Santiago 4

1¿Banti ya xtal te guerra soc te hach-c'op ta awoholilic? ¿Ma bal ha'uc ta scuenta te bintic ya smulan awo'tanic, te ha ya ya'iyic tsaltamba ta awo'tanique? 2Ay bin ya xbic'taj awo'tanic yu'un, pero ma ba yac atahic; ya xmilawanex soc ay sbic'tal awo'tanic, pero mayuc bin yac atahic a; yac atsal abahic soc ya xtsalawanex, pero ma ba yac atahic a te bin ya sc'an awo'tanic, como ma ba yac ac'ambeyic te Diose. 3Yac ac'ambeyic, pero ma ba yac awich'ic, yu'un ma ba lec yac ac'ambeyic, ha nax yac ac'anic yu'un yac atuhunic yu'un te bintic ya smulan awo'tanique. 4¡J'antsinelex soc j'antsiwejex! ¿Ma bal ana'ojic te ha scontrahinel Dios teme jun awo'tan abahic soc te bahlumilale? Te mach'a ya sc'an te jun yo'tan sba soc te bahlumilal, ha scontrahinej te Diose. 5O ¿ya bal acuyic te tojol hich ya yal te Shun Dios: Te espíritu te la yac' ayinuc ta co'tantic, ha bayel xut'et yo'tan, te xchihe? 6Pero c'ax bayel xan yutsil-o'tanil ya yac' te Diose. Ha scuentahil te hich ya yal: Dios ya scontrahin te mach'a ya stoy sba, pero ya sc'uxultay te mach'a peq'uel ay, xchi. 7Ha yu'un ac'a abahic ta cuentahinel yu'un te Diose; ma xawac' yochintayex te pucuje, hich ya xloc' ta ahnel ta atojolic. 8Nohpojanic ta stojol Dios, hich ya xnohpoj ta atojolic. Jmulawiletic, poca ac'abic; soc ha'ex te cheb awo'tanique, poca awo'tanic. 9Mela awo'tanic, oq'uetaya abahic. Ac'a sutp'ijuc ta oq'uel te atse'ejic, soc ac'a sutp'ijuc ta mel-o'tan te stse'elil awo'tanique. 10Pehc'ana abahic ta stojol te Cajwaltic, ha me ya stohytesbeyex ac'oblalic. 11Quermanotac, ma me talel c'axeluc xawalbe abahic bin chopol. Te mach'a ya yalbe bin chopol te yermano o ya yich' ta c'op, ha ya yalbe chopol sc'oblal te Ley soc ha ya yich' ta c'op. Teme ha'at yac awich' ta c'op te Ley, ma ba yac apas te bin ya yal te Ley, ha jchahpanwanejat yu'un ya xc'ohat. 12Jtuhl nax mach'a yac'oj te Ley soc te ha Jchahpanwanej yu'un, ha te mach'a ya xhu' ya xcoltaywan soc ya xch'ayawan. Pero te ha'ate ¿mach'a yac acuy aba yu'un te yac awich' ta c'op yan? 13A'iya awa'iyic ini, ha'ex te hich yac awalic: Yo'tic o pajel ya xbohotcotic ta pueblo, ya xhalajotcotic jun ha'bil tey a, ya ca'iycotic mambajel, chombajel soc ya me jpascotic bayel ganar, te xchihexe. 14Ma xana'ic bin ya xc'oht ta pasel pajel. ¿Bin a te acuxlejale? Ha sahb lum te jts'ihn nax ya xchicnaj, patil ya xch'ay bahel. 15Ha ya sc'an te hichuc yac awalic: Teme hich ya sc'an te Cajwaltic, teme cuxulotcotic a, ya jpascotic ini o te yane, xchihex. 16Yan te ha'exe yac atoy abahic ta scuenta awulwul-c'opic. Spisil toybahil hich te bin ut'il ini ma lecuc. 17Te mach'a sna'oj te bin lec ta pasel, pero teme ma ba ya spas, ha smul abi.


Copyright
Learn More

will be added

X\