Efesios 6

1Al-nich'anetic, ch'uhumbeyahic smandar te ame'atatic ta scuenta te Cajwaltic, como ha stojil ta pasel ini. 2Ich'a ta muc' te atat soc anan --te ha primer mandaril te banti ay bin ya yal ta jamal te ay bin ya x'a'bot yu'un a-- 3scuenta yu'un lec ya xc'ohat soc ya xnahtij aworahil ta bahlumilal a, xchi. 4Ha'ex te sme'statex, ma me xawac' bohlobuc yo'tan te awal-anich'nabique; coltesahic ta scuenta te tojobtesel soc te tsitsel yu'un te Cajwaltique. 5Mosohetic, ch'uhumbeyahic smandar te awajwalic ta bahlumilal soc xiwel soc yich'el ta muc', pasahic soc spisil awo'tanic, hich te bin ut'il ta stojol Cristo; 6ma ha'uc nax te c'alal yac yilbelat, hich te bin ut'il mach'atic ha nax ya sc'anic te lec sc'oblalic yu'un yantic, hichuquex me te bin ut'il a'batetic yu'un Cristo, ta spisiluc awo'tanic yac apasic te bin ya sc'an yo'tan te Diose. 7Soc yutsil awo'tan xawac' abahic ta a'batinel, hichuc me te bin ut'il ayat ta a'batinel yu'un te Cajwaltic, ma ha'uc te ayat ta a'batinel yu'un winiquetic, 8como ana'ojic te tuhlutuhl ya x'a'bot stojol sc'ab yu'un te Cajwaltic, ha chican te bin lec spasoj, teme ay ta mosohil o teme ay ta libre. 9Soc ha'ex ajwalilex, hichuc nix xapasbeyic, hiluc me awu'unic xiwtesel ta c'op, como ana'ojic te pajal ay Awajwalic soc ta ch'ulchan, te ma tsahbiluc nax mach'a ay ta cuenta yu'un. 10Scuenta slajibal, ich'a me yip awo'tanic ta scuenta te Cajwaltic soc te yu'ele. 11Lapahic spisil te mahquilal yu'un Dios scuenta yu'un ay yip awo'tanic te hich ma ba ya stsalat a te lo'loyel yu'un te pucuje. 12Como ma ha'uc ya jtsal jbahtic soc ch'ich'-baq'uet, ha ya jtsal jbahtic soc principaletic, te mach'atic ay yu'elic, yajwalic yihc'al q'uinal ta bahlumilal ini, soc chopol espírituhetic te ay yipic te ayic ta toyol. 13Ha yu'un ich'ahic spisil te a'tejibaletic yu'un Dios, scuenta yu'un hich ya xcuhch awu'unic ta yorahil a te bin chopol, soc teme hu' awu'unic spisil, hich jun awo'tanic c'alal slajibal. 14Tehc'ana abahic hiche, chuca ach'uhtic ta smelelil c'op, lapa smahquil atahnic ta toj-o'tanil, 15soc lapa atepic te chapalex yu'un yalel te lec yach'il c'op yu'un lamal q'uinal. 16Soc ta spisil, ich'ahic te mahquilal yu'un sch'uhunel-o'tanil te ya xhu' yac atup'beyic spisil sc'ahc'al ya'tejib a te mach'a chopole. 17Ich'ahic smahquil jolal yu'un colel soc te espada yu'un te Espíritu, ha te sc'op Diose. 18Spisiluc ora c'oponahic Dios ta scuenta te Espíritu ta spisil ta chahp bintic yac ac'ambeyic te Diose. Cuxuluc awo'tanic, soc c'opombeyahic Dios spisil ora te mach'atic ch'ultesbilique. 19Soc ha nix hichon, c'opombonic Dios scuenta yu'un te c'alal ya xc'opojon ya x'a'boton bin ya cal, scuenta yu'un ma ba ya xiwon ta yaq'uel ta nopel te lec yach'il c'op te mayuc ta na'el ta nahil to, 20te ha ta scuenta te ayon ta chuquel ta cadena, ho'on te ticombilon yu'un Dios. C'opombonic Dios yu'un te manchuc ya xiwon ta yalel te lec yach'il c'op, hich te bin ut'il ya sc'an ya xc'opojone. 21Te quermanotic Tíquico te c'ux ta co'tantic soc te jun yo'tan yac'oj sba ta a'batinel yu'un te Cajwaltic, ya me xc'oht yalbeyex awa'iyic spisil bin ut'il ayon soc te bin yac jpasbele. 22Ha scuentahil te la jticon tal ta atojolic, yu'un yac ana'ic bin ut'il ayotcotic, soc scuenta yu'un ya smuc'ubtesbeyex awo'tanic. 23Te Jtatic Dios soc te Cajwaltic Jesucristo ac'a ya'be lamal q'uinal soc sc'uxul yo'tan soc sch'uhunel yo'tan te quermanotactique. 24Ac'a c'ohtuc te yutsil yo'tan Dios ta stojol spisil mach'atic c'ux ta yo'tanic te Cajwaltic Jesucristo soc sc'uxul-o'tanil te ma xch'aye. Hichuc.


Copyright
Learn More

will be added

X\