Hebreos 5

1Spisil te muc'ul sacerdotehetic tsahbilic ta yohlil winiquetic soc yich'oj ya'telic te ya xc'opoj yu'unic ta stojol Dios soc te ya ya'behic Dios mahtaniletic soc milbil mahtaniletic yu'un stojel mulil. 2Ya xhu' ya xcuhch yu'un te mach'atic ma sna'ic stsahtayel sbahic soc te mach'atic ya xhowiyic, como ha nix hich mayuc yip, 3ha scuentahil te ya sc'an ya yac' milbil mahtaniletic yu'un stojel smul soc stojel te smul te pueblo. 4Mayuc mach'a stuquel-o'tan nax ya yac' sba ta muc'ul sacerdotehil, ya sc'an ya x'ic'ot yu'un Dios, hich te bin ut'il ic'ot te Aarón. 5Ha nix hich te Cristo, ma ba la sle yutsilal stuquel yu'un ya yotses sba ta muc'ul sacerdote, pero hich halbot yu'un Dios: Ha'at jnich'anat; nax to nax ayinat cu'un, xchi sc'oblal. 6Soc hich te bin ut'il ya yal ta yan lugar: Ha'at sacerdotehat sbahtel q'uinal, hich te bin ut'il te Melquisedec, xchi. 7Te c'alal ay ta bahlumilal ta scuxlejal a te Cristo, tulan awon soc oc' ta sc'oponel te Mach'a ya xhu' ya x'ac'to ta libre yu'un lajel, soc a'iybot sc'op ta scaj te peq'uel la yac' sba. 8Aunque ha Nich'anil, tey la snop sch'uhunel mandar a ta scuenta te c'ax bayel swocol; 9soc te c'alal ts'acal c'oht, ha J'ac'-colel c'oht scuenta sbahtel q'uinal yu'un te mach'atic ya sch'uhumbeyic smandar, 10soc a'bot yich' ya'tel yu'un Dios ta muc'ul sacerdotehil hich te bin ut'il Melquisedec. 11Ay to bayel bin ya jc'an ya calbecotic sc'oblal, pero wocol ta jambeyel sc'oblal como ma ba ya xnohp awu'unic ta ora. 12Ya sc'an te ha'uquex yac awa'iyiquix p'ijubteswanej te bin ut'il ayix ora te ach'uhunejique, pero ya sc'an te yac awich'ic xan p'ijubtesel a te bin ut'il ay te shahchibal ta nopel te sc'op Diose. Ya to xtuhun awu'unic chu'ul, ma ha'uc te tulan we'elil. 13Spisil te mach'atic cuxulic to ta chu'ul ma sna'beyic scuentahil te nohptesel yu'un te bin lec ta pasel, como alal to. 14Yan te mach'atic muq'uiquix ha ya xtuhun yu'unic te tulan we'elil, ha te mach'atic ta scuenta spasulanel la snopic stsahtayel te bintic lec soc te bintic ma lecuque.


Copyright
Learn More

will be added

X\