San Lucas 14

1Ta sc'ahc'alel cux-o'tan te Jesús baht ta we'el ta sna jtuhl principal fariseo, yac ta ilel yu'un jtsahtaywanejetic. 2Tey ay ta stojol Jesús jtuhl winic te siht'em sbaq'uetal. 3Ha yu'un te Jesús la yalbe te maestrohetic yu'un te Ley soc te fariseohetic: ¿Stojil bal teme ay mach'a ya yich' lecubtesel ta sc'ahc'alel cux-o'tan? xchi. 4Mayuc bin la yalic yu'un. Ha yu'un te Jesús la yic' tal te jchamel, la slecubtes ta chamel soc la sticon bahel. 5Te Jesús hich la sjoc'obeyic: ¿Mach'ahex a teme ay snich'an o j'a'tel-wacax yu'un te ch'ay cohel ta pozo ta sc'ahc'alel cux-o'tan, ma bal orahuc yac aloq'uesic aunque sc'ahc'alel cux-o'tan a? xchi. 6Tey ma ba weht suhtib yu'unic a. 7C'alal Jesús la yil te ha yac stsahbelic te primero huctajibaletic ta mesa te mach'atic ic'bilic ta we'el, la yalbe ya'iyic sloc'ombahil c'op, hich la yal: 8Teme ay mach'a ya yic'at ta il-nuhpunel, ma me xhuhcajat ta primero huctajibal, repente ay yan mach'a c'ax hich ay ta ich'el ta muc' a te bin ut'il ha'at, te ha nix hich ic'bil ta we'el, 9ya xtal te mach'a la yic'at ta we'el soc, hich ya yalbat: Ha xawac' huhcajuc tey a ha'i winic ini, teme xchihe, hich yacat ta q'uexlal a yac ahuhcan aba ta slajibal huctajibal. 10Pero te c'alal ic'bilat, bahan huhcana aba ta slajibal huctajibal, scuenta yu'un te c'alal ya xtal te mach'a la yic'at, hich ya yalbat: Amigo, la', nohpojan tal ta huclej li'i, xchi. Hich me ich'bilat ta cuenta ya xc'ohat ta stojol te mach'atic huculat soc ta mesa. 11Como spisil te mach'a ya yac' sba ta ich'el ta muc', ya me yich' pehc'anel, yan te mach'a peq'uel ya yac' sba, ha me ya xtohytesbot sc'oblal stuquel, xchi. 12Soc te Jesús la yalbe te mach'a ic'bil ta we'el yu'un: Te c'alal ya x'ic'awanat ta we'el, ma ha'uc xawic' te awamigotac, awermanotac, amohloltac o te apat-axuhc te jc'uhlejetic, yu'un teme hich yac apas, ha nix hich ya yic'at ta we'el, hich ya sjeltaybat te bin la slajimbate. 13Teme yac apas bayel we'elil, ha me xawic'ticlan te pobrehetic, nolc'abetic, coxo'etic soc ts'o'sitetic; 14hich me bayel awutsil ya xc'ohat, como ma xhu' yu'unic sjeltayel stuquel; pero ya me x'a'botat sjelol te c'alal ya sta yorahil ya xcha'cuxajic te mach'atic toj yo'tanique, xchi sc'oblal. 15C'alal hich la ya'iy te jtuhl mach'a pajal ay ta mesa soc, hich la yal: ¡Bayel me yutsil te mach'a ya swe' pan te banti ay te cuentahinel yu'un Dios! xchi. 16Hich halbot yu'un te Jesús: Ay jtuhl winic te la spas bayel we'elil, tsobol mach'a la yic'ticlan ta we'el. 17C'alal la sta yorahil te we'el, la sticon bahel ya'bat te hich la yalbe te mach'atic ic'bilic: La'ic me, chapalix spisil, xchi. 18Pero spisilic la sle bin macawanic ta c'op a. La yal te jtuhle: La jmanix jq'uinal, ya sc'an ya xbaht quil. Awocoluc, pasbon perdón, xchi. 19La yal te yane: Ay jmanoj ho'chahp j'a'tel-wacax, ha ya jpas prueba quil teme lequique. Awocoluc, pasbon perdón, xchi. 20Soc la yal te yane: Ach' to nuhpunon, hich ma xpas te ya xbohon, xchi. 21Hich suht tal te a'bate, la ya'be sna' te yajwal te bin halbot. Ilin te yajwal na, hich la yalbe te ya'bat: Bahan ta ora ta plazahetic soc ta callehetic ta pueblo, ic'a talel te pobrehetic, nolc'abetic, coxo'etic soc te ts'o'sitetique, xchi. 22Hul ta halbeyel yu'un te ya'bat: Cajwal, pasbilix te bin la awale, pero ay to jochol, xchi. 23Te yajwal hich la yalbe te a'bat: Bahan ta muc'ul behetic soc ta tut behetic, sujahic ochel tal scuenta yu'un ya xnoj te jnahe. 24Jamal ya calbeyex, te mach'atic la jquic'ticlan ta we'el, ma ba ya ya'iybe sbuhts' te we'elil cu'une, xchi me, xchi te Jesús. 25Bayel ants-winiquetic la sjoquinic ta behel te Jesús; hich la sut sba soc la yalbe ya'iyic: 26Te mach'a ya xtal ta jtojol, teme ma ba ya sloq'ues ta yo'tan te sme'stat, yihnam, yal-snich'nab, sbanquiltac, swixitac, yihts'inab soc nix te scuxlejale, ma xhu' ya x'och ta jnopojel cu'un. 27Soc te mach'a ma ba ya sq'uech te cruz yu'un soc ya st'unon, ma xhu' ya x'och ta jnopojel cu'un. 28¿Mach'ahex a te yac ac'an yac apasic toyol ilo-q'uinal, te ma nahiluc yac ahuhcan abahic ta spasel cuenta teme tic' ya xhu' a te jayeb ay awu'une? 29Teme hip hu' awu'un spasel a te yich'o-ip, patil ma ba hu' awu'un shu'tesel, spisil te mach'atic ya yilic, ya xhahch slabanat yu'un: 30Ha'i winic ini hahch spas ilo-q'uinal, pero ma ba hu' yu'un shu'tesel, xchihic ta atojol. 31O teme ay ajwalil te ya sc'an ya ya'be guerra yan ajwalil, ¿ma bal nahiluc ya shuhcan sba ta snopel teme ya xhu' yu'un stsalel soc jpic soc ho'bahc' (10,000) ta tuhl winiquetic yu'un te mach'a ay cha'pic soc lajunbahc' (20,000) ta tuhl winiquetic yu'une? 32Teme ma xhu' yu'un, te c'alal namal to ay a te scontra, ya sticon bahel mach'a ya xbaht sjoc'oy bin ya xlahmaj q'uinal yu'un. 33Ha nix hich te ha'exe, teme ma ba yac awihquitay ta awo'tanic spisil bintic ay awu'unic, ma xhu' ya x'ochex ta jnopojel cu'un. 34Lec ay te ats'ame; pero teme laj te schi'ile, ¿bin ut'il c'an taluc xan schi'il? 35Ma ba ya xtuhun yu'un te lum o te sch'ayojibal c'a'pal; ha ya yich' ch'ojel loq'uel ta fuera. Te mach'a ay schiquin, ac'a me ya'iy, xchi.


Copyright
Learn More

will be added

X\