Hebreos 12

1Ha yu'un, te bin ut'il joytaybilotic yu'un tsobol ta tuhl testigohetic, ac'a quihquitaytic hilel spisil te bin ya smacotic soc te bin mulil ya sbech'otic, junuc co'tantic ac'a ahnumajucotic bahel te banti bahel yacotic, 2ac'a jt'ojan jsitic ta Jesús, te mach'a la shach soc te ya shu'tes te sch'uhunel co'tantic, ha te mach'a la sc'ases swocol ta cruz yu'un la sna' te ya sta bayel yutsil yo'tan ta patil, mayuc sc'oblal ta yo'tan te q'uexlal yu'une, soc la shuhcan sba ta swa'el te smuc'ul huctajib te Diose. 3Na'ahic me te Jesús te c'ax bayel swocol ta contrahinel yu'un jmulawiletic, scuenta yu'un ma xluhbex soc ma xch'ay te yip awo'tanic, 4como ma to ayuc amaloj ach'ich'elic yu'un scontrahinel te mulile. 5Soc ch'ay wanix ta awo'tanic te tsitsel awich'ojic te bin ut'il al-nich'anex, te hich ya yal: Jnich'an, ma me xap'ajbe te tojobtesel yu'un te Cajwaltic, soc ma me xpehc'aj awo'tan c'alal ya stsitsat; 6como te Cajwaltic ya stojobtes te mach'a c'ux ta yo'tan, soc ya smaj spisil te mach'atic ya yic' ta yal-snich'an, xchi. 7Cuhchuc me awu'unic te tojobtesel, como Dios hich ya spasbeyex te bin ut'il al-nich'anex yu'un. ¿Ay bal al-nich'anil te ma ba ya yich' tojobtesel yu'un te state? 8Yan teme ma ba yac awich'ic tojobtesel, hich te bin ut'il ya yich'ic spisilic, yu'un nix ma al-nich'anuquex abi. 9La jquich'tic tojobtesel yu'un te jtatic ta bahlumilal, soc la jquich'tic ta cuenta. ¿Bin yu'un ma ba c'ax hich ya quich'tic ta cuenta a te Jtatic ay ta ch'ulchan, te hich ya xcuxajotic ahe? 10Te jtatic cheb oxeb nax ch'ahc'al la stojobtesotic, ha chican bin lec la ya'iyic stuquelic, yan te tojobtesel yu'un Dios, scuenta jlequiltic, scuenta yu'un pajal ya quich'betic te sch'ul yutsilal. 11Melel mayuc tojobtesel te tse'el co'tantic yu'un, c'ux ya ca'iytic; pero ta patil ya yac' sit, ha te toj-o'tanil soc lamal-o'tanil yu'un te mach'atic la yich'ic tojobtesel yu'une. 12Ha yu'un hacha ac'abic te luhbenic soc te sjol awacanic te mayuc yip, 13pasa toj behetic yu'un awoquic, scuenta yu'un ma ba ya xhowiy loq'uel ta be te coxo', yu'un yacuc xlecub. 14Lehahic bin ut'il lamal awo'tanic soc spisil ants-winiquetic, soc lehahic te ch'ultesele; teme mayuc ch'ultesel, mayuc mach'a ya xhu' ya yil te Cajwaltique. 15Tsahtayahic te mayuc mach'a ma ba ya sta te yutsil yo'tan te Diose, soc te ma ba ya xpuhlin slohp' te bin ch'a te ya ya'beyex wocol soc te ya sbohlobtes tsobolex. 16Ma me ayuc mach'a ya ya'iy chijil-o'tanil, o te ma xyich' ta cuenta Dios, hich te bin ut'il Esaú, te ta scuenta junax we'elil la schon te sba-alalil. 17Ana'ojic te aunque la sc'an ta patil te ya yich' xan te bendición, ma ba ich'otix ta cuenta, ma ba hu'ix yu'un suhtesbel yo'tan, aunque bayel la yoq'uetay sba yu'un. 18Ma ba nohpojemex ta wits te ya xhu' ta piquel soc te yac ta tihlel c'ahc' tey a; ma ba nohpojemex ta spimil yihc'al q'uinal, ta yihc'al q'uinal soc ta ic'al ha'al, 19ta stojol oq'uesinel corneta soc ta stojol te c'op yu'un mach'a c'opoj, ha te la yalbeyic wocol te mach'atic la ya'iyic te manchuc ya xc'opoj xan, 20como ma ba cuhch yu'unic te hich la yal ta mandar: Aunque chambahlam ya stec' te witse, ya me xlaj ta ch'ojel ta ton o ya me yich' lowel ta lanza, te xchihe. 21Te bin ut'il c'ax xiweltic sba te bin la yilic, hich la yal yu'un te Moisés: Yacon ta nihquel yu'un xiwel, xchi. 22Pero te ha'exe nohpojemex bahel ta wits Sión, ta muc'ul pueblo yu'un te cuxul Dios, ha te Jerusalén scuenta ch'ulchan, ta stojol tsobol ta mil ch'ul a'batetic, 23ta banti stsoboj sbahic te ba-nich'aniletic te ts'ihbabil sbihilic ta ch'ulchan. Nohpojemex ta stojol Dios, te Jchahpanwanej yu'un spisilic, ta stojol te espírituhetic yu'un te mach'atic toj bin la spasic te ts'acal pasotic ta toj, 24ta stojol Jesús, te Jc'asesej-c'op yu'un te yach'il chapbil-c'op, soc ta stojol te ch'ich' te tsihtsimbil, te c'ax lec xan bin ya yal a te bin ut'il bin ya yal te sch'ich'el Abel. 25Tsahtaya abahic te ma ba yac ap'ajic te mach'a yac ta c'op, como teme ma ba colic loq'uel ta c'abal te mach'atic la sp'ajic te mach'a tsitsotic yu'un ta bahlumilal, c'ax hich a te ho'otic teme ya jwalac'patiytic te mach'a ya stsitsotic c'alal ta ch'ulchan. 26Ta hich ora la snihc sba te bahlumilal yu'un te c'opoj te Diose; pero yo'tic hich yalojix: Jun xan buelta ya cac' nihcuc ma hipuc nax a te bahlumilal, ha nix hich ya cac' nihcuc te ch'ulchane, xchi. 27Te bin ut'il la yal: Jun xan buelta, te xchihe, ha ya yal te ya me yich'ic loq'uesel te bintic ya xhu' ta nihquel, ha te bintic pasticlambil, scuenta yu'un ya xhil te bintic ma xhu' ta niquele. 28Te cuentahinel yu'un Dios te yac quich'beltic ma xhu' ta niquel, ha yu'un ac'a me caltic wocol yu'un, soc ac'a cac' jbahtic ta a'batinel ta stojol Dios soc xiwel soc yich'el ta muc', hich te bin ut'il lec yo'tan yu'une. 29Como te Dios cu'untic, hich ay te bin ut'il c'ahc' te ya xlajinwan.


Copyright
Learn More

will be added

X\