Galatas 6

1Quermanotac, teme ay mach'a la sta smul, ha'ex te cuentahimbilex yu'un te Espíritu ya me acha'sutic xan tal soc slamalil awo'tanic, pero ya me atsahtay aba, te manchuc ha'at nix yac atahic sujel ta mulil. 2Talel c'axel me xacoltay abahic ta scuchel awocolic, hich yac ac'ohtesic ta pasel a te ley yu'un Cristo. 3Teme ay mach'a muc' ya sp'is sba, te melel mayuc sc'oblal, ha nix ya slo'loy sba. 4Jtuhlutuhl ac'a stsahtay bin yilel ya'tel, hich ya xhu' ya yal lec sc'oblal stuquel, ma ha'uc ya spaj yan, 5como ta jtuhlutuhl ya sc'an ya scuch stuquel te yihcatse. 6Te mach'a ya yich' p'ijubtesel ta scuenta te sc'op Dios, pajal ac'a yich' spisil bintic lec soc te mach'a yac ta p'ijubtesel yu'une. 7Ma me xalo'loy abahic, Dios ma xhu' ta labanel, como spisil te bin ya sts'un te winique, ha nix sit ya stsob. 8Te mach'a ya sts'un ta scuenta spoco'-talel, ha nix ya stsobe sit te spoco'-talel te ya xjinawane; yan te mach'a ya sts'un ta scuenta te Espíritu, ta scuenta Espíritu ya stsobe scuxlejal sbahtel q'uinal. 9Ha yu'un ma me xluhbotic ta spasel te bin lec ta pasele, como ya me sta yorahil te ya jtsobetic sit, teme ma ba ya xpehc'aj co'tantique. 10Ha yu'un, ha chican ban c'alal ya xhu' cu'untic, ac'a jpastic te bin lec ta pasel ta stojol spisil yantic, soc c'ax hich a ta stojol te mach'atic pajal ay sch'uhunel co'tantic soque. 11Ilawilic te muc'ul letrahetic te ho'on ya jts'ihbabeyex ta jc'ab. 12Te mach'atic ya sc'anic te ya x'ich'otic ta muc' ta scuenta sbaq'uetalic, ha yac sujbelex ta yich'el circuncisión, ha nax yu'un te manchuc ya yich'ic uts'inel ta scaj te cruz yu'un te Cristo, 13como ni ha'uc ya sch'uhunic te Ley te mach'atic yich'ojic circuncisión; pero ya sc'anic te ha'ex yac awich'ic circuncisión yu'un hich ya xhu' ya stoy sbahic yu'un te bin awich'ojic ta abaq'uetalique. 14Pero ma jaymehluc te ay bin ya cal yutsil jc'oblal yu'une, ha nax ya calbe yutsil sc'oblal te cruz yu'un te Cajwaltic Jesucristo, te ha ta scuenta te laj sc'oblal ta co'tan te bahlumilal soc te ha nix hichon lajon ta stojol te bahlumilale. 15Como ta scuenta Cristo Jesús mayuc sc'oblal teme quich'ojtic circuncisión o teme ma ba quich'ojtic circuncisión, ha nax ay sc'oblal te pasbilotic ta yach'il. 16Spisil te mach'atic hich ya spasic, ac'a c'ohtuc ta stojolic lamal q'uinal soc c'uxultayel, soc ta stojol te Israel yu'un Dios. 17Ta ora ini soc ta patil, ma me ayuc mach'a ya yuts'inonix, como quich'oj ta jbaq'uetal te marcahetic yu'un Jesús. 18Quermanotac, ayuc me ta awo'tanic te yutsil yo'tan te Cajwaltic Jesucristo. Hichuc.


Copyright
Learn More

will be added

X\