San Marcos 3

1Yan buelta och ta sinagoga te Jesús; ay jtuhl winic tey a te taquijem jun sc'ab. 2Yac stsahtaybel yilic teme ya slecubtes ta sc'ahc'alel cux-o'tan, yu'un tey ya slehbeyic smul a. 3Te Jesús hich la yalbe te winic te taquijem sc'ab: Hahchan, tehc'ana aba ta ohlil, xchi. 4Soc hich la sjoc'obe te yantique: ¿Lec bal te ta sc'ahc'alel cux-o'tan ya yich' pasel te bin lec o te bin ma lecuc; lec bal scoltayel cuxlejalil o slajinel cuxlejalil? la yut. Mayuc bin la sjaq'uic. 5Ilinem a te Jesús la yilticlan ta sjoyobal, la smel yo'tan ta scaj te tulan yo'tanic, hich la yalbe te winique: Xach'a ac'ab, la yut. Hich la xach' sc'ab, lecub te sc'abe. 6Ha yu'un loq'uic bahel te fariseohetic, baht schap sc'opic soc te winiquetic yu'un Herodes te bin ya yut ya smilic te Jesús. 7Loc' tey a te Jesús, baht ta ti'mar soc te jnopojeletic yu'un, soc t'unot bahel yu'un tsobol ants-winiquetic te talemic ta Galilea, soc nix ta Judea, 8Jerusalén, Idumea, ta jehch ha' Jordán soc ta sjoyobal Tiro soc Sidón. Tsobol talic ta t'unaw c'alal la ya'iyic te bin muc' yac spasticlambel te Jesús. 9Ha yu'un la yalbe te jnopojeletic yu'un te yacuc schahpanic jun barco scuenta yu'un hich ma ba ya xtenot yu'un a te bayel ants-winiquetic, 10como tsobol mach'atic la slecubteslan ta chamel, ha yu'un spisil mach'a ayic ta chamel stenten sbahic ta spicbeyel sc'u'. 11Te bohl espírituhetic, c'alal la yilic te Jesús, la squejan sbahic ta stojol soc la yalic: Ha'at Snich'anat te Diose, xchihic ta aw. 12Pero tulan comotic yu'un Jesús te manchuc ya x'ac'ot ta na'el yu'unic. 13Patil mo bahel ta wits te Jesús, la yic' sjoquin te mach'atic la sc'an la yic'; hich talic ta stojol. 14La stsa lahchaytuhl (12) scuenta yu'un ya xjoquinot yu'unic, soc yu'un ya sticonlan bahel ta yalel sc'op Dios 15soc yu'un ay ya'telic ta slecubtesel jchameletic soc ta sloq'uesel pucujetic. 16Te lahchaytuhl te la stsa: ha te Simón, te Pedro yan sbihil a'bot yu'une, 17Jacobo snich'an Zebedeo, soc Juan te yihts'in Jacobo, te la ya'be sbihilinic Boanerges, ha Snich'nab Chahwuc, xchi c'ohem; 18soc Andrés, Felipe, Bartolomé, Mateo, Tomás, Jacobo snich'an Alfeo, Tadeo, soc Simón te cananeo-winic, 19soc Judas Iscariote, ha te la yac' ta c'abal te Jesús. 20Patil och bahel ta na te Jesús, la scha'tsob xan tal sbahic bayel ants-winiquetic, ma ba hu' we'ic yu'un. 21C'alal la ya'iyic te mach'atic ay yu'un te Jesús, ya c'an tal stsaquic bahel, como la yalic: Sohquem sjol, xchihic. 22Pero te escribanohetic te talemic ta Jerusalén la yalic: U'untayot yu'un Beelzebú, soc ta scuenta yajaw pucujetic te ya sloq'ueslan te pucujetique, xchihic. 23Ha yu'un te Jesús la yic'ticlan tal sc'opon ta scuenta sloc'ombahil c'op, hich la yal: Te Satanás, ¿bin ut'il ya xhu' ya sloq'ues sba stuquel? 24Teme ay ya scontrahin sbahic te ban cuentahimbil yu'un, ma xhu' ya xhalaj. 25Soc te mach'atic jun snahic te ya scontrahin sbahic, ya me xjihn snahic yu'un. 26Soc teme Satanás ya xhahch scontrahin sba soc teme ya sjat sba, ma xhu' ya xhalaj, ha c'ohtix ta slajibal abi. 27Mayuc mach'a ya xhu' ya yochintaybe sna te winic te ay yip yu'un ya spojbe sbiluc, teme ma ba nahil ya schuc; ha to ya xhu' ya spojbe a te sbiluque. 28Ya calbeyex te spisil muliletic soc spisil sbohlc'optayel Dios ay perdón yu'un, 29yan te mach'a ya sbohlc'optay te Ch'ul Espíritu mayuc perdón yu'un stuquel; sbahtel q'uinal smulinej, xchi te Jesús. 30Como hich yalojic: Yich'oj bohl espíritu, te xchihique. 31Tal te yihts'inab soc te snan te Jesús; hilic ta fuera, la sticonic ta iq'uel tal te Jesús. 32Te mach'atic huculic ta sjoyobal la yalbeyic: Talem slehbelat te anan soc awihts'inab, ayic ta fuera, xchihic. 33La sjac' te Jesús: ¿Mach'a a te jnan soc te quihts'inab? xchi. 34La yilticlan te mach'atic huculic ta sjoyobal, hich la yal: Ha jnan soc ha quihts'inab ini. 35Como spisil mach'a ya spas te bin ya sc'an yo'tan te Diose, ha jnan soc ha quihts'in c'ohem, xchi te Jesuse.


Copyright
Learn More

will be added

X\