San Lucas 12

1Ha yorahil a, la stsob sbahic tal bayel ta mil ants-winiquetic, jc'axel la sten sbahic. Te Jesús hich hahch yalbe te jnopojeletic yu'une: Tsahtaya me abahic yu'un te levadura yu'un te fariseohetic, ha te chebal-o'tanil, 2como mayuc bin muquen te ma ba ya xchicnaj, soc mayuc bin nac'al te ma ba ya xna'ot. 3Ha yu'un spisil te bintic awalojic ta yihc'al q'uinal, ya me x'a'iyot ta sacal q'uinal, soc te bin muquen la awalbe yan ta yutil na, ya me yich' halel ta sba nahetic. 4Ya calbeyex, camigotac, ma me xaxi'ic te mach'a ya smilbeyex abaq'uetalic, te mayuc bin ya xhu' ya spasbeyix xan ta patil. 5Pero ya ca'beyex ana'ic mach'a a te ya sc'an yac axi'ic: Ha me xaxi'ic te mach'a ya xhu' ya slajimbat acuxlejal soc te ya xhu' ya sticonat bahel ta infierno. Ya calbeyex, ha me xaxi'ic stuquel. 6¿Ma bal yacuc yich' chonel ho'coht tut ha'mal mutetic ta cha'sehp cuarto taq'uin? Pero ni jcohtuc ch'ayem ta o'tanil yu'un te Diose. 7Ha nix hich ahtaybil te jaylihc stsotsel ajolique. Ha yu'un ma me xiwex, c'ax hich ac'oblalic a te bin ut'il bayel ha'mal mutetic. 8Ya calbeyex te spisil mach'a jamal ya yal ta stojol ants-winiquetic te ya sna'bon jba, ha nix hich te Nich'anil ay ta scuenta winic jamal me ya yal ta stojol te ch'ul a'batetic yu'un Dios te ya sna'be sba ec. 9Yan te mach'a ma ba ya yal ta stojol yantic te ya sna'bon jba, ha nix hich ma ba ya xna'bot sba ta stojol te ch'ul a'batetic yu'un Dios. 10Spisil te mach'atic ya scontrac'optay te Nich'anil ay ta scuenta winic, ya xpasbot perdón yu'un; yan te mach'a ya sbohlc'optay te Ch'ul Espíritu, ma ba ya xpasbot perdón yu'un stuquel. 11Te c'alal ya yiq'uex bahel ta sinagogahetic soc ta stojol ajwaliletic soc mach'atic ay ya'telic, ma me xana'ulan ta awo'tanic bin ut'il yac acoltay abahic o bin yac awalic, 12como te Ch'ul Espíritu ya me ya'beyex ana'ic ta mero yorahil te bin ya sc'an yac awalique, xchi. 13Te Jesús hich halbot yu'un jtuhl te mach'atic stsoboj sbahic: Maestro, halbeya te quermano te ac'a ya'bon j'ohliluc te bintic a'bibil hilel yu'un te jtate, xchi. 14Pero halbot yu'un te Jesús: Winic, ¿mach'a la ya'bon ca'tel ta juez o te ay bin ya jpucbeyex? xchi. 15Hich la yalbe te yantique: Tsahtaya me abahic yu'un spisil bic'tal-o'tanil, como te scuxlejal te winic ma ha'uc ay sc'oblal te ay bayel bintic ay yu'un, xchi. 16Soc la yalbe ya'iyic sloc'ombahil c'op: Ay jtuhl c'uhlej winic te bayel bin la sloq'ues ta sq'uinal. 17Hich hahch snop ta yo'tan: ¿Bin ya jpas yo'tic, como ma xwehtix banti ya jq'uej te bin la jloq'ues? xchi ta yo'tan. 18Ha yu'un la yal: Hich me ya jpas: ya jin te yawil cawal-ts'unub, ya jpas yan te c'ax hich smuc'ul a, tey ya jq'uejticlan spisil a te cawal-ts'unub soc te bintic ay cu'une; 19soc hich ya calbe te jch'uhlel: Jch'uhlel, bayelix bin q'uejbil te ya xtuhun awu'un bayel ha'bil; we'an, uch'an, tse'eluc me awo'tan, xchi. 20Pero hich halbot yu'un te Diose: Ma xana' q'uinal. Yo'tic ta ahc'abal ya xtalat ta c'ambeyel ach'uhlel, ha yu'un te bin q'uejbil awu'un, ¿mach'a ya yich'bat hilel? xchi sc'oblal. 