Efesios 2

1Ta nahilal chamenex ta scaj ac'axun-mandaric soc amulic, 2te la apasic te c'alal la at'umbeyic stalel te bahlumilal soc la apasic te bin la sc'an te ajaw te scuentahinej te ic', ha te espíritu te yac ta a'tel ta stojol te al-nich'anetic yu'un c'axun-c'op. 3Ta jpisiltic hich nix tey cuxajotic ta nahil to a, ha baht ta co'tantic spasulanel te bintic la smulan spasel te jpoco'-taleltic yu'un mulil, la jpasbetic te bintic la sc'an yo'tan soc te bintic la snop. Ta scuenta te jtaleltic ini ayotic ta scuenta yich'beyel te yilimba Dios, hich te bin ut'il te yantique. 4Pero Dios, te bayel ya xc'uxultaywan, ta scuenta smuc'ul sc'uxul yo'tan ta jtojoltic 5pajal la ya'botic cuxlejal soc Cristo te c'alal ayotic to ta mulil a (ha ta scuenta yutsil-o'tanil te colemex). 6Soc pajal la scha'cuxajtesotic tal soc Cristo, soc ha nix la yac' huhcajucotic soc ta ch'ulchan, 7scuenta yu'un ya yac' ta ilel ta patil bahel te c'ax bayel sc'uhlejal te yutsil yo'tan te chican ta scuenta te lec yo'tan ta jtojoltic ta scuenta Cristo Jesús. 8Como ta scuenta yutsil yo'tan te colemex ta scuenta sch'uhunel awo'tanic; ma yu'unuc ha'ex la awehtes acolelic, ha mahtanil yu'un Dios; 9ma ha'uc ta scuenta awa'telic, scuenta yu'un mayuc mach'a ya xhu' ya stoy sba yu'un. 10Ha ya'telotic te Diose, pasbilotic ta scuenta Cristo Jesús yu'un ya jpastic te lequil a'teliletic te schahpanej ta nahil to te Dios te ya jpastique. 11Ha yu'un na'ahic me bin ut'il ayex ta nahil to, ha'ex jyanlumex ta scuenta ch'ich'-baq'uet, te halbil te ma ba awich'ojic circuncisión, xchi ac'oblalic yu'un te mach'atic yich'ojic circuncisión, ha te bin pasbil ta c'abal ta sbaq'uetalic. 12Ta hich ora mayuquex ta stojol te Cristo, ma junuc alumalic soc te Israel, ma ba ochemex tey ta chapbil-c'opetic yu'un te bin yaloj Dios, mayuc smuc'ul awo'tanic soc ma ba joquimbilex yu'un Dios ta bahlumilal. 13Pero ha'ex te namal ayex ta stojol Dios ta namey, ta ora ini, ta scuenta Cristo Jesús, la awich'iquix nohpojtesel tal ta scuenta sch'ich'el Cristo. 14Ha lamal q'uinal cu'untic, la yac' te jun ya xc'oht schebal te pueblohetic, la sjin te ts'ahc macal ta ohlil; 15ta scuenta sbaq'uetal la slajimbe sc'oblal te Ley, ha te mandariletic yu'un soc te bin ya xc'anot yu'une, scuenta yu'un ya spas te junax yach'il ants-winic ya xc'oht schebalic ta stojol, hich la yac' lamal q'uinal, 16soc ta scuenta te laj ta cruz te Cristo la yac' te lecub yo'tanic soc Dios, junax baq'uet c'oht schebalic, hich la slajin te bin scontrahinej sbahique. 17Te Cristo tal yalbeyex te lec yach'il c'op scuenta lamal q'uinal, ha'ex te namal ayex soc te mach'atic nopol ayic, 18como ha ta scuenta te pajal ya xhu' ya x'ochotic ta stojol te Tatil ta scuenta junax Espíritu. 19Ha yu'un ma jyanlumuquexix, ma yanuquix alumalic, pajal alumal abahic soc te mach'atic ch'uhltesbilic soc jun ayexix soc te mach'atic yu'un Dios, 20awich'ojic ts'ahcuyel ta sba te jpuc-c'opetic soc te jalwanejetic, soc te yich'o-ip xuhc na ha te Jesucristo. 21Ha ta scuenta te spisil te na lec chahpambil soc yac ta tohyel mohel scuenta yu'un ch'ul templo ya xc'oht yu'un te Cajwaltique. 22Ha nix hichex pajal yaquex ta ts'ahcuyel soc te yantic scuenta yu'un tey ya xnahin Dios a ta scuenta te Espíritu.


Copyright
Learn More

will be added

X\