Hebreos 3

1Ha yu'un, quermanotac te ch'ultesbilex, te pajal ic'bilotic yu'un Dios, na'a me te Jesús, te jpuc-c'op soc muc'ul sacerdote, te ya caltic ta jamal te ha jch'uhunejtic, 2te jun yo'tan ta stojol te mach'a a'bot yich' ya'tel yu'un, hich te bin ut'il jun yo'tan te Moisés ta stojol spisil te na yu'un Dios. 3Te Jesús c'ax hich ay ta ich'el ta muc' a te bin ut'il te Moisés, hich te bin ut'il c'ax hich ay ta ich'el ta muc' a te jpas-na te bin ut'il te nahe. 4Como spisil nahetic ay mach'a pasot yu'un, pero ha Dios te la spas spisil bintic ay. 5Te Moisés, te bin ut'il ha a'bat, jun yo'tan ay ta spisil te na yu'un Dios, soc la yal ta testigo-c'op te bin ya yich' halel ta patil. 6Yan te Cristo, te bin ut'il ha nich'anil, jun yo'tan scuentahimbeyej te na yu'un Dios. Ho'otic te snahotic, teme stalel ay c'alal ta slajibal c'ahc'al te smuc'ul co'tantic soc te ya xtohy q'uinal ca'iytic yu'un te bin yacotic ta smahliyel. 7Ha yu'un, hich te bin ut'il ya yal te Ch'ul Espíritu: Teme yac awa'iybeyic sc'op yo'tic, 8ma me tulanuc xawac' awo'tanic, hich te bin ut'il la stoy sbahic ta yorahil tsajel ta jochol taquin q'uinal, 9te banti la stsajon yilic te antiguo ame'atatic, la spasonic ta prueba soc cha'winic (40) ha'bil la yilbonic te ca'tele. 10Ha scuentahil te ilinon ta stojol te jcaj ts'umbalil ini, hich la jcal: Jc'axel howiyem yo'tanic, ma sna'beyic sba te behetic cu'un, xchihon. 11Ha yu'un la jcal ta jamal ta scuenta quilimba: Mayuc bin ora ya x'ochic ta banti ay te cux-o'tanil cu'une, xchi. 12Ha yu'un tsahtaya me abahic, quermanotac, te ma me ayuc mach'a ay chopol yo'tan te ma sch'uhun, te ya spit sba ta stojol te cuxul Dios. 13Jujun c'ahc'al talel c'axel a'beya abahic yip awo'tanic, te c'alal yac to ta halel: Yo'tic, te xchihe, scuenta yu'un ma me ayuc mach'a ya xtulanub yo'tan ta scuenta lo'loyel yu'un mulil, 14como jun c'ohemotic soc Cristo teme quich'ojtic c'alal ta slajibal c'ahc'al te smuc'ul co'tantic te ay cu'untic ta shahchibal. 15Hich te bin ut'il la yich'ix halel: Teme yac awa'iybeyic sc'op yo'tic, ma me tulanuc xawac' awo'tanic, hich te bin ut'il la stoy sbahic, xchi. 16¿Mach'atic a te la ya'iyic soc te la stoy sbahic ta stojol? ¿Ma bal ha'uc spisil te mach'atic ic'otic loq'uel tal ta sq'uinal Egipto yu'un te Moisés? 17Soc ¿mach'atic a te ilinem Dios ta stojolic cha'winic (40) ha'bil? ¿Ma bal ha'uc te mach'atic la sta smulic, te hil sbaq'uetalic ta jochol taquin q'uinal? 18Soc ¿mach'atic a te jc'axel halbotic yu'un Dios te ma ba ya x'ochic ta cux-o'tanil yu'une? ¿Ma bal ha'uc te mach'atic la sc'axuntaybeyic te sc'ope? 19Ha yu'un ya quiltic te ma ba hu' yochelic ta scaj te ma ba la sch'uhunique.


Copyright
Learn More

will be added

X\