Efesios 5

1Ha yu'un nopbeyahic yo'tan te Diose, te bin ut'il yal-snich'anex te bayel c'uxex ta yo'tane. 2C'ux me xawa'iy abahic spisil ora, hich te bin ut'il c'ux la ya'iyotic te Cristo soc te la yac' sba ta lajel ta jcuentatic, te ha milbil smahtan Dios te sumet yic' c'ohem ta stojol. 3Te antsiwej soc antsinel, spisil bin ilobtic sba, o sbic'tal-o'tanil, jc'axel ma me xatahic ta halel, como ma snuhp'uc te mach'a ch'uhltesbilic. 4Soc ma me xawalic c'opetic te ma stojiluc, o loca-c'op, lomlom-c'op, te ma hichuc ya sc'an halel, ha lec yac awo'tantayic yalbeyel wocol te Diose. 5Como ana'ojic te ma xhu' ya x'ochic ta banti ay te cuentahinel yu'un Cristo soc yu'un Dios te j'antsinel soc j'antsiwej, te mach'a bohloben sc'oblal, o te ay sbic'tal yo'tan, te ha pajal soc sch'uhunel loc'omba. 6Ma me ayuc mach'a yac awac' slo'loyex ta tojol-c'opetic, como ta scuenta spasel ini ya xtal te yilimba Dios ta stojol te mach'atic jc'axun-c'opetic. 7Ha yu'un ma me xajoquinic ta slehel smulic. 8Como ta nahil to ha'ex yihc'al q'uinalex, pero ta ora ini ha'ex sacal q'uinalex ta scuenta Cajwaltic; hich me ac'a ayinuquex te bin ut'il yal-snich'nab te sacal q'uinale, 9(como te sit ya yac' te Espíritu, ha te lec-o'tanil, spasel bin toj, soc smelelil c'op) 10soc na'ahic stsahtayel te bin lec yo'tan yu'un te Cajwaltique. 11Ma me xajoquinic ta spasel te a'teliletic yu'un te yihc'al q'uinal te mayuc stuc, ha lec xan te yac awaq'uic ta ilel te ay smulic, 12como q'uexlaltic sba ta halel te bin ya spasic ta muquen. 13Pero spisil ya xchicnaj te c'alal ya xchicnajtesot yu'un te sacal q'uinal, como te sacal q'uinal ya yac' chicnajuc spisil. 14Ha scuentahil te hich ay ta halel: Wic'a asit, ha'at te wayalate, hahchan tal ta yohlil te mach'atic chamenic, ya me sacubtes q'uinal ta atojol te Cristo, te xchihe. 15Ha yu'un tsahtaya me abahic ta lec bin ut'il ya x'ayinex ta q'uinal, p'ijanic me, ma me hichuquex te bin ut'il mach'atic ma sna'ic q'uinal, 16na'ahic stuhunel ta lec te tiempo, como chopol te bin ya xc'oht ta pasel ta jujun c'ahc'al. 17Ha yu'un ma me biluc nax xalomic ta pasel, na'ahic me te bin ya sc'an yo'tan te Cajwaltique. 18Ma me xyacubex yu'un vino, te ha ya xbohlobteswan; ha'uc me nojel ta awo'tanic te Ch'ul Espíritu. 19Talel c'axel xac'opon abahic ta salmohetic, c'ayojetic yu'un Dios, soc ch'ul c'ayojetic; c'ayojtayahic soc halbeyahic yutsilal te Cajwaltic ta awo'tanic, 20spisil ora halbeyahic wocol te Jtatic Dios yu'un spisil, ta scuenta sbihil te Cajwaltic Jesucristo. 21Talel c'axel me xawich' abahic ta cuenta, ta scuenta yich'el ta muc' te Cristo. 22Te nuhpunem antsetic ac'a yac' sbahic ta cuentahinel yu'un te smamalalic, hich te bin ut'il ta stojol te Cajtwaltique, 23como ha jolal yu'un ants te smamalal, hich te bin ut'il te Cristo ha jolal yu'un te iglesia, te ha sbaq'uetal soc ha Jcoltaywanej yu'un. 24Hich te bin ut'il te iglesia ay ta cuentahinel yu'un te Cristo, ha nix hich te nuhpunem antsetic ya yac' sbahic ta cuentahinel yu'un smamalalic ta spisil. 25Winiquetic, c'ux me xawa'iy ta awo'tanic te awihnamic, hich te bin ut'il c'ux ta yo'tan Cristo te iglesia soc te la yac' sba ta lajel ta scuenta, 26yu'un ya sch'ultes, c'alal lecubtesbil yu'un ta scuenta spoquel ta ha' ta scuenta te sc'ope, 27scuenta yu'un ya stehc'an te iglesia ta stojol, ha jun iglesia te ay yutsilal, te mayuc yabaquil, mayuc bin jihnem o yan bin ma lecuc, ha ch'ultesbil soc mayuc bin chopol ay ta stojol. 28Ha nix hich te winiquetic, c'ux me ac'a ya'iy ta yo'tanic te yihnamic hich te bin ut'il c'ux ya ya'iyic stuquel te sbaq'uetalique. Te mach'a c'ux ya ya'iy te yihnam, ha nix c'ux ya ya'iy sba, 29como mayuc mach'a ya sp'aj te sbaq'uetal, ya smac'lin soc ya scanantay, hich te bin ut'il ya spas Cristo ta stojol te iglesia, 30como ho'otic yoc sc'abic te sbaq'uetal, ha sbaq'uetalotic soc sbaquelotic. 31Ha scuentahil te ya yihquitay hilel sme'stat te winique, ya yic' sba soc te yihnam, junax baq'uet ya xc'ohtic ta schebalic. 32Wocol ta na'el te muquen c'op ini, pero ya calbe sc'oblal te iglesia soc te Cristo. 33Pero jujutuhlex c'ux me xawa'iy te awihnam hich te bin ut'il c'ux yac awa'iy aba; soc te antse ac'a yich' ta cuenta te smamalale.


Copyright
Learn More

will be added

X\