21Hich nix sc'oblal a te mach'a ya stsob sc'uhlejal te ya xtuhun yu'un stuquel, te mayuc sc'uhlejal ta stojol te Diose, xchi. 22Te Jesús la yalbe te jnopojeletic yu'un: Ha yu'un ya calbeyex, ma me xbaht ta awo'tanic sna'ulanel bin ut'il ya xcuxajex, ha te bin yac awe'ic; o te abaq'uetal, bin yac alapic. 23Te cuxlejalil c'ax hich sc'oblal a te bin ut'il te we'elil; soc te baq'uet c'ax hich sc'oblal a te bin ut'il te c'u'ul. 24Ilawilic te jojetic: ma ba ya ya'iyic awal soc ma ba ya ya'iyic c'ajoj; mayuc snahul o yawil te yawal-ts'unubic, pero mac'limbilic yu'un Dios. ¿Ma bal c'axuc hich ac'oblalic a te bin ut'il te mutetique? 25Soc ¿mach'ahex a te ta scuenta sna'ulanel ta awo'tanic te ya xhu' yac anahtubtes xan aba junuc xuhc'ubil? 26Bueno, teme ma xhu' awu'unic spasel te bin peq'uel sc'oblale, ¿bin yu'unix a te ya xbaht ta awo'tanic sna'ulanel te bintic xan ayique? 27Ilawilic te bin ut'il ya xcol te ha'mal nichimetic: ma x'a'tejic soc ma xya'iyic jalab; pero ya calbeyex, spisil te yutsilal te Salomón ma ba ya spajbe yutsilal junuc te nichime. 28Teme Dios hich ya ya'be yutsilal te ha'mal nichimetic te yo'tic ay ta q'uinal soc ta yan c'ahc'al ya yich'ix otsesel ta c'ahc' ta horno, ¿ma bal c'axemuc to xan hich ay bin ya ya'beyex alapic, ha'ex te mayuc lec sch'uhunel awo'tanique? 29Ha yu'un ma me xbaht ta awo'tanic sna'ulanel te bin yac awe'ic o te bin yac awuch'ic; ma me xawac' awocolic ta sna'ulanel, 30como spisil te yantic ay ta bahlumilal ha bahem ta yo'tanic slehel ini; pero te Atatic ya sna' te ya xtuhun awu'unic ini. 31Ha nahil xalehic te cuentahinel yu'un Dios, hich ya x'a'botex spisil a ini. 32Ma me xiwex, tut jtsohb tuminchijex, como te Atatic lec ya ya'iy te ya ya'beyex te cuentahinel yu'une. 33Chonahic te bintic ay awu'unic, q'uebembeyahic te pobrehetique; pasa achu'uyic te ma xpoco'ubic, ayuc me c'uhlejalil ta ch'ulchan te ma xlaj, te banti ma x'och j'elec' soc te banti ma xjoch'ob. 34Como te banti ay te ac'uhlejalic, tey ay a te awo'tanique. 35Chapaluquex me soc tsunuluc me ac'ahq'uic; 36hichuquex me te bin ut'il a'batetic te wiq'uil sitic ta smahliyel bin ora ya suht tal ta il-nuhpunel te yajwalic, scuenta yu'un te c'alal ya xhul ta c'op, ora ya sjambeyic te ti'nahile. 37Bayel me yutsil te a'batetic te wiq'uil sitic ta mahlab a ya xhulic ta tahel yu'un te yajwalique. Jamal ya calbeyex, ya me schahpan sba soc ya me x'ac'otic ta we'el ta mesa yu'un te yajwalic, soc ya me xtal yac' sba ta a'batinel yu'unic. 38Aunque ya xtal ta schebal o ta yoxebal buelta ya sjel sba jcanan ta ahc'abal, teme hich chapalic a ya xhul ta tahel, bayel me yutsilic te a'batetic ini. 39Pero na'ahic me: Te yacuc sna' te yajwal na te bin ora ya xtal te j'elec', wiq'uil sit a, ma ba ya yac' ta ochintayel te snahe. 