Efesios 4

1Ho'on te ayon ta chuquel ta scuenta te Cajwaltic, ya calbeyex bayel wocol te hichuc ya xcuxajex a te bin ut'il pasel ya sc'an yu'un te ic'bilexix yu'un Dios. 2Peq'ueluc me xawac' abahic, lamaluc me awo'tanic, talel c'axel cuhchuc awu'unic ta scuenta sc'uxul awo'tanic, 3ac'ahic fuersa te junuc awo'tan abahic ta scuenta te Espíritu, ta scuenta te lamal q'uinal te ya yac' junajuc awo'tanique. 4Junax baq'uet soc junax Espíritu, hich te bin ut'il junax te bin smuc'ulinej co'tantic te ha ic'bilex yu'une, 5junax Cajwaltic, junax te bin ay ta ch'uhunel, junax ich'ha'; 6junax Dios te ha Tatil cu'untic jpisiltic, te ha scuentahinej spisil, te ya x'a'tej ta jcuentatic jpisiltic soc te ay ta co'tantic jpisiltic. 7Pero ta jtuhlutuhl la ya'botic yutsil mahtanil, ha chican te jayeb yac'oj te Cristo. 8Ha scuentahil te hich ya yal: C'alal mo bahel ta toyol, la yic' bahel jchuqueletic, soc la yac'ticlambe mahtaniletic te winiquetic, te xchihe. 9¿Bin a te mo bahel te xchihe? Yu'un nix nahil co bahel c'alal ta sc'ubulil te bahlumilale. 10Te mach'a co bahel, ha nix te mach'a mo bahel c'alal ta sba ch'ulchan, scuenta yu'un ya snojes spisil. 11Ha nix te la yac' te ay jpuc-c'opetic, jalwanejetic, te mach'atic ya yalic te lec yach'il c'op, pastoretic soc p'ijubteswanejetic, 12scuenta yu'un ya schahpanic ta lec te mach'atic ch'uhltesbilic scuenta spasel te ya'tel Dios, scuenta yu'un ya yich' yip te sbaq'uetal Cristo, 13ha to teme pajal ay sch'uhunel co'tantic ta jpisiltic soc te pajal ya jna'betic sba te Snich'an Dios, te ha muc'ul ants-winicotic ya xc'ohotic, te ya jtahtic c'ohel te stalel te Cristo. 14Hich ma ba alalotiquix te xyal xmo te co'tantic, te bayuc ya x'ic'ototic bahel yu'un biluc nohptesel soc te lo'loyel yu'un winiquetic te yac slo'loybelic ta scuenta te lo'loywanej yu'unique; 15pero smelelil ya xc'opojotic ta scuenta sc'uxul co'tantic, spisil behbehucotic me ta muc'ubel ta stojol te Jolal, ha te Cristo, 16te ha nix ta scuenta te spisil te baq'uet, te ts'acticlambil soc te junax c'ohem ta scuenta spisil te schihal, ha chican bin yilel ya'tel ta jujuchahp, ya xmuc'ub soc ya yich' yip ta scuenta c'uxul-o'tanil. 17Hich ya calbeyex soc hich ya jpasex ta mandar ta scuenta te Cajwaltic, te ma me hichuc atalelic te bin ut'il stalel te jyanlumetic, te biluc nax ya slomic ta pasel ta scaj te ma sna'ic q'uinal, 18te ay ta yihc'al q'uinal te spensaric soc namal ayic ta stojol te cuxlejal yu'un Dios ta scaj te ma sna'ic q'uinal, ta scaj te tulan te yo'tanique. 19C'alal ch'ay sq'uexlalic, la yac' sbahic ta spasel mulil ta sbaq'uetalic, hich spisil yo'tanic la spasic te bintic chopol ta pasele. 20Yan te ha'exe, ma hichuc la anopbeyic sc'oblal te Cristo, 21teme melel awa'iybeyejic sc'op soc teme la awich'ic p'ijubtesel ta scuenta, hich te bin ut'il ay te smelelil c'op ta stojol Jesús. 22Cholahic loq'uel te apoco'-talelic te bin ut'il ayex ta nahil to, te yac ta bohlobel ta scaj lo'loyel ta mulil; 23ach'ubenuc me apensaric, 24soc lapahic me te yach'il cuxlejal, te hich pasbil te bin ut'il ay te Diose, te toj bin ya spas soc te ch'ultesbil ta smelelil. 25Ha yu'un ac'a hiluc awu'unic lot, ta smelelil c'op xac'oponic apat-axuhquic, como junax baq'uet ayotic ta jpisiltic. 26Teme ya x'ilinex, ma me xata amulic yu'un; ma me yaleluc stibiltayel yaquex ta ilimba, 27soc ma me xawac' banti ya x'och te pucuje. 28Te mach'a ya sna' elec', ma me xya'iyix elec', ac'a a'tejuc, ac'a spas ta sc'ab te bin lec ta pasel, scuenta yu'un hich ya sta a te bin ya ya'be te mach'a mayuc bin ay yu'une. 29Ma me xloc' bohlc'op ta awehic, ha'uc nax lequil c'op te ya xtuhun scuenta ya'beyel yipic te yantic, scuenta yutsil slequil te mach'a ya ya'iybeyex ac'opique. 30Ma me xawa'beyic smel yo'tan te Ch'ul Espíritu yu'un Dios, te ha sello awich'ojic ha to teme la sta yorahil acolelique. 31Jc'axel hiluc awu'unic spisil lablab-o'tantaywanej, c'ahc'ubel, ilimba, utaw, ixta'c'op, soc spisil bintic chopol. 32Talel c'axel xawa'be aba awil yutsil awo'tanic soc c'uxultaywanej, talel c'axel xapasbe abahic perdón, hich te bin ut'il Dios la spasbeyex perdón ta scuenta Cristo.


Copyright
Learn More

will be added

X\