Hebreos 10

1Como te Ley, te bin ut'il ha yaxinal te bintic lec te talel yac, te ma ha'uc mero smelelil te bintic aye, ma xhu' yu'un ya slecubtes te mach'atic ya xnopojic ta scuenta te milbil mahtanil ya yich' aq'uel ta jujun ha'bil. 2Te hichuque, ya xlaj ta aq'uel te mahtanil, como te mach'atic ya sch'uhuntayic, teme pocbiliquix, ma ba ya ya'iyiquix ta yo'tanic te ay smulique. 3Pero te milbil mahtanil te ya yich' aq'uel jujun ha'bil ya ya'be sna'ic te muliletic, 4como ma xhu' yu'un sch'ayel mulil te sch'ich'el torohetic soc tat tentsunetic. 5Ha scuentahil hich la yal te Cristo te c'alal hul ta bahlumilal: Ma ba la ac'an milbil mahtanil soc yan mahtanil; ha la achahpambon jbaq'uetal. 6Ma ba lec awo'tan yu'un chic'bil mahtaniletic soc te mahtaniletic yu'un stojel mulil. 7Ha yu'un la jcal: Ilawil, talemon, Dios cu'un, yu'un ya jpasbat bin ya sc'an awo'tan, hich te bin ut'il ts'ihbabil jc'oblal ta balbil hun, xchi. 8Te bin ut'il nahil la yal: Ma ba la ac'an soc ma ba lec awo'tan yu'un milbil mahtaniletic, yan mahtaniletic, soc mahtaniletic scuenta stojel mulil, (aunque ya yal ta mandariletic te hich ya sc'an aq'uele), 9soc ta patil la yal: Ilawil, talemon, Dios cu'un, yu'un ya jpasbat te bin ya sc'an awo'tan, xchi, hich la sloq'ues te bin nahil ay, yu'un ya yich' hahchel te schebale. 10Ta scuenta te hich la sc'an yo'tan te Jesucristo, la jquich'tic lecubtesel ta scuenta te jmehl nax la yac' ta milbil mahtanil te sbaq'uetal ta scuenta sbahtel q'uinal. 11Spisil te sacerdotehetic jujun c'ahc'al ya ya'telinic yac'ticlanel te milbil mahtaniletic te ma xhu' ya xch'ay mulil yu'une. 12Yan te Cristo jmehl nax la yac' sba scuenta milbil mahtanil yu'un muliletic, patil la shuhcan sba ta swa'el-c'ab te Diose. 13Ta hich ora bahel yac ta smahliyel te ha scajtajib yoc ya xc'oht te scontratac, 14como ta scuenta junax milbil mahtanil la slecubtes sbahtel q'uinal te mach'atic ch'ultesbilique. 15Ha nix hich ya yalbotic ta testigo-c'op te Ch'ul Espíritu, como nahil la yal: 16Ha ini te chapbil-c'op ya jpas soc te c'alal ya sta sc'ahc'alel, xchi te Cajwaltic: Ya ca'be ta yo'tanic te mandariletic cu'un, soc ya jts'ihbabe ta spensaric, xchi. 17Soc hich la yal xan: Ma jaymehl ya jna'be xan te smulic soc te sc'axun-mandaric, xchi. 18Ha yu'un te banti pasbilix perdón yu'unic, ma xtuhunix yan milbil mahtanil yu'un stojel mulil. 19Ha yu'un, quermanotac, jun co'tantic ya xhu' ya x'ochotic bahel ta Mero Ch'ul Awilal ta scuenta sch'ich'el te Jesucristo, 20ta scuenta te yach'il be te cuxul ay, te la sjambotic ochel ta tsahlul pac', ha te sbaq'uetale. 21Soc ay muc'ul sacerdote cu'untic te scuentahinej te na yu'un Dios. 22Ha yu'un jun co'tantic ac'a nohpojucotic bahel ta stojol Dios soc lec sch'uhunel co'tantic, pocbiluc me loq'uel spisil sbohlil co'tantic soc pocbiluc ta lequil ha' te jbaq'uetaltique. 23Ayuc me yip co'tantic spisil ora ta stojol te bin calojtic te yacotic ta smahliyel, ma me xchebetuc co'tantic, como ma xch'ay te bin yalojix te Diose. 24Soc ac'a jnoptic bin ut'il talel c'axel ya juc jbahtic ta c'uxultaywanej soc ta spasel lequil a'teliletic, 25ma me jquehchantic te ya jtsobilan jbahtic, hich te bin ut'il ay c'ahyemic ta spasel, talel c'axel ac'a jtsits jbahtic; soc c'axuc hich ay sc'oblal awu'unic a, te bin ut'il yac awilic te yac ta talel te yorahil ya xtal te Cajwaltique. 26Teme colojtic ya jlehulan jmultic te bin ut'il jna'ojtiquix te smelelil c'ope, mayuquix yan milbil mahtanil yu'un stojel te muliletic, 27ha xanix te castigo te xiweltic sba soc te c'ahc' te xpululet ta tihlel te ya slajinlan mach'atic scontrahinejic te Diose. 28Te mach'a ya sc'axuntaybe te Ley yu'un Moisés jc'axel ya x'ac'ot ta lajel ta scuenta cheb oxeb testigo. 29¿Ma bal c'axemuc to xan hich castigo ya yich' a te mach'a ya sts'o'ts'o'tec' te Snich'an Dios, soc te chopol sc'oblal ya ya'iy te sch'ich'el te chapbil-c'op te yich'oj ch'ultesel a, soc te ya scontrac'optay te Espíritu yu'un yutsil-o'tanil? 30Como ya jna'betic sba te mach'a hich yaloj: Ho'on ay ta jcuenta spaquel c'abal, ho'on ya ca'be stoj, xchi, soc te hich la yal xan: Te Cajwaltic ya me yich' ta c'op te pueblo yu'une, te xchihe. 31¡Xiweltic sba teme ay mach'a ya x'ipaj ta sc'ab te cuxul Diose! 32Pero na'ahic me te bin c'oht ta atojolic ta nahil to, te c'alal ochemexix ta sacal q'uinal a, te cuhch awu'unic awocol ta tsaltamba; 33ay la awich'ic ixta'c'optayel soc uts'inel ta comonsitil, soc ay la ajoquinic te mach'atic hich nix c'ax swocolic. 34Ha nix hich la ana'beyic yo'bolil sbahic te mach'atic chuculic, soc tse'el awo'tanic c'ax awocolic te la awich'ic pojbeyel abiluquic, como la ana'ic te c'ax hich yutsil a te bintic yac awich'ic te ma xlaje. 35Ha yu'un ma me xch'ay awu'unic te smuc'ul awo'tanic, te ay muc'ul mahtanil yu'une. 36Ya sc'an te ya xcuhch awu'unic, scuenta yu'un te c'alal apasojiquix te bin ya sc'an yo'tan te Dios, ya me awich'ic te bin yaloje. 37Como jteb xanix ya sc'an te ya xtal te Mach'a talel yac, ma ba halix. 38Te mach'a toj yo'tan ya xcuxaj ta scuenta sch'uhunel yo'tan; yan teme ya suht ta spat, ma ba lec co'tan yu'un, xchi. 39Pero te ho'otique, ma ho'ucotic te ya suhtotic ta jpatic yu'un ya xch'ayotic, ho'otic ay sch'uhunel co'tantic yu'un hich ya xcol jch'uhleltic.


Copyright
Learn More

will be added

X\