Hebreos 11

1Te sch'uhunel-o'tanil, ha te ya jna'tic te ya me xc'oht ta pasel te bin yacotic ta smahliyel, ha te jna'ojtic te smelelil te bin ma chicanuc ta ilele. 2Ha nix ta scuenta te lec c'oht sc'oblalic te antiguo me'iltatiletique. 3Ta scuenta sch'uhunel co'tantic ya jna'tic te ta scuenta smandar Dios la yich' pasel te ch'ulchan bahlumilal, te bin chican ta ilel la yich' pasel a te bin ma chicanuc ta ilele. 4Ta scuenta sch'uhunel yo'tan te Abel c'ax hich yutsil a te milbil mahtanil la yac' te bin ut'il la yac' te Caín. Hich halbot sc'oblal te toj yo'tan, te bin ut'il Dios la yal te lec yo'tan yu'un te smahtan la yaq'ue. Aunque chamenix te Abel, ya to xc'opoj ta scuenta te sch'uhunel yo'tan. 5Ta scuenta sch'uhunel yo'tan te Enoc cuxul a ic'ot bahel scuenta yu'un ma ba ya xcham; ma ba weht ta lehel, como ic'ot bahel yu'un Dios. Te c'alal ma to x'ic'ot bahel a, halbot sc'oblal te lec yo'tan Dios yu'un. 6Teme mayuc sch'uhunel-o'tanil, ma xhu' te lec yo'tan Dios yu'un, como te mach'a ya xnohpoj ta stojol Dios ya sc'an ya sch'uhun te ay Dios soc te ya ya'be smahtan te mach'atic ya xlehot yu'une. 7Ta scuenta sch'uhunel yo'tan te Noé, c'alal halbot yu'un Dios sc'oblal bintic ma to chicanuc ta ilel, jun yo'tan la spas te barco te banti col soc te mach'atic ay yu'une. Ta scuenta sch'uhunel yo'tan la yalbe smul te bahlumilal soc a'bot yich' te stojil-o'tanil te ya xtal ta scuenta sch'uhunel-o'tanil. 8Ta scuenta sch'uhunel yo'tan te Abraham, c'alal ic'ot yu'un Dios, la sch'uhun mandar te ya xbaht ta yan lugar te ya x'a'bot yich'; hich loc' bahel, ma ba sna'oj te banti yac ta bahele. 9Ta scuenta sch'uhunel yo'tan hich nahin te bin ut'il jbehyom ta yan q'uinal te halbot ya x'a'bot yich', la snahin nahilpac' soc Isaac soc Jacob, te ha nix yu'unic ya xc'oht te bin yaloj te Diose, 10como te Abraham yac smahliybel te pueblo te ay tulan yich'o-ip, te la yich' nopel yu'un Dios bin yilel ya xc'oht soc te pasbil yu'une. 11Ha nix hich ta scuenta sch'uhunel yo'tan te Sara, aunque jma'al, a'bot yip yu'un ya xhahch yal; hich ayin yal aunque c'axemix ya'bilal a, como la sch'uhun te stalel jun yo'tan te mach'a yaloj te hich ya xc'oht ta pasele. 12Ha yu'un ta scuenta jtuhl winic te c'ax mamalix, tsobol loq'uic a hich te bin ut'il eq'uetic ta ch'ulchan soc hich te bin ut'il shi'al mar te ma xhu' ta ahtayel. 13Ta spisilic ini ay sch'uhunel yo'tanic a c'alal chamic, ma ba la yich'ic te bin halbot ya yich'ic, namal to la yilic, la sch'uhunic soc tse'el yo'tanic yu'un. Jamal la yalic te ha jyanlumetic soc jbehyometic ta bahlumilal. 14Te mach'atic hich ya yalic, jamal ya yaq'uic ta na'el te yac slehbelic yan slumalic, 15como te ha'uc yacalic ta sna'el te banti loq'uic talel, hu' yu'unic te suhtic bahel te hichuque. 16Pero la yahnuytayic te bin lec xan, ha te ch'ulchane. Ha yu'un te Dios ma ba q'uexaw te ya xhalot te ha Dios yu'unic, como ha la schahpambe jun muc'ul pueblo yu'unic. 17Ta scuenta sch'uhunel yo'tan te Abraham, c'alal tsajot yu'un Dios, la yac' ta milbil mahtanil te Isaac, ha te mach'a ya xbaht yich' te bintic yaloj Dios, la yac' ta milbil mahtanil te hip jtuhl snich'an, 18aunque hich halbot yu'un Dios: Ta scuenta Isaac ya xchicnaj ats'umbal, te xchi sc'oblale. 19Como te Abraham sch'uhunej te ay yu'el te Dios te ya xhu' ya scha'cuxajtes ta yohlil mach'atic chamenic; soc hich ya'iyel te tey nix la scha'ic' a te snich'ane. 20Ta scuenta sch'uhunel yo'tan te Isaac la ya'be bendición te Jacob soc Esaú te ya xtal ta patil. 