jesús: ¿Yu'un bal ma xana'beyic scuentahil te sloc'ombahil c'ope? ¿Bin ut'il c'an ana'iquix scuentahil a hiche spisil te sloc'ombahil c'ope? 14Te jts'umbajel ha te mach'a ya sts'un te c'ope. 15Te ts'unubil te c'oht ta ti'be ha te mach'atic la yich'ic ts'unel ta yo'tanic te c'ope, pero c'alal ya ya'iyic, ora ya xtal te Satanás, ya sloq'uesbe ta yo'tanic te c'op ts'umbil tey a. 16Soc te ts'unubil te c'oht ta ba tontiquil, ha te mach'atic ya ya'iyic te c'op soc tse'el yo'tanic yu'un ta ora; 17pero bahal nax ay slohp', ma ba ya xhalajic; c'alal ya xtal wocol o uts'inel yu'un te c'ope, ora ya xyahlic. 18Te ts'unubil te c'oht ta yohl ch'ixileltic, ha te mach'atic ya ya'iyic te c'ope; 19pero te sna'el bintic ay ta bahlumilal, te lo'loyel yu'un te c'uhlejalil soc te bic'sitayel biluquetic, ha ya stenic te c'ope, hich ma ba ya yac' sitinuc. 20Yan te ts'unubil te c'oht ta lequil lum, ha te mach'atic ya ya'iyic te c'op soc ya xc'oht ta yo'tanic, ya sitin ta lajuneb scha'winic (30), ta oxwinic (60), ta ho'winic (100) ta p'ij, xchi te Jesuse. 21Soc hich la yalbeyic: ¿Ya bal yich' ich'el tal c'ahc' yu'un ya yich' nujel ta moch o ta ye'tal wayibal? ¿Ma bal yacuc yich' aq'uel ta scajtajib? 22Mayuc bin muquen te ma ba ya yich' chicnajtesel, mayuc bin nac'bil te ma ba ya xloc' ta sacal q'uinal. 23Te mach'a ay schiquin, ac'a me ya'iy, xchi. 24Soc la yalbeyic: Tsahtaya me abahic yu'un te bin yac awa'iyic, como te bin yilel yac ap'is, ha nix hich yac awich' p'isbeyel, soc c'ax hich ya x'a'botat a, 25como te mach'a ay bin ay yu'un, ya x'a'bot xan yan, pero te mach'a mayuc bin ay yu'un, ya me yich' pojbeyel te bin ay to nix yu'une, xchi. 26Soc la yal xan: Te cuentahinel yu'un Dios, hich c'ohem te bin ut'il ay mach'a ya slihlin sts'unub ta lum. 27Ya xway, ya xhahch, c'ahc'al ahc'abal ya xch'ihy soc ya xcol, ma sna' bin ut'il hich ya spas, 28como stuquel ya yac' sitinuc te q'uinal: nahil te ya'binal, patil te snich, patil ya xnoj ta sit. 29C'alal yijubix a te site, ya yich' bojel ta hoz, yu'un la stahix yorahil ta tsobel, xchi. 30Hich la yal xan te Jesús: ¿Bin ya jpajtic a te cuentahinel yu'un Dios? ¿Bin sloc'ombahil c'op ya jpajtic a? 31Hich c'ohem te bin ut'il sbac' mostaza, te c'alal ya yich' ts'unel ha tut yu'un spisil yantic ts'unubiletic, 32pero te c'alal ts'umbilix, ya xcol tal, c'ax hich smuc'ul ya xc'oht a te bin ut'il spisil te ts'unubiletic ta yawil ts'unubil, ya yac' smuc'ul c'ab, hich ya xtal ta nahinel ta yaxinal te ha'mal mutetique, xchi te Jesuse. 33Ta scuenta bayel sloc'ombahil c'op hich bin ut'il ini la yalbe te sc'op Dios ta ban c'alal hu' yu'unic sna'el. 34Ma ba la sc'opon teme ma ha'uc ta sloc'ombahil c'op; pero te c'alal stuquel ay soc a te jnopojeletic yu'une, spisil la yalbe bin scuentahil. 35Ha nix ta stibiltayel q'uinal a, halbotic yu'un Jesús te jnopojeletic: Sohlucotic bahel ta jehch mar, xchi. 36C'alal la sc'oponic hilel te bayel ants-winiquetic, la yiq'uic bahel ta barco te Jesús. Soc ay yan barcohetic te la sjoquinic bahel. 37Pero hahch tulan ic' te la sten ochel ta barco te tulan sts'elajan mar, hich hahch ta mulel ta ha'. 38Te Jesús ay ta yit barco, wayal ta sts'amjol. La stijic soc hich la yalbeyic: Maestro, ¿ma bal ayuc sc'oblal yac awa'iy te ya xlajotic? la yutic. 39Hich hahch te Jesús, la scom te ic' soc la yalbe te mar: Ch'aban, lahmajan, la yut. Ch'ab te iq'ue, buen lamal q'uinal c'oht. 40Hich la yalbe te jnopojeletic yu'un: ¿Bin yu'un te yaquex ta xiwel? ¿Bin ut'il ay a te mayuc sch'uhunel awo'tanic? xchi sc'oblalic. 41Ha yu'un bayel xiwic, talel c'axel hich la sjoc'obe sbahic: ¿Mach'a a ini, te ha ch'uhumbil smandar yu'un te ic' soc te mar? xchihic yu'un.


Copyright
Learn More

will be added

X\