San Lucas 24

1Ta buen sab ta sba c'ahc'alil semana te antsetic talic ta muquenal, yich'ojic tal te bin sumet yic' te chahpambil yu'unique. 2Balch'umbilix loq'uel a c'oht stahic te ton macbil a te muquenale. 3C'alal ochic bahel, ma ba la stahic tey a te sbaq'uetal te Cajwaltic Jesús. 4Yacalic na'etel a, xtehc'lujet c'ohel ta sts'ehlic cheb winiquetic te xlipet sacal sc'u' spaq'uic. 5Te bin ut'il tojic xiwel soc te la snijan sbahic ta lum yu'un, hich halbotic: ¿Bin yu'un yac alehic ta yohlil chamen winiquetic te mach'a cuxulixe? 6Ma ba li' ayix, cha'cuxajix. Na'ahic me te hich la yalbeyex te c'alal ay to ta Galilea a: 7Ya me x'ac'ot ta sc'ab jmulawiletic te Nich'anil ay ta scuenta winic soc ya xlaj ta milel ta cruz, pero ta yoxebal c'ahc'al ya me xcha'cuxaj tal, xchihic. 8Hich te antsetic la sna'ic te bin yaloj te Jesús, 9hich suhtic bahel, c'oht yalbeyic te buluchtuhl (11) soc spisil te yantic te bin c'ohem ta pasele. 10Ha te María Magdalena, Juana, te María te snan Jacobo, soc te yantic antsetic te c'oht yalbeyic te jpuc-c'opetic te bin c'ohem ta pasele. 11Pero ma ba ch'uhumbot sc'opic, cuybot ta howilc'op te bin c'oht yalique. 12Pero hahch te Pedro, ahnimal baht ta muquenal, la snijan sba ta yilel, ha nax la yil te pac' potsbil sbaq'uetal a, suht bahel ta na, xcham yo'tan yu'un te bin c'ohemix ta pasele. 13Ha nix sc'ahc'alel a ay cha'tuhlic te yacalic ta bahel ta jun tut pueblo, Emaús sbihil, te jteb ma sta oxeb legua yiloj sba soc Jerusalén. 14Yac yalbelic bahel te bin c'ohemix ta pasele. 15Te c'alal yacalic ta yalel a bin ut'il ay, nohpoj tal te Jesús, la sjoquinic ta behel. 16Pero tapbot sitic, hich ma ba la sna'beyic sba. 17Hich joc'obotic yu'un te Jesús: ¿Bin yac awalbel abahic te c'alal yaquex ta behel, soc bin yu'un yaquex ta amel-o'tan? xchi. 18La sjac' te jtuhl, te Cleofas sbihil: ¿Yu'un bal ha'at nax atuquel te jbehyomat ta Jerusalén te ma ba ana'oj bintic c'oht ta pasel wojey cha'jey tey a? xchi. 19¿Binti a? xchi te Jesús. Ha te Jesús te talem ta Nazaret, te ha jalwanej, te ay bayel yip ya'tel soc yip sc'op ta stojol Dios soc ta stojol spisil ants-winiquetic, 20soc te bin ut'il te principal sacerdotehetic soc te principaletic cu'untic la yaq'uic ta milel ta cruz. 21Pero te ho'otcotic smuc'ulinej co'tancotic te ha te mach'a ya yac' ta libre te Israel. Pero ma ha'uc nax ini, ha yoxebalix c'ahc'al a te hich c'oht ta pasel. 22Soc ay cha'oxtuhl cantsilelcotic te la yac' xchamet co'tancotic, yu'un ta buen sab c'oht yilic te muquenal; 23te bin ut'il ma ba la stahbeyic te sbaq'uetal, suhtic tal yalic te la yilic ch'ul a'batetic te halbotic yu'unic te ha cuxulix. 24Soc ay jmohlolcotic te bahtic ta muquenal, hich nix c'oht stahic a te bin la yal te antsetic, pero ma ba la yilic stuquelic te Jesús, xchihic. 25Hich halbotic yu'un te Jesús: ¡Wocol ya xc'oht ta awo'tanic, soc wocol yac ach'uhunic spisil te bintic yalojic te jalwanejetique! 26¿Ma bal hichuc la sc'an te ya xc'ax swocol te Cristo, soc patil ya x'och ta utsilal yu'un? 27Hich hahch scholbe ya'iyic c'alal Moisés soc spisil te jalwanejetic te bintic ts'ihbabil ta Shun Dios te ya yalbe sc'oblale. 