21Ta scuenta sch'uhunel yo'tan te Jacob, te c'alal nopol ya xchamix a, la ya'be bendición ta tuhlutuhl te snich'nab José, soc yich'oj yip ta snahbate' a, la sch'uhuntay te Diose. 22Ta scuenta sch'uhunel yo'tan te José, te c'alal nopol ya xchamix a, la yal te ya me xloq'uic bahel ta Egipto te israeletic, soc la yal hilel mandar te sc'oblal te sbaquele. 23Ta scuenta sch'uhunel yo'tanic, te sme'stat te Moisés la snaq'uic oxeb u te c'alal ayin, como la yilic te buen t'ujbil alal, soc ma ba la xi'ic te bin yaloj ta mandar te ajwalile. 24Ta scuenta sch'uhunel yo'tan te Moisés, te c'alal muc'ul winiquix a, ma ba la sc'an ya xhalot te ha yal te yantsil-nich'an faraón, 25ha lec xan la ya'iy a te pajal ya xc'ax swocol soc te pueblo yu'un Dios te bin ut'il ya smulan te yac'oltayel mulil te jc'axel nax ay; 26ha bayel xan sc'oblal ta yo'tan te bohlc'optayel ta scuenta Cristo te bin ut'il te sc'uhlejal te egipciohetic, como yac'oj sit tey a te mahtanile. 27Ta scuenta sch'uhunel yo'tan la yihquitay hilel te Egipto, ma ba la xi' te yilimba te ajwalil, como la yich' yip yo'tan yu'un te yac yilbel ya'iyel te Mach'a ma chicanuc ta ilele. 28Ta scuenta sch'uhunel yo'tan la spas te Q'uin Pascua soc la stsihtsin ta ch'ich' te puertahetic, scuenta yu'un ma ba ya xtahotic yu'un te mach'a ya smil te ba-alaletique. 29Ta scuenta sch'uhunel yo'tanic te israeletic c'axic ta Mar Rojo, sjel ta taquin lum; pero te c'alal hich nix c'an spasic te egipciohetic, tey la sjiq'uic ha' spisilic a. 30Ta scuenta sch'uhunel yo'tanic hemts'uj cohel te sts'ahcul te Jericó te c'alal la sjoyintayic huqueb c'ahc'al. 31Ta scuenta sch'uhunel yo'tan te Rahab te j'antsinel-ants la yic' ochel ta sna te jtsahtaywanejetic, hich ma ba pajal laj soc te mach'atic jc'axun-c'opetique. 32¿Bin xan ya cal? Mayuc tiempo cu'un te ya calbe sc'oblal te Gedeón, Barac, Sansón, Jefté, David, soc nix te Samuel soc te jalwanejetic, 33te ha ta scuenta sch'uhunel yo'tanic hu' yu'unic stsalel ajwaliletic, toj la ya'iyic chahpanwanej, la stahic te bin halbotic sc'oblal, la smacbeyic ye chojetic, 34la stup'ic te xpulet ta tihlel c'ahc', ma ba la yich'ic milel ta espada, a'bot yipic te c'alal lajem yipic a, tulan la ya'iyic tsalaw ta guerra, soc la snutsic bahel jyanlum soldadohetic. 35Ay antsetic la yiq'uic te mach'atic chamen yu'unic, ta scuenta te cha'cuxajtesbotic tal. Pero ay yantic te c'ax swocolic ta uts'inel, ma ba la sc'an scoltayelic, scuenta yu'un ya yich'ic te lequil cha'cuxajtesel. 36Ay yantic la yich'ic bohlc'optayel soc majel; soc xan ay la yich'ic chuquel ta cadena soc otsesotic ta cárcel. 37Ay lajic ta ch'ojel ta ton, ay la yich'ic xot'el ta serrucho, ay la yich'ic tsajel, ay lajic ta espada. Xyahl xmohic ta behel, sc'u'inejic snuhculel tuminchij soc tentsun, pobrehetic, ay swocolic ta uts'inel. 38Te winiquetic ini, mayuc mach'a ya xpajbot yutsilalic ta bahlumilal, bayuc behenic ta jochol taquin q'uinal, ta witsiltic, ta ch'entiquil soc ta lehch-ch'entiquil. 39Ta spisilic ini, aunque la stahic te halot lec sc'oblalic ta scuenta sch'uhunel yo'tanic, ma ba la yich'ic te bin yaloj te Diose, 40como ay bin c'ax hich lec a te schapoj Dios te ya ya'botic, ha te pajal ya yich'ic lecubtesel soc te ho'otique.


Copyright
Learn More

will be added

X\