Hebreos 7

1Te Melquisedec, ha ajwalil yu'un Salem soc sacerdote yu'un te Dios te mero toyol ay; ha loc' sta ta be te Abraham te c'alal suht tal ta stsalel te ajwaliletic, soc la ya'be bendición. 2Hich te Abraham la ya'be te Melquisedec jun ta slajunebal ta spisil. Te bin ya sc'an ya yal te sbihile, ha ajwalil yu'un te bin stojil ta pasel, xchi, soc te bin ut'il ajwalil yu'un Salem, ha ajwalil yu'un lamal q'uinal, xchi. 3Ma chicanuc sme' stat soc ma chicanuc sts'umbal; ma chicanuc shahchibal soc ma chicanuc slajibal. Hich pajal soc te Snich'an Dios, sbahtel q'uinal ay ta sacerdotehil. 4Na'ahic me te bin ut'il mero muc' sc'oblal te Melquisedec, te ha a'bot yu'un te tatil Abraham jun ta slajunebal te bin spojoj talele. 5Melel te sts'umbal Leví te ay ya'telic ta sacerdotehil, pasbilic ta mandar ta yich'el jun ta slajunebal te bin ay yu'un te pueblo, ha te yermanotac, aunque ha'ic nix sts'umbalic Abraham te yermanotaque. 6Yan te Melquisedec, te ma junuc sts'umbal soc stuquel, la yich' ta sc'ab Abraham te jun ta slajunebal soc la ya'be bendición te mach'a ay ta scuenta te bin yaloj te Diose. 7Soc spisilic ya sna'ic, te mach'a peq'uel ay ya x'a'bot bendición yu'un te mach'a toyol xan aye. 8Te levitahetic ha winiquetic te ya xlajic, ya yich'ic te jun ta slajibal, yan te Melquisedec te ya xhalot ta testigo-c'op te cuxul, ha la yich' te jun ta slajunebal. 9Ya xhu' ya caltic, te Leví, te ya yich' te jun ta slajunebal, ha la ya'be te Melquisedec ta scuenta Abraham te jun ta slajunebal, 10como te Leví ay to ta sbaq'uetal a te Abraham te c'alal loc' ta tahel ta be yu'un Melquisedec. 11Te ha'uc lec c'ohtic ta scuenta te ya'tel ta sacerdotehil yu'un Leví (te ha ta scuenta la yich' te Ley te pueblo) ¿bin yu'unix a te weht yan mach'a la yich' ya'tel ta sacerdotehil hich te bin ut'il Melquisedec, te ma hichuc te bin ut'il Aarón? 12Como teme ya xjelon te ya'tel ta sacerdote, ha nix hich ya sc'an ya xjelon te ley. 13Te Cajwaltic, te mach'a hich halbil sc'oblal, ha yan jchahp ts'umbalil a, mayuc mach'a tey ay a te a'tej ta scajtajib ta chiq'uel mahtanil. 14Como chican te Cajwaltic ha sts'umbal Judá, te mayuc bin la yal te Moisés te ya yich' ya'tel ta sacerdotehil. 15Ha jamal xan ya xchicnaj te bin yacotic ta yalel teme ya xhahch yan sacerdote te pajal soc Melquisedec, 16te ma ba la yich' ya'tel ta sacerdotehil ta scuenta te ley yu'un winiquetic, pero ha ta scuenta te yip te cuxlejal te ma xlaje. 17Hich ya xhalot ta testigo-c'op: Ha'at sacerdotehat sbahtel q'uinal, hich te bin ut'il te Melquisedec, te xchihe. 18Hich laj sc'oblal te mandaril ay ta nahil to ta scaj te mayuc yip soc mayuc bin tuhun yu'un a, 19(como mayuc bin jc'axel lecub yu'un te Ley), hich chicnaj yan smuc'ul-o'tanil te ha lec xan, te ha ta scuenta te ya xnohpojotic ta stojol te Diose. 20Hich c'oht ta pasel ta scuenta te bin la yal ta jamal te Diose; yan te sacerdotehetic ma ba a'bot yich' ya'telic ta scuenta te bin la yal ta jamal; 21pero te Jesús la yich' ya'tel ta sacerdote ta scuenta te bin la yich' halel ta jamal, te c'alal hich halbot: Jamal yaloj te Cajwaltic, ma ba ya sut sc'op: ha'at sacerdotehat sbahtel q'uinal, hich te bin ut'il te Melquisedec, xchi sc'oblal. 22Ha yu'un te Jesús la yac' c'ohtuc ta pasel chapbil-c'op te c'ax lec xan a. 23Te yantic sacerdotehetic ay bayelic, yu'un ma ba hu' ya xhilic xan ta a'tel ta scaj te ya xchamic; 24yan te Jesús te stalel ay, ma xyanij te sacerdotehil yu'une. 25Ha scuentahil te ya xhu' ya scoltay sbahtel q'uinal te mach'atic ya xnohpojic ta stojol Dios ta scuenta, como stalel cuxul yu'un ya xc'opoj ta scuentahic. 26Ya xtuhun cu'untic te muc'ul sacerdote te ch'ultesbil, te mayuc smul, parte ay yu'un jmulawiletic soc c'ax hich toybot sc'oblal a te bin ut'il te ch'ulchane. 27Ma hichuc ay te bin ut'il te yantic muc'ul sacerdotehetic te jujun c'ahc'al nahil ya ya'be milbil mahtaniletic scuenta stojel smulic, patil ya ya'be yu'un te pueblo; como te Jesús junax buelta la yac' milbil mahtanil scuenta sbahtel q'uinal te c'alal la yac' sba ta lajel. 28Como te Ley ya yotses ta muc'ul sacerdote winiquetic te mayuc yipic; pero te bin la yich' halel ta jamal, te ha patil yu'un te Ley, ha la yotses te Nich'anil te c'ax lec c'oht sbahtel q'uinal.


Copyright
Learn More

will be added

X\