28C'alal c'ohtic ta tut pueblo ta banti yacalic ta bahel, te Jesús c'an sohluc stuquel. 29Pero la yalbeyic wocol te yacuc sjoquinic hilel, hich la yalic: Joquinawotcotic hilel, yu'un mahlix c'ahc'al, nopol ya x'ihc'ubix q'uinal, xchihic. Hich och bahel sjoquinic. 30Te Jesús, c'alal ay ta mesa soc, la stsac te pan, la yalbe wocol Dios yu'un, la xet' soc la spucbe. 31Hich jambot sitic, la sna'beyic sba; pero ora ch'ay ta sitic. 32Talel c'axel hahch yalbe sbahic: ¿Ma bal ayuc yutsil c'oht ta co'tantic te c'alal la sc'oponotic ta be soc te c'alal la sjam ca'iytic te Shun Dios? xchihic. 33Hich hahchic ta behel ta ora, suhtic bahel ta Jerusalén. Stsoboj sbahic a c'oht stahic te buhluchtuhlic soc te yantic sjoquinejic, 34te hich yac yalbelic: Melel nix a te cha'cuxajix te Cajwaltic, soc la yaq'uix sba ta ilel ta stojol Simón, xchihic. 35Hich te cha'tuhlic hahch smelbe ya'iyic te bin c'oht ta pasel ta be, soc te tey la sna'beyic sba a te c'alal la xet' te pane. 36Hich yac yalbelic a, te Jesús c'oht stehc'an sba ta yohlilic, hich la yalbe: Lamaluc me q'uinal yac awa'iyic, xchi. 37Tojic xiwel soc nihc yo'tanic yu'un, como la scuyic ta yesomba te yac yilbelique. 38Pero halbotic yu'un te Jesús: ¿Bin yu'un yaquex ta xiwel, soc bin yu'un te wocol ya sch'uhun awo'tanic? 39Ilbon awilic jc'ab soc coc, te ho'on nix. Picawon awa'iyic, ilawonic; como te yesomba mayuc sbaq'uetal soc mayuc sbaquel, yan te ho'one ay cu'un hich te bin ut'il yac awilonic, xchi. 40Te c'alal hich la yal, la ya'be yilic te sc'ab soc te yoque. 41Te bin ut'il ma to ba la sch'uhunic ta scaj tse'el yo'tanic soc ta scaj te xcham yo'tanic yu'un, hich halbotic yu'un Jesús: ¿Ay bal jtebuc we'elil awu'unic li'i? xchi. 42Hich la ya'beyic jaht wohbil chay soc jxeht' chab. 43La stsac te Jesús, la swe' ta scomonsitic. 44Patil hich la yalbe: Hich ay te bin la jcalbeyex te c'alal joquex to a, te ya sc'an te ts'acal ya xc'oht ta pasel te bin ya yalbon jc'oblal te ts'ihbabil ta Ley yu'un Moisés, ta shun jalwanejetic soc ta salmohetic, xchi. 45Hich la sjambe yo'tanic scuenta yu'un ya xc'oht ta yo'tanic te bin ya yal te Shun Diose. 46Hich la yalbe ya'iyic: Hich ts'ihbabil hilel te la sc'an te ya xc'ax swocol te Cristo soc ta yoxebal c'ahc'al ya xcha'cuxaj tal ta yohlil te mach'atic chamenic; 47soc ya me yich' puhquel ta halel ta scuenta sbihil ta spisil nacionetic sc'oblal te suhtesel-o'tanil soc te perdón yu'un mulil, ha ya xhahch bahel ta Jerusalén. 48Ha'ex testigohex yu'un te bin c'ohtix ta pasel. 49Soc ho'on ya me jticombeyex tal te bin yaloj te Jtat ya ya'beyex; pero hilanic ta Jerusalén ha to c'alal ya xhul ta acuentahic te yu'el Dios ya xtal ta toyol, xchi. 50Te Jesús la yic' bahel te jnopojeletic c'alal ta Betania, la stoy sc'ab soc la yac'ticlambe hilel bendición. 51Te c'alal yac yac'bel bendición a, la yihquitay hilel, hich ic'ot mohel ta ch'ulchan. 52C'alal laj yich'belic ta muc', bayel yutsil yo'tanic suhtic bahel ta Jerusalén. 53Spisil ora ayic ta Templo ta yalbeyel yutsilal te Diose.


Copyright
Learn More

will be added

X\