40Ha nix hichex, chapaluquex me, como ya xtal te Nich'anil ay ta scuenta winic te bin ora ma ba yac ana'belic a, xchi. 41Te Pedro la sjoc'obe te Jesús: Cajwal, ¿ho'otcotic nax bal jc'oblalcotic te sloc'ombahil c'op ini, o ha nix sc'oblal spisilic? xchi. 42Hich halbot yu'un te Cajwaltic: ¿Mach'a a te jcanan te jun yo'tan soc te ay sp'ijil yo'tan, te ha ya x'a'bot scuentahimbe te a'batetic yu'un te yajwal scuenta yu'un ya spucbe bin ya xtuhun yu'unic ta yorahil? 43Bayel me yutsil te a'bat hich yac spasbel a ya xhul ta tahel yu'un te yajwale. 44Jamal ya calbeyex, ya me ya'be scuentahimbe spisil te bintic ay yu'une. 45Yan te a'bat te hich ya yal ta yo'tan: Ma xtal ta ora te cajwal, teme xchihe, hich ya xhahch smajticlan te a'batetic soc te criadahetic, soc ya xhahch ta we'el uch'el soc ta yacubel, 46ma ba yac ta mahlab a ya xhul ta tahel yu'un te yajwal, te bin ora ma ba yac sna'bele. Ya me x'a'bot tulan castigo soc ya x'a'bot sjoquin mach'atic mayuc sch'uhunel yo'tanic. 47Te a'bat te sna'oj bin ya sc'an yo'tan te yajwal, pero teme ma ba la schahpan sba soc ma ba la spas te bin la sc'ane, ya me yich' bayel ta yahlel majel. 48Yan te a'bat ta scaj ma sna' te bin ya spas te ya yich' majel yu'une, ma ba bayel majel ya yich' stuquel, como spisil te mach'a bayel bin a'bot, bayel bin ya xc'ambot, soc te mach'a bayel bin a'bot scuentahin, c'ax hich ya xc'ambot suhtel a. 49Tal cac' c'ahc' ta bahlumilal. Co'tanuc te hahchemix ta tihlel. 50Pero ya sc'an te nahil ya xc'ax jwocol, soc ¡bayel jwocol ya ca'iy ha to c'alal ya xc'oht ta pasel! 51¿Acuyojic bal te tal cac' lahmajuc q'uinal ta bahlumilal? Ya calbeyex, ma hichuc, ha tal cac' hahchuc c'op. 52Yo'tic soc ta patil bahel, ho'tuhl ta junax na ya me sjat sbahic, oxtuhl ya scontrahinic cha'tuhl, soc cha'tuhl ya scontrahinic oxtuhl. 53Te tatil ya me scontrahin te snich'an, te al-nich'an ya me scontrahin te state; te nanil ya me scontrahin te yantsil-al, te ach'ix ya me scontrahin te snane; te alibalme'el ya me scontrahin te yalib, te alibal ya me scontrahin te yalibme'ele, xchi te Jesús. 54Te Jesús hich la yalbe xan te ants-winiquetique: Te c'alal yac awilic te ya xtal tocal ta stojol smahlib c'ahc'al, hich yac awalic: Ya xtalix ha'al, xchihex, hich nix ya xc'oht ta pasel a. 55Soc te c'alal ya xtal ic' ta stojol sur, hich yac awalic: C'ux me c'ahc'al yo'tic, xchihex, hich nix ya xc'oht ta pasel a. 56¡Jchebal-o'tanex! Yac ana'ic stsahtayel bin yilel te ch'ulchan soc te bahlumilal, ¿bin ut'il ay a te ma xana'ic stsahtayel te bin yaquix ta c'ohel ta pasel ta ora ini? 57¿Bin yu'un ma ha'uquex nix yac anopic te bin toj ta pasele? 58Te c'alal yacat ta bahel soc acontra ta stojol juez, ayuc bin ut'il yac achahpan aba soc ta be. Ha wocol teme ya stehc'anat ta stojol juez, hich te juez ya yac'at ta sc'ab policía, te policía ya yotsesat ta cárcel. 59Ya calbat te ma ba ya xloc'at tey a ha to teme ts'acal yac atoj, xchi.


Copyright
Learn More

will be added

X\