Galatas 1

1Pablo, jpuc-c'op, (ma ticombilucon yu'un winiquetic soc ma ta scuentahuc winic, ha ta scuenta Jesucristo soc te Dios Tatil te la scha'cuxajtes tal te Jesucristo ta yohlil te mach'atic chamenic), 2ho'on soc spisil te quermanotac te sjoquinejon, Ta stojol te iglesiahetic ta sq'uinal Galacia: 3Ac'a sjoquinex te yutsil yo'tan soc te lamal q'uinal yu'un te Jtatic Dios soc te Cajwaltic Jesucristo, 4te ha nix la yac' sba ta lajel yu'un te jmultic yu'un ya scoltayotic loq'uel ta yohlil te bin chopol ay ta pasel ta ora ini, hich te bin ut'il la sc'an yo'tan te Jtatic Dios, 5te ha ac'a yich' halbeyel yutsil sc'oblal sbahtel q'uinal. Hichuc. 6Jchahp ya ca'iy a te ora nax la awihquitayic te Mach'a la yiq'uex ta scuenta yutsil yo'tan te Cristo, yu'un yac at'unic yan yach'il c'op. 7Ma yu'unuc te ay yan lec yach'il c'op, ha nax te ay mach'atic ya showiytesex soc ya sc'an ya syanijtesic te lec yach'il c'op yu'un te Cristo. 8Aunque ho'otcotic o jtuhl ch'ul a'bat ta ch'ulchan ya yalbeyex yan lec yach'il c'op te ma ha'uc te la jcalbeyexixe, ac'a bahtuc ta ch'ayel. 9Hich te bin ut'il la jcalbeyexix, ya jcha'halbeyex xan: Teme ay mach'a ya yalbeyex yan yach'il c'op te ma ha'uc te awich'ojique, ac'a bahtuc ta ch'ayel. 10¿Yu'un bal ya jle te lec jc'oblal yu'un winiquetic, o ha te lec jc'oblal yu'un te Diose? ¿Yu'un bal ha ya jc'an te ayuc yutsil yo'tan winiquetic cu'un? Te ha'uc ya jc'an te ay yutsil yo'tan winiquetic cu'un, yu'un nix ma ya'batucon Cristo abi. 11Quermanotac, ya ca'beyex ana'ic, te lec yach'il c'op yacon ta yalel, ma sc'opuc winic. 12Ma ba a'bilon yu'un winic soc ma ba a'bilon jnop yu'un winic; ha la ya'bon jna' te Jesucristo. 13Awa'iyejic bin ut'il ay jcuxlejal ta nahil to te c'alal ayon ta scuenta judío, ha te bayel la jcuts'inlan te iglesia yu'un Dios, jc'axel c'an jlajin. 14C'ax hich behbe yacon ta tohyel a ta scuenta judíohil te bin ut'il tsobol jlumal te pajal jcolel soc, como c'ax hich sc'oblal ta co'tan a te costumbrehetic yu'un te jme'jtate. 15Pero Dios, te la stsahon te ma to x'ayinon a soc te la yic'on ta scuenta te yutsil yo'tan, c'alal lec la ya'iy 16te ya ya'bon jna'be sba te Snich'an scuenta yu'un ho'on ya calbe sc'oblal ta yohlil te jyanlumetic, ma ba la joc'obe te mach'a ch'ich'-baq'uet, 17soc ma ba mohon bahel ta Jerusalén ta stojol te jpuc-c'opetic te nahil ayic cu'un; bohon ta Arabia, ta patil cha'suhton tal ta Damasco. 18Oxeb ha'bil ta patil mohon bahel ta Jerusalén, baht quil te Pedro, ho'lajuneb (15) c'ahc'al la joquin tey a. 19Pero mayuc yantic jpuc-c'opetic te la jquil, ha nax te Jacobo te yihts'in te Cajwaltique. 20Ta stojol Dios, ma jlotuc te bin ya jts'ihbabeyexe. 21Ta patil bohon ta sq'uinal Siria soc ta sq'uinal Cilicia. 22Ma ba na'bilon jba yu'un te iglesia ta Judea te jun ayic soc Cristo, 23ha nax hich ya'iyejic: Te mach'a la yuts'inotic ta nahil to, yo'tic yaquix ta yalel te bin ay ta ch'uhunel te c'an slajin ta nahil to, xchi. 24Hich la yalbeyic bayel wocol Dios yu'un ta jcuenta.


Copyright
Learn More

will be added

X\