San Marcos 16

1C'alal c'axix a te sc'ahc'alel cux-o'tan, te María Magdalena, te María snan Jacobo, soc te Salomé la smanic bintic sumet yic' scuenta yu'un ya xbaht yatintesbeyic sbaq'uetal a te Jesús. 2Buen sab ta sba c'ahc'alil semana bahtic ta muquenal, loq'uix tal c'ahc'al a. 3Talel c'axel hich la yalbe sbahic ta be: ¿Mach'a ya sloq'uesbotic te muc'ul ton macal sti'il a te muquenale? xchihic. 4Pero c'alal la yilic, loq'uesbilix a te muc'ul ton. 5C'alal ochic bahel ta yutil te muquenal, la yilic jtuhl jcolel winic hucul ta wa'el, slapoj saquil snahtil-c'u'; tojic xiwel yu'un. 6Ma me xiwex, xchi; yac alebelic te Jesús talem ta Nazaret te laj ta cruz, cha'cuxajemix, ma ba li' ayixi; ilawilic te banti la yaq'uic hilel. 7Bahan halbeyahic te jnopojeletic yu'un, soc te Pedro, te ha ya xnahilij bahel awu'unic ta Galilea; tey ya xc'oht awilic a, hich te bin ut'il la yalbeyex, xchi. 8Hich nihc yo'tanic soc xiwic, loq'uic ta ahnel ta muquenal te antsetique. Mayuc mach'a la yalbeyic ya'iy jtuhluc, como xiwic. 9Te c'alal cha'cuxaj Jesús ta sab ta sba c'ahc'alil semana, ha nahil la yac' sba ta ilel yu'un te María Magdalena te loq'uesbot huqueb pucuj ta yo'tan yu'un. 10Hich te María baht yalbe ya'iyic te mach'atic la sjoquinic Jesús ta nahil to te yacalic ta mel-o'tan soc ta oq'uel. 11C'alal la ya'iyic te cha'cuxajemix te Jesús soc te ilotix yu'un te María, ma ba la sch'uhunic. 12Patil te Jesús yanix yilel la yac' sba ta ilel yu'un cha'tuhlic te yacalic ta behel ta be ta yan lugar. 13Ha'ic baht yalbeyic te yantique; pero ha nix hich ma ba ch'uhumbotic yu'un. 14Ta slajibal la yac' sba ta ilel yu'un te buluchtuhl (11) te c'alal ayic ta mesa a; la yuticlan yu'un te mayuc sch'uhunel yo'tanic soc tulan te yo'tanique, como ma ba la sch'uhunic te mach'atic la yilic te cha'cuxajemixe. 15Hich la yalbe: Bahanic ta swohlol bahlumilal, halbeya ya'iyic spisil ants-winiquetic te lec yach'il c'ope. 16Te mach'a ya sch'uhun soc te ya yich' ha', ya me xcol; yan te mach'a ma ba ya sch'uhun, ya me x'a'bot stoj smul. 17Soc te señahiletic ini ya sjoquinic te mach'atic ya sch'uhunic: Ha ta scuenta jbihil ya sloq'uesic pucujetic; ya xc'opojic ta yantic c'opiletic; 18ya stsaquic jti'awal chanetic; teme ya yuch'ic te bin ya xmilawan, ma ba ya x'uts'inotic yu'un; ya scajambe sc'abic ta sba jchameletic, hich ya xcolic yu'un, xchi. 19Laj sc'opombel a te jnopojeletic yu'un, ic'ot mohel ta ch'ulchan te Cajwaltic, c'oht shuhcan sba ta swa'el-c'ab te Diose. 20Hich te jnopojeletic loq'uic bahel ta spuquel ta bayuc te lec yach'il c'op, soc te Cajwaltic yac scoltaybel soc yac yac'bel ta na'el te ha smelelil te sc'op, ta scuenta te señahetic te joquimbilic yu'un. Hichuc.


Copyright
Learn More

will be added

X\