Hebreos 9

1Te nahil chapbil-c'op yich'oj mandariletic yu'un ch'uhuntayel te Dios soc ay ch'ul awilal ta bahlumilal, 2como hich chahpambil te Nahilpac' Templo: te sba-tsahlal, te Ch'ul Awilal sbihil, tey ay a te scajtajib c'ahc', te mesa soc te panetic ac'bilic ta stojol Dios. 3Ta spat te schebal stsahlul pac' ay te Mero Ch'ul Awilal sbihil 4te banti ay te schic'ojbil pom pasbil ta oro soc te scaxahul te chapbil-c'op te swohlol potsbil ta oro, ta banti q'uejticlambil jun oxom pasbil ta oro te yich'oj te maná, soc tey ay a te snahbate' Aarón te nichin soc te cha'pehch ton yu'un te chapbil-c'ope. 5Ta sba te scaxajul ay querubinetic yu'un te yutsilal Dios te la yaxintesic te yawil stahel perdón. Ma xhu' ya calbecotic sc'oblal spisil ta ora ini. 6Te c'alal chahpambil ta spisil, ta sba-tsahlal te Nahilpac' Templo jujun c'ahc'al ya x'ochic tey a te sacerdotehetic ta spasel te ya'telic yu'un sch'uhuntayel te Diose. 7Pero ta scha'tsahlal junax buelta ta jujun ha'bil ya x'och tey a te muc'ul sacerdote, ya yich' ochel ch'ich' te ya yac' ta stojol Dios yu'un stojel smul soc yu'un smul te pueblo te ma yolojuc la spasique. 8Hich ac'ot ta na'el yu'un te Ch'ul Espíritu te ma to chicanuc sbehlal te Mero Ch'ul Awilal, te c'alal teq'uel to te sba-tsahlal te Nahilpac' Templohe. 9Ha seña c'ohem cu'untic ta ora ini, te bin ut'il te smahtan Dios soc te milbil mahtaniletic ma xhu' ya slecubtesbe yo'tan te mach'a ya sch'uhuntay te Diose, 10como ha nax sc'oblal we'el-uch'el, te bintic ut'il la spoc sbahic, soc te mandariletic scuenta baq'uet; ha ac'bilic ha to c'alal ya sta yorahil te ya yich' ach'ubtesel te bintic aye. 11Pero c'alal chicnaj te Cristo, te muc'ul sacerdote yu'un te bintic lec talel yaque, tey och a ta nahilpac templo te c'ax muc' soc te c'ax lec, te ma pasbiluc ta c'abal, te ma li'uc ay ta bahlumilal. 12Ma ba och ta scuenta sch'ich'el tat tentsunetic o jcolel wacaxetic, ha och ta scuenta sch'ich'el nix stuquel, och bahel junax buelta ta Mero Ch'ul Awilal, te bin ut'il wehtemix yu'un te colel scuenta sbahtel q'uinal. 13Como te sch'ich'el torohetic soc tat tentsunetic soc te stanul te jcolel wacax te la yich' tsihtsinel ta stojol te mach'atic bohloben sc'oblalic, teme la slecubtesbe sbaq'uetalic, 14¿ha'uc to balix a te sch'ich'el te Cristo, te ha ta scuenta te Espíritu sbahtel q'uinal ay la yac' sba ta lajel ta stojol Dios scuenta milbil mahtanil te mayuc bin jihnem, ya spocbeyex awo'tanic yu'un awa'telic scuenta lajel, scuenta yu'un yac awac' abahic ta a'batinel ta stojol te cuxul Diose? 15Ha scuentahil te ha Jc'asesej-c'op yu'un yach'il chapbil-c'op te Cristo, scuenta yu'un te mach'atic ic'bilic ya x'a'bot yich'ic sbahtel q'uinal te bin yaloj te Diose. Hich ya xc'oht ta pasel yu'un te laj te Cristo yu'un ya yac'ticlan ta libre yu'un te mulil spasojic c'alal cuentahimbilic to yu'un te nahil chapbil-c'op. 16Como teme pasbil hilel jun testamento, ha to ya xc'oht ta pasel a teme cham te mach'a la spas, 17como ha to ya xc'oht ta pasel a te c'alal ya xcham te mach'a la spas, ma to ayuc sc'oblal a te c'alal cuxul to. 18Ha scuentahil te ay ch'ich' la yich' malel c'alal la yich' chapel te nahil chapbil-c'op, 19como te c'alal laj yo'tan te Moisés ta yalbeyel ya'iyic spisil te pueblo te mandariletic, la stsac ta sc'ab te sch'ich'el jcolel torohetic soc tat tentsunetic, soc la yich' talel ha' soc tsajal stsotsel tuminchij soc hisopo-te', la stsihtsin a te libro yu'un te mandariletic soc spisil te pueblo, 20hich la yal: Ha ch'ich' ini yu'un te chapbil-c'op te yalbeyejex ta mandar te Diose, xchi. 21Soc ha nix hich la stsihtsin ta ch'ich' te Nahilpac' Templo soc spisil bintic tuhun yu'un te ya'tele. 22Como ya yal te Ley te jteb ma spisiluc ya sc'an ya yich' lecubtesel ta ch'ich'; teme ma ba ya yich' malel ch'ich', mayuc perdón. 23Hich la sc'an ya yich'ic lecubtesel te bintic señahiletic yu'un te bintic ayic ta ch'ulchan; yan te bintic ayic ta ch'ulchan la sc'an milbil mahtanil te c'ax lec xan a. 24Como te Cristo ma ba och bahel ta ch'ul awilal pasbil ta c'abal, te ha seña te smelelil ch'ul awilal, tey nix och bahel ta ch'ulchan, yu'un ya stehc'an sba ta stojol Dios ta jcuentatic. 25Ma yu'unuc te bayel buelta ya yac' sba ta lajel, hich te bin ut'il jujun ha'bil te muc'ul sacerdote ya x'och bahel ta Mero Ch'ul Awilal soc ch'ich' te ma ha'uc yu'une. 26Te hichuque, la sc'an te bayel buelta ya xc'ax swocol te Cristo yalel c'alal ta shahchibal to tal bahlumilal. Pero yo'tic te slajibalix ha'biletic, jmehl nax xtaluc yac' sba ta lajel ta sch'ayel mulil. 27Jmehl nax ya xchamic ants-winiquetic, patil ay ich'el ta c'op, 28ha nix hich te Cristo, jmehl nax la yac' sba ta lajel yu'un sch'aybeyel smul tsobolic; soc ya xcha'tal xan, pero ma yu'unuc sch'ayel mulil, ha ya xtal scoltay te mach'atic yac smahliybelic.


Copyright
Learn More

will be